കൊച്ചി: (KVARTHA) ശ്രീ ഹരിഹരപുത്ര ധർമ്മപരിപാലന സഭ ട്രസ്റ്റ് ഒരു ലക്ഷം ഏക്കർ കൃഷിഭൂമിയിൽ സൗജന്യ കൃഷി സഹായങ്ങൾ നൽകുന്ന പദ്ധതി ആരംഭിക്കുന്നു. എറണാകുളം ആസ്ഥാനമായ പ്രമുഖ ഡ്രോൺ ടെക് സ്റ്റാർട്ടപ്പായ ഫ്യൂസലേജ് ഇന്നോവേഷൻസുമായി കൈകോർത്ത്, ആധുനിക സാങ്കേതികവിദ്യ കാർഷിക മേഖലയിലേക്ക് എത്തിക്കുകയാണ് ഈ പദ്ധതിയുടെ ലക്ഷ്യം.

ഡ്രോൺ ഉപയോഗിച്ച് സൗജന്യ മരുന്നടി

കൃഷിയിടങ്ങളിൽ ഡ്രോൺ ഉപയോഗിച്ച് സൗജന്യമായി മരുന്നടിക്കുന്നത് പദ്ധതിയിലെ പ്രധാന ആകർഷണമാണ്. അടുത്ത നാല് മാസത്തിനുള്ളിൽ കേരളം, തമിഴ്‌നാട്, കർണാടക, ആന്ധ്രപ്രദേശ്, മഹാരാഷ്ട്ര എന്നീ സംസ്ഥാനങ്ങളിലായി ഒരു ലക്ഷം ഏക്കർ കൃഷിഭൂമിയിൽ ഈ സേവനം ലഭ്യമാക്കാനാണ് ട്രസ്റ്റിന്റെ ലക്ഷ്യം.

കാർഷിക മേഖലയിലെ പുത്തൻ പരിവർത്തനം

ട്രസ്റ്റ് പൂർണ ധനസഹായം നൽകി കൊണ്ട് കാർഷിക മേഖലയിൽ ആവശ്യമായ സാങ്കേതിക സേവനങ്ങളും ഉപകരണങ്ങളും ഒരുക്കുകയും ആധുനിക കാർഷിക മാർഗ്ഗങ്ങൾ ലഭ്യമാക്കുകയും ചെയ്യും. അർഹരായ കർഷകരെ കണ്ടെത്തി അവരുടെ പ്രശ്‌നങ്ങൾ മനസ്സിലാക്കി അവർക്ക് വേണ്ട വളം, ഉപകരണങ്ങൾ, പരിപാലന സഹായം എന്നിവ സൗജന്യമായി നൽകും. ആദിവാസി സമൂഹത്തിന്റെ കാർഷിക ഉൽപാദനത്തെ വിപുലപ്പെടുത്താനും ജീവിത നിലവാരം ഉയർത്താനുമുള്ള പദ്ധതികളും ഉൾപ്പെടുത്തിയിട്ടുണ്ട്. നിലയ്ക്കലിലും ശബരിമല മേഖലയിലും ഉള്ള അനേകം ആദിവാസി കുടുംബങ്ങൾക്ക് വിദ്യാഭ്യാസ സഹായം, ചികിത്സാ സഹായം എന്നിവ വർഷങ്ങളായി ട്രസ്റ്റ് നൽകുന്നുണ്ട്.

ആധുനിക സാങ്കേതികവിദ്യയുടെ പ്രയോജനം

ആധുനിക സാങ്കേതിക വിദ്യ ഉപയോഗിച്ച് പരിസ്ഥിതി സൗഹൃദമായ കാർഷിക മാർഗ്ഗങ്ങൾ സൃഷ്ടിക്കുന്ന ഈ സംരംഭം കേരളം അടക്കമുള്ള സംസ്ഥാനങ്ങളുടെ കാർഷിക സമ്പത്ത് നിലനിർത്താനും ആധുനികതയിലൂടെ കാർഷിക മേഖലയിൽ വലിയ മാറ്റങ്ങൾ വരുത്താനും കഴിവുള്ളതാണെന്ന് ശ്രീ ഹരിഹരപുത്ര ധർമ്മപരിപാലന സഭ ട്രസ്റ്റ് മാനേജിങ് ട്രസ്റ്റി അജയ് കുമാർ, ട്രസ്റ്റിമാരായ അനൂപ് കുമാർ, ഗിരീഷ്, ഫ്യൂസലേജ് ഇന്നോവേഷൻസ് മാനേജിങ് ഡയറക്ടർ ദേവൻ ചന്ദ്രശേഖരൻ എന്നിവർ അറിയിച്ചു.

സേവനങ്ങൾ ഉടൻ തന്നെ ആരംഭിക്കും

സൗജന്യസേവനങ്ങൾ ഉടനെ തന്നെ പ്രാവർത്തികമാക്കും. സേവനസംബന്ധമായ സംശയങ്ങൾക്കും ബുക്കിങ്ങിനും +91 90742 97668 എന്ന നമ്പറിൽ ബന്ധപ്പെടുക.

#AgricultureAid #ModernFarming #KeralaAgriculture #DroneTechnology #FreeFarming #TribalSupport