Gun Attack | മീന്‍പിടുത്തം കഴിഞ്ഞ് മടങ്ങുകയായിരുന്ന തൊഴിലാളിക്ക് കടലില്‍ വച്ച് വെടിയേറ്റു

കൊച്ചി: (www.kvartha.com) മീന്‍പിടുത്തം കഴിഞ്ഞ് മടങ്ങുകയായിരുന്ന തൊഴിലാളിക്ക് കടലില്‍ വച്ച് വെടിയേറ്റു. അന്ധകാരനാഴി സ്വദിശി സെബാസ്റ്റ്യ(72) നാണ് ചെവിക്ക് വെടിയേറ്റത്. പരിക്കേറ്റ സെബാസ്റ്റ്യനെ മട്ടാഞ്ചേരി ആശുപത്രിയിലെത്തിച്ചു. ബുധനാഴ്ച ഉച്ചയ്ക്ക് 11.30 ഓടെയാണ് സംഭവം.

വള്ളത്തില്‍ നില്‍ക്കുമ്പോഴാണ് തനിക്ക് വെടിയേറ്റതെന്നും ഉടന്‍ വള്ളത്തില്‍ മറിഞ്ഞുവീണെന്നും സെബാസ്റ്റ്യന്‍ പറഞ്ഞു. സെബാസ്റ്റ്യന്‍ രക്ഷപ്പെട്ടത് ഭാഗ്യംകൊണ്ടാണെന്നു വള്ളത്തില്‍ ഒപ്പമുണ്ടായിരുന്നവര്‍ പ്രതികരിച്ചു. ഫയറിങ് പരിശീലനം നടക്കുന്നതായി മുന്നറിയിപ്പൊന്നും ലഭിച്ചിരുന്നില്ലെന്നും വെടിയുണ്ട നാവികസേനയുടേതല്ലെങ്കില്‍ ഗൗരവമേറിയ വിഷയമാണെന്നും തൊഴിലാളികള്‍ പറഞ്ഞു.

ഫയറിങ് പരിശീലനം നടക്കുന്ന സമയത്ത് അതുവഴി മത്സ്യബന്ധന ബോടുകളും മറ്റും കടന്ന് പോകുന്നതിന് നിയന്ത്രണം ഏര്‍പെടുത്താറുണ്ട്. അതു സംബന്ധിച്ച് നിര്‍ദേശങ്ങളും തൊഴിലാളികള്‍ക്ക് നല്‍കാറുണ്ടായിരുന്നു.

സംഭവത്തെ ഗൗരവമായി കാണുന്നുവെന്നും ഉചിതമായ നടപടിയുണ്ടാകുമെന്നും കൊച്ചി ഡിസിപി അറിയിച്ചു. നാവികസേനയുടെ പരിശീലന കേന്ദ്രമായ ഐഎന്‍എസ് ദ്രോണാചാര്യയുടെ പരിസരത്തു ബോട് എത്തിയപ്പോഴായിരുന്നു സംഭവം. ബോടില്‍ നിന്നു വെടിയുണ്ട കണ്ടെടുത്തിരുന്നു.