Hajj Camp | കണ്ണൂര്‍ ഹജ്ജ് കാംപില്‍ നിന്നും ആദ്യ തീര്‍ഥാടക സംഘം ജൂണ്‍ 4ന് യാത്രപുറപ്പെടും

മട്ടന്നൂര്‍: (www.kvartha.com) കണ്ണൂര്‍ ഹജ്ജ് കാംപില്‍ നിന്നുള്ള ആദ്യ വിമാനം ജൂണ്‍ നാലിന് പുലര്‍ചെ 1.45ന് പുറപ്പെടും. നിലവിലെ ഷെഡ്യൂള്‍ പ്രകാരം കേരളത്തില്‍ നിന്നുള്ള ആദ്യ ഫ് ളൈറ്റ് ആകും കണ്ണൂരിലേത്. കണ്ണൂര്‍ അന്താരാഷ്ട്ര വിമാനത്താവളത്തിന്റെ കാര്‍ഗോ കോംപ്ലക്സിലാണ് താല്‍കാലികമായി ഹജ്ജ് കാംപ് ഒരുക്കിയിട്ടുള്ളത്.

13 വിമാനങ്ങളാണ് അനുവദിച്ചിട്ടുള്ളത്. ഒരു വിമാനത്തില്‍ 145 ഹാജിമാരാണ് യാത്ര ചെയ്യുക. യാത്രക്ക് 24 മണിക്കൂര്‍ മുമ്പ് തന്നെ ഹാജിമാര്‍ കാംപില്‍ എത്തിച്ചേരും. ജൂണ്‍ 22നാണ് അവസാനത്തെ വിമാനം പുറപ്പെടുക. 2000ത്തോളം ഹാജിമാരാണ് കണ്ണൂര്‍ കാംപില്‍ നിന്നും പോവുക. പൂര്‍ണമായും ഹരിത ചട്ടം പാലിച്ചായിരിക്കും കാംപ്.

ഹജ്ജ് കാംപുമായി ബന്ധപ്പെട്ട് രൂപീകരിച്ചിട്ടുള്ള റിസപ്ഷന്‍, പ്രോഗ്രാം, ഫുഡ്, അകമഡേഷന്‍, വൊളന്റിയര്‍, ഗതാഗതം, ഹെല്‍ത് ആന്‍ഡ് സാനിറ്റേഷന്‍, ലൈറ്റ് ആന്‍ഡ് സൗന്‍ഡ്, മീഡിയ, എന്നീ സബ് കമിറ്റികളുടെ യോഗം വെള്ളിയാഴ്ച ചേര്‍ന്ന് തയാറെടുപ്പുകള്‍ വിലയിരുത്തി.

ഹജ്ജ് കാംപിന്റെ സംഘാടക സമിതി ഓഫീസ് ഉദ്ഘാടനം മെയ് 21 ഞായറാഴ്ച രാവിലെ 10 മണിക്ക് വായാന്തോട് ജന്‍ക്ഷന് സമീപം കെ കെ ശൈലജ ടീചര്‍ എം എല്‍ എ നിര്‍വഹിക്കും.