എം.എല്‍.എ എന്ന നിലയില്‍ അദ്ദേഹത്തിന്റെ മണ്ഡലത്തിലെ താല്‍പര്യങ്ങള്‍ സംരക്ഷിക്കേണ്ടതുള്ളതിനാലാണ് കോടതി ജാമ്യം അനുവദിച്ചത്. കേസിലെ സാക്ഷികളെ സ്വാധീനിക്കാന്‍ ശ്രമിക്കരുതെന്നും, അന്വേഷണവുമായി സഹകരിക്കണമെന്നും കോടതി എം.എല്‍.എയോട് നിര്‍ദേശിച്ചു. ഒളിംപിക്‌സില്‍ പങ്കെടുത്ത് ഇന്ത്യയ്ക്കുവേണ്ടി സ്വര്‍ണ്ണ മെഡല്‍ നേടിയ സന്തോഷത്തിലായിരുന്നു രാജേഷ് പുറത്തെത്തിയത്. അറസ്റ്റ് ചെയ്യാന്‍ പോലീസെത്തിയാല്‍ മുളകുവെള്ളം കൊണ്ട് നേരിടണമെന്ന് പറഞ്ഞ എം വി ജയരാജന്‍ മുതല്‍ ജയിലുകളില്‍ ആയിരങ്ങളല്ല, പതിനായിരങ്ങള്‍ നിറഞ്ഞാലും ഈ പാര്‍ട്ടിക്ക് അതൊരു പ്രശ്‌നവുമല്ലെന്ന് ഘോരഘോരം പ്രസംഗിച്ച പിണറായി വിജയന്‍ വരെയുള്ള നേതാക്കള്‍ക്കേറ്റ പ്രഹരമായിരുന്നു ടി വി രാജേഷ് എം.എല്‍.എയുടെ അറസ്റ്റ്.
രാജേഷിന് മുമ്പ് ജയിലിലെത്തി മാതൃക കാണിച്ച സി.പി.എം കണ്ണൂര്‍ ജില്ലാ സെക്രട്ടറി പി ജയരാജന്റെ ജാമ്യാപേക്ഷയും ടി വി രാജേഷ് എം എല്‍ എയുടെ മുന്‍കൂര്‍ ജാമ്യാപേക്ഷയും ഹൈക്കോടതി തള്ളിയതോടെ സി പി എം യഥാര്‍ത്ഥത്തില്‍ മാളത്തില്‍ ഒളിച്ച പാമ്പിനെപ്പോലെയായിരുന്നു. പി ജയരാജനെ അറസ്റ്റുചെയ്തപ്പോഴുണ്ടായ പുകിലൊന്നും രാജേഷ് എം.എല്‍.എയെ അറസ്റ്റുചെയ്തപ്പോഴുണ്ടാകാത്തത് ഏവരേയും അത്ഭുതപ്പെടുത്തിയിരിക്കാം. കാരണം മറ്റൊന്നുമല്ല, ജാമ്യം കിട്ടില്ല എന്നതു തന്നെ. അതുകൊണ്ടുതന്നെ നാവില്‍ പുഴുത്താല്‍ നുണഞ്ഞിറക്കണം എന്ന പഴഞ്ചൊല്ല് സി പി എം നേതാക്കളും അണികളും അക്ഷരംപ്രതി പ്രാവര്‍ത്തികമാക്കുകയായിരുന്നു.
വളരെ ധാര്‍ഷ്ട്യത്തോടും അഹങ്കാരത്തോടും കൂടി എല്ലാ കാര്യത്തിലും പ്രതികരിക്കുകയും പ്രവര്‍ത്തിക്കുകയും ചെയ്ത എം വി ജയരാജനടക്കമുള്ള നേതാക്കളെല്ലാം ടി വി രാജേഷിന്റെ അറസ്റ്റോടെ പത്തിമടക്കുകയാണുണ്ടായത്. കോടതി തങ്ങള്‍ക്ക് പുല്ലാണെന്ന് വെല്ലു വിളിച്ച് ശുംഭന്‍ പ്രയോഗത്തിന്റെ പാറ്റന്റ് ലഭിച്ച ജയരാജന്‍ അടക്കമുള്ളവര്‍ നിയമത്തെ മാനിക്കുന്നു. നിയമത്തിന്റെ വഴിയിലാണ് ഇനിയുള്ള നടപടികളും പ്രവര്‍ത്തികളുമെന്നാണ് ടി വി രാജേഷ് എം.എല്‍.എയുടെ അറസ്റ്റിനോട് പ്രതികരിച്ചത്.
പി ജയരാജനെ അറസ്റ്റ് ചെയ്തതിന്റെ പേരില്‍ സി പി എം ഉയര്‍ത്തിയ കലാപം ഹൈകോടതി വളരെ ഗൗരവത്തോടെയാണ് നിരീക്ഷിച്ചത്. പൊതുമുതലും സ്ഥാപനങ്ങളും തകര്‍ത്ത് ഒരു വ്യക്തിയുടെ പേരില്‍ സമൂഹത്തിന്റെ സ്വാതന്ത്ര്യം തന്നെ തച്ചുടക്കുന്ന സി പി എം നിലപാടിനുള്ള താക്കീതായിരുന്നു ഹൈക്കോടതി വിധി. കോടതിക്ക് കല്ലെറിഞ്ഞും ജഡ്ജിമാരെ ഭീഷണിപ്പെടുത്തിയും നിയമം കൈയിലെടുത്തും സി പി എം നേതൃത്വമാണ് പരമാധികാരികളെന്ന മട്ടില്‍ പെരുമാറി അപഹാസ്യരായവര്‍ ഇപ്പോള്‍ പത്തിമടക്കിയിരിക്കുകയാണ്.
കഴിഞ്ഞ ആഗസ്റ്റ് ഒന്നിന് ജയരാജന്‍ പോലീസ് മുമ്പാകെ ഹാജരായത് അണികള്‍ക്കൊപ്പം പ്രകടനം നയിച്ചുകൊണ്ടായിരുന്നു. മുന്‍കൂട്ടി തീരുമാനിച്ച പ്രകാരം ജയരാജന്റെ അറസ്റ്റിനു ശേഷം സി പി എം കണ്ണൂരിലെന്നല്ല സംസ്ഥാനത്താകെ കലാപമഴിച്ചു വിടുകയും ചെയ്തു. ക്രിമിനല്‍ കേസില്‍ പ്രതിയായ ഒരാളെ അറസ്റ്റ് ചെയ്തതിന്റെ പേരിലുള്ള ഹര്‍ത്താലിനും സംസ്ഥാനം സാക്ഷ്യം വഹിക്കുകയുണ്ടായി. എന്നാല്‍ ഡി വൈ എഫ് ഐ സംസ്ഥാന സെക്രട്ടറി കൂടിയായ ടി വി രാജേഷ് എം എല്‍ എ അറസ്റ്റിലായപ്പോള്‍ ഈ പേക്കൂത്തുകളൊന്നും ആര്‍ക്കും കാണേണ്ടി വന്നില്ല. രാജേഷ് കോടതിയില്‍ ഹാജരാകാനെത്തിയപ്പോള്‍ എം വി ജയരാജനും, എ എന്‍ ഷംസീറും പി കെ ശബരീഷുമടക്കം ഏതാനും പേര്‍ മാത്രമാണ് ഒപ്പമുണ്ടായിരുന്നത്. സി പി എമ്മിന്റെ കണ്ണൂരിലെ നേതാക്കളെ തൊട്ടാല്‍ പാര്‍ട്ടി തീപ്പന്തമാകുമെന്നും ജനങ്ങളെ അണിനിരത്തി നേരിടുമെന്നുമൊക്കെ പ്രഖ്യാപിച്ച പിണറായി വിജയനടക്കം കണ്ണൂരിലെ നേതാക്കള്‍ തീര്‍ത്തും അങ്കലാപ്പിലായിരിക്കെയാണ് ടി വി രാജേഷിന് കോടതി ജാമ്യം നല്‍കിയത്.
നേരത്തെ വിചാരണക്കോടതി രാജേഷിന്റെ ജാമ്യാപേക്ഷ തള്ളിയിരുന്നു. തുടര്‍ന്നാണ് അദ്ദേഹം ഹൈകോടതിയെ സമീപിച്ചത്. ഷുകൂര്‍ വധക്കേസിലെ 39-ാം പ്രതിയായ രാജേഷിന്റെ മുന്‍കൂര്‍ ജാമ്യാപേക്ഷ ഹൈകോടതി തള്ളിയതിനെ തുടര്‍ന്ന് അദ്ദേഹം കീഴടങ്ങുകയായിരുന്നു. ഷുകൂറിനെ വധിക്കാനുള്ള തീരുമാനത്തെക്കുറിച്ച് അറിവുണ്ടായിട്ടും മറച്ചുവെച്ചുവെന്നതാണ് രാജേഷിനെതിരെ ചുമത്തിയിരിക്കുന്ന കുറ്റം. എന്തൊക്കെയായാലും ഒടുവില്‍ ഓണമാഘോഷിക്കാന്‍ രാജേഷ് എം.എല്‍.എ പുറത്തെത്തിയതില്‍ അണികള്‍ അടക്കാനാവാത്ത സന്തോഷത്തിലാണ്.
-ജോസഫ് പ്രിയന്‍
Keywords : Kerala, Kannur, T.V Rajesh, CPM, Shukoor Death, High Court, P. Jayarajan, Onam, MLA, Celebration, Jail.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
