തിരുവനന്തപുരം: (KVARTHA) സംസ്ഥാനത്തെ സാമൂഹ്യസുരക്ഷ, ക്ഷേമനിധി പെൻഷൻ ഗുണഭോക്താക്കൾക്ക് സന്തോഷവാർത്ത. രണ്ടു ഗഡു പെൻഷൻ കൂടി വിതരണം ചെയ്യാൻ സർക്കാർ തീരുമാനിച്ചു. ഇതിനായി 1604 കോടി രൂപ അനുവദിച്ചതായി ധനകാര്യമന്ത്രി കെ എൻ ബാലഗോപാൽ അറിയിച്ചു. ഏകദേശം 62 ലക്ഷത്തോളം ആളുകൾക്ക് 3200 രൂപ വീതം ലഭിക്കും. 

വെള്ളിയാഴ്ച മുതൽ പെൻഷൻ വിതരണം ആരംഭിക്കും. 26.62 ലക്ഷം ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ട് പണം എത്തും. ബാക്കിയുള്ളവർക്ക് സഹകരണ ബാങ്കുകൾ വഴി പെൻഷൻ വീടുകളിൽ എത്തിച്ചു നൽകും. ജനുവരി മാസത്തിലെ പെൻഷനും കുടിശ്ശികയായിരുന്ന ഒരു ഗഡുവും ചേർത്താണ് ഇപ്പോൾ വിതരണം ചെയ്യുന്നത്.

ഈ സാമ്പത്തിക വർഷത്തിലും അടുത്ത സാമ്പത്തിക വർഷത്തിലുമായി കുടിശ്ശിക പെൻഷൻ നൽകുമെന്ന് മുഖ്യമന്ത്രി പിണറായി വിജയൻ നിയമസഭയിൽ നേരത്തെ വ്യക്തമാക്കിയിരുന്നു. അതിന്റെ ഭാഗമായി ആദ്യ ഗഡു ഓണത്തിന് മുൻപ് വിതരണം ചെയ്തു. ഇപ്പോൾ രണ്ടാമത്തെ ഗഡുവാണ് വിതരണം ചെയ്യുന്നത്. ഈ സർക്കാർ അധികാരത്തിൽ വന്ന ശേഷം ഏകദേശം 35,400 കോടി രൂപ ക്ഷേമ പെൻഷൻ വിതരണത്തിനായി ചെലവഴിച്ചിട്ടുണ്ട്. 

ഇന്ത്യയിൽ ഏറ്റവും മികച്ച സാമൂഹ്യ സുരക്ഷാ പെൻഷൻ പദ്ധതി നടപ്പിലാക്കുന്നത് കേരളത്തിലാണ്. ഈ പദ്ധതിക്കാവശ്യമായ പണത്തിന്റെ 98 ശതമാനവും സംസ്ഥാന സർക്കാർ കണ്ടെത്തുന്നു.  കേരളത്തിൽ പ്രതിമാസം പെൻഷൻ വാങ്ങുന്നവർക്ക് 1600 രൂപയാണ് ലഭിക്കുന്നത്. 

#KeralaPension #WelfarePension #SocialSecurity #PensionDistribution #KeralaGovernment #FinancialAid