മലപ്പുറം: (KVARTHA) നമ്മുടെ നാടിന്റെ വികസനം സാധ്യമാകുന്നത് ജനങ്ങൾക്ക് ജീവിതം സുഖകരമാകുമ്പോഴാണ്. നാലര പതിറ്റാണ്ടിലേറെയായി അക്ബർ ട്രാവൽസ് ഗൾഫിൽ ജോലിക്ക് ആളുകളെ അയച്ചുകൊണ്ട് നമ്മുടെ സമ്പദ്‌വ്യവസ്ഥയെ ശക്തിപ്പെടുത്തിയിട്ടുണ്ട്. ഇന്ന് അവർ ചെറുപ്പക്കാരെ ജോലിക്കായി ഒരുക്കുന്ന പുതിയ പദ്ധതികൾ ആരംഭിച്ചിരിക്കുന്നു. ഇത്  രാജ്യത്തിന്റെ വികസനത്തിന് വളരെ പ്രധാനപ്പെട്ട ഒരു നാഴികക്കല്ലാണെന്നും അക്ബർ ട്രാവൽസിന്റെ  പ്രവർത്തനങ്ങൾ കേവലം ബിസിനസ് എന്നതിലുപരി രാജ്യനിർമിതിയുടെ ഭാഗമാണെന്നും പൊന്നാനി എംപി അബ്ദുസ്സമദ് സമദാനി പറഞ്ഞു. 

കുറ്റിപ്പുറത്ത് അക്ബർ എജ്യുവേൾഡ് എൽഎൽപിയുടെ കീഴിൽ പുതിയൊരു അക്കാദമി പ്രവർത്തനമാരംഭിക്കുന്ന ചടങ്ങിൽ സംസാരിക്കുകയായിരുന്നു അദ്ദേഹം. കുറ്റിപ്പുറം ബസ് സ്റ്റാൻഡിന് സമീപം, തൃശൂർ റോഡിലുള്ള നജാത്തുൽ ഇസ്‌ലാം സഭാ കോംപ്ലെക്സിലാണ് ഈ പുതിയ അക്കാദമി സ്ഥിതി ചെയ്യുന്നത്.

നാലര നൂറ്റാണ്ടിലേറെ കാലമായി ഇന്നും തുടരുന്ന ഗൾഫ് പ്രവാസമാണ് നമ്മൾ ഇന്ന് ഇത്രയും നന്നായി ജീവിക്കുന്നതിന്റെ അടിസ്ഥാനം. അക്ബർ ട്രാവൽസ് ഇതിൽ വലിയ പങ്കു വഹിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

അതേസമയം അക്ബർ എജ്യുവേൾഡ് കുറ്റിപ്പുറം ബ്രാഞ്ചിൽ ആദ്യഘട്ടത്തിൽ പ്രത്യേക ശ്രദ്ധ നൽകുന്ന കോഴ്സുകൾ ഇവയാണ്: രണ്ട് വർഷത്തെ എംബിഎ (ഏവിയേഷൻ ലോജിസ്റ്റിക്സ്) ഒപ്പം ഒരു വർഷത്തെ ഇന്റർനാഷണൽ ട്രാവൽ ആൻഡ് ടൂറിസം മാനേജ്‌മെന്റ്. ഇതിനു പുറമേ, ട്രാവൽ ആൻഡ് ടൂറിസം മാനേജ്‌മെന്റ്, ലോജിസ്റ്റിക്സ് ഓഫ് സപ്ലൈ ചെയിൻ മാനേജ്‌മെന്റ്, എയർലൈൻസ് ആൻഡ് എയർപോർട്ട് മാനേജ്‌മെന്റ്, ബി.കോം, എയർ കാർഗോ ആൻഡ് ലോജിസ്റ്റിക്സ് മാനേജ്‌മെന്റ്, അയാട്ടയുടെ (IATA) പാസഞ്ചർ ഗ്രൗണ്ട് സർവീസ് കോഴ്‌സുകൾ, സിആർഎസ് (CRS-അമാഡിയൂസ്, ഗലീലിയോ, സേബർ) പരിശീലനം, സോഫ്റ്റ് സ്കിൽ പരിശീലനം, ഫോറെക്സ് പരിശീലനം തുടങ്ങിയ നിരവധി കോഴ്‌സുകളും അക്ബർ അക്കാദമി ഓഫർ ചെയ്യുന്നുണ്ടെന്ന് അക്ബർ എജ്യുവേൾഡ് സിഇഒ നിഖിൽ കൃഷ്ണൻ പറഞ്ഞു.

ട്രാവൽ, ടൂറിസം, അനുബന്ധ മേഖലകളിൽ തൊഴിൽ നേടാൻ ആവശ്യമായ വിദ്യാഭ്യാസം നൽകുന്ന അക്ബർ അക്കാദമിയിൽ നിന്ന് പഠിച്ച ആയിരക്കണക്കിന് വിദ്യാർത്ഥികൾ ഇതിനോടകം തന്നെ ലോകപ്രശസ്തമായ വിവിധ എയർലൈനുകൾ, എയർപോർട്ടുകൾ, ട്രാവൽ ഏജൻസികൾ, ഹോട്ടലുകൾ എന്നിവിടങ്ങളിൽ ജോലി നേടിയിട്ടുണ്ടെന്നും നിഖിൽ കൃഷ്ണൻ അറിയിച്ചു.

പൊതുപ്രവർത്തകൻ പി.വി. അയൂബ് ചടങ്ങിൽ സ്വാഗതം ആശംസിച്ചു. ഹിലാൽ സ്‌കൂൾ പ്രിൻസിപ്പൽ ജോൺസൺ നന്ദിയറിയിച്ചു. കുറ്റിപ്പുറം പഞ്ചായത്ത് പ്രസിഡന്റ് നസീറ ഹനീഫ, വൈസ് പ്രസിഡന്റ് വേലായുധൻ തുടങ്ങിയവർ സംസാരിച്ചു. കോഴ്‌സുകളിൽ താത്പര്യമുള്ള വിദ്യാർത്ഥികൾ, ജീവനക്കാർ, നാട്ടുകാർ എന്നിവരടങ്ങുന്ന വലിയ ഒരു സദസ്സ് ചടങ്ങിന് സാക്ഷിയായി.

#ExpatEconomy #YouthDevelopment #AkbarAcademy #KeralaGrowth #NationBuilding #Education