Farmers | 'വ്യാജ പേരില്‍ പാല്‍ അളന്നും സര്‍കാര്‍ സബ്‌സിഡി തട്ടിയെടുത്തും വൻതട്ടിപ്പ്'; ക്ഷീര സഹകരണ സംഘത്തിനെതിരെ കർഷകർ

കണ്ണൂര്‍: (www.kvartha.com) ക്ഷീരകര്‍ഷകരുടെ വ്യാജപേരില്‍ പാല്‍ അളന്നും സര്‍കാര്‍ സബ്‌സിഡി തട്ടിയെടുത്തും ക്ഷീരകര്‍ഷകര്‍ക്ക് അളന്ന പാലിന് ബില്‍ നല്‍കാതെയും ചെറുപുഴ ജോസ്ഗിരിയിലെ ക്ഷീരോത്പാദക സഹകരണ സംഘത്തില്‍ (ആപ്‌കോസ്) വന്‍തട്ടിപ്പ് നടത്തുന്നുവെന്ന പരാതിയുമായി ക്ഷീരോത്പാദക സഹകരണ സംഘത്തിലെ ഒരുവിഭാഗം ക്ഷീരകര്‍ഷകര്‍ രംഗത്തെത്തി. ഇതുസംബന്ധിച്ചു ക്ഷീരവികസനവകുപ്പ് ഡയറക്ടർക്ക് പരാതി നല്‍കിയിട്ടുണ്ടെന്നും ഇവര്‍ പറഞ്ഞു.
  
നേരത്തെ വകുപ്പ് മന്ത്രിക്ക് ആപ്‌കോസില്‍ നടക്കുന്ന ക്രമക്കേടുകളെ കുറിച്ചു രേഖാമൂലം പരാതി നല്‍കിയിട്ടുണ്ട്. മന്ത്രിതലത്തില്‍ ഇടപെടലുണ്ടായെങ്കിലും സഹകരണ സംഘം ഭരിക്കുന്ന സിപിഎം നേതാക്കള്‍ ഉദ്യോഗസ്ഥരെ സ്വാധീനിച്ച് നടപടി മരവിപ്പിച്ചിരിക്കുകയാണെന്ന് കര്‍ഷകര്‍ ആരോപിച്ചു. വീട്ടില്‍ പശുവില്ലാതിരുന്നവരും മാനദണ്ഡങ്ങള്‍ മറികടന്ന് ഈ സൊസൈറ്റിയില്‍ ഡയറക്ടര്‍മാരാണ്. സര്‍കാര്‍ സബ്‌സിഡി തട്ടിയെടുക്കകയാണ് ഇവരുടെ ലക്ഷ്യം. 51കര്‍ഷകരാണ്‌ നിലവില്‍ സൊസൈറ്റില്‍ പാലളക്കുന്നത്. എന്നാല്‍ ജെയ്‌സണ്‍ പി സേവ്യര്‍ എന്ന അംഗം മറ്റു അംഗങ്ങളുടെ വിവരങ്ങള്‍ ആരാഞ്ഞുകൊണ്ടുള്ള ഒരുവിവരാവകാശ അപേക്ഷ നല്‍കിയിരുന്നുവെങ്കിലും അതു നല്‍കാന്‍ തയ്യാറായിട്ടില്ല.