ആഗോള അയ്യപ്പ സംഗമത്തിന് പഴയിടം മോഹനൻ നമ്പൂതിരിയുടെ വിഭവസമൃദ്ധമായ സദ്യ

പമ്പ: (KVARTHA) ആഗോള അയ്യപ്പ സംഗമത്തിന് എത്തുന്നവർക്ക് വിഭവസമൃദ്ധമായ ഭക്ഷണം ഒരുക്കുന്നത് പ്രമുഖ പാചക വിദഗ്ധനായ പഴയിടം മോഹനൻ നമ്പൂതിരിയുടെ നേതൃത്വത്തിലാണ്. വിവിധ സംസ്ഥാനങ്ങളിൽ നിന്നും വിദേശത്തുനിന്നും എത്തുന്ന പ്രതിനിധികൾ ഉൾപ്പെടെ 4000 പേർക്കാണ് പഴയിടത്തിൻ്റെ കൈപ്പുണ്യം നുകരാൻ അവസരം ലഭിക്കുന്നത്. പമ്പയിലെ പ്രധാന വേദിയോട് ചേർന്നുള്ള പന്തലിലും, ഹിൽടോപ്പിലെ 7000 ചതുരശ്രയടി വിസ്തീർണ്ണമുള്ള ജർമൻ ഹാങ്ങർ പന്തലിലുമാണ് ഭക്ഷണം വിളമ്പാനുള്ള സൗകര്യങ്ങൾ ഒരുക്കിയിട്ടുള്ളത്. 500 പേർക്ക് ഒരേസമയം ഇരുന്ന് കഴിക്കാവുന്ന സൗകര്യവും ഏഴ് കൗണ്ടറുകളിലായി ബുഫേ (Buffet) സംവിധാനവും ഒരുക്കിയിട്ടുണ്ട്.

പ്രഭാതഭക്ഷണമായി ഇഡ്ഡലിയും ദോശയും ചായയും കാപ്പിയും കൂടാതെ പാൽ ചേർത്ത കോൺഫ്ലേക്സും വിളമ്പും. രാവിലെ 11ന് 5000 പേർക്കുള്ള ചായയും ഉഴുന്നുവടയും വിതരണം ചെയ്യും. ഉച്ചഭക്ഷണത്തിന് സാമ്പാർ, പുളിശ്ശേരി, മോര്, അവിയൽ, തീയൽ, തോരൻ ഉൾപ്പെടെ ഒമ്പത് കൂട്ടം കറികളും പാലട പ്രഥമനും ഉൾപ്പെടെയുള്ള വിഭവസമൃദ്ധമായ ഊണാണ് ഒരുക്കിയിരിക്കുന്നത്. അതേസമയം, മറ്റ് സംസ്ഥാനങ്ങളിൽ നിന്ന് എത്തുന്നവർക്കായി വെജിറ്റബിൾ പുലാവും ചില്ലി ഗോപിയും വിളമ്പും. വൈകിട്ട് മൂന്ന് മണിക്ക് 5000 പേർക്ക് ചായയും വട്ടയപ്പവും ഉണ്ടാകും.

സംഗമത്തിന്റെ അവസാന ദിവസം 3000 പേർക്കാണ് അത്താഴം പ്രതീക്ഷിക്കുന്നത്. ഫുൽക്ക റൊട്ടിയും പനീർ ബട്ടറും വെജിറ്റബിൾ സാലഡും അത്താഴത്തിന് ഉണ്ടാകും. പഴയിടത്തിൻ്റെ നേതൃത്വത്തിൽ 40 ജീവനക്കാരാണ് പാചകപ്പുരയിൽ സജീവമായിട്ടുള്ളത്. 600 കിലോ അരിയും 1500 ലിറ്റർ പാലും പാചകത്തിനായി ഉപയോഗിക്കുന്നു. കഴിഞ്ഞ നാല് വർഷം തുടർച്ചയായി സന്നിധാനത്ത് ഓണസദ്യ ഒരുക്കി ശ്രദ്ധേയനായ പഴയിടം മോഹനൻ നമ്പൂതിരി, കരിമ്പിൻ ചണ്ടിയിൽ തീർത്ത പ്രകൃതി സൗഹൃദമായ പ്ലേറ്റുകളിലാണ് ഭക്ഷണം നൽകുന്നത്. ഇത് പരിസ്ഥിതിക്ക് ദോഷം വരാത്ത രീതിയിലുള്ള സംഗമത്തിന്റെ നടത്തിപ്പിന് കൂടുതൽ മിഴിവേകും.

ഈ വിവരങ്ങൾ നിങ്ങൾക്ക് ഇഷ്ടപ്പെട്ടെങ്കിൽ പങ്കിടുക.

Article Summary: Global Ayyappa Sangamam to feature grand feast by Pazhayidom.

 #AyyappaSangamam #Pazhayidom #Sabarimala #Pampa #KeralaCuisine #Vegetarian