അപേക്ഷിച്ച് 24 മണിക്കൂറിനുള്ളിൽ ബാർ ലൈസൻസ് നേടാം! മന്ത്രി അറിയാത്ത ബാർ ഭരണം! ഉദ്യോഗസ്ഥ മാഫിയയുടെ കയ്യിലോ കേരളത്തിന്റെ എക്സൈസ് വകുപ്പ്?

(KVARTHA) ഭരണചക്രത്തിന്റെ നിയന്ത്രണം കയ്യിലുണ്ടെന്ന് അവകാശപ്പെടുന്ന മന്ത്രിമാർ അറിഞ്ഞില്ലെങ്കിലും, സർക്കാരിന്റെ മൂക്കിനു താഴെ എക്സൈസ് ഫയലുകൾക്ക് ചിറക് മുളക്കുകയാണെന്ന് തെളിഞ്ഞിരിക്കുന്നു. സംസ്ഥാനത്ത് പുതിയ ബാർ ലൈസൻസുകൾ കൂട്ടത്തോടെ അനുവദിച്ചതുമായി ബന്ധപ്പെട്ട് ഉയർന്നുവന്ന പുതിയ വെളിപ്പെടുത്തലുകൾ കേരളത്തിലെ സിവിൽ സർവീസിന്റെയും ഭരണസംവിധാനങ്ങളുടെയും ദുരവസ്ഥയിലേക്കാണ് വിരൽ ചൂണ്ടുന്നത്. 

പുതിയ മദ്യനയം വരുന്നത് വരെ ഒരു ബാറിനും പുതുതായി ലൈസൻസ് നൽകില്ലെന്ന് എക്സൈസ് മന്ത്രി എം ലിജു പരസ്യമായി പ്രഖ്യാപിച്ചിരിക്കെയാണ്, മന്ത്രിയെപ്പോലും ഇരുട്ടിൽ നിർത്തി ഉദ്യോഗസ്ഥർ ഒന്നര ഡസനോളം അപേക്ഷകളിൽ അതിവേഗ തീരുമാനമെടുത്ത് ലൈസൻസ് വച്ചുനീട്ടിയത്. 

എറണാകുളം, കോട്ടയം, പത്തനംതിട്ട മേഖലകളിലും നെടുമ്പാശ്ശേരി വിമാനത്താവളത്തിലെ ഡൊമസ്റ്റിക് ലോഞ്ചിലുമെല്ലാം ഒന്നിനു പിറകെ ഒന്നായി ലൈസൻസുകൾ നൽകപ്പെട്ടത് ഉദ്യോഗസ്ഥർ തന്നിഷ്ടപ്രകാരം എടുത്ത തീരുമാനമാണെന്ന് സർക്കാർ പറയുമ്പോൾ പൊതുസമൂഹം ചോദിക്കുന്ന ലളിതമായ ചോദ്യമുണ്ട്: ഭരണം നടത്തുന്നത് ജനങ്ങൾ തിരഞ്ഞെടുത്ത മന്ത്രിമാരോ അതോ വകുപ്പിലെ ഉന്നത ഉദ്യോഗസ്ഥരോ?

ഇരുട്ടിലെ കച്ചവടം

മദ്യനയം വരുംമുമ്പ് സംസ്ഥാനത്ത് പുതിയ ബാറുകൾ അനുവദിക്കില്ലെന്നത് മന്ത്രിയുടെ നയപരമായ നിലപാടായിരുന്നു. എന്നാൽ വകുപ്പുതലത്തിൽ സൂക്ഷ്മ പരിശോധന നടത്തി അപേക്ഷകളിൽ നടപടിയെടുക്കാൻ എക്സൈസ് ഡെപ്യൂട്ടി കമ്മിഷണർമാർക്കും കമ്മിഷണർമാർക്കും മുൻകാലങ്ങളിൽ നൽകിയിട്ടുള്ള അധികാരം ദുരുപയോഗം ചെയ്താണ് ഈ നടപടി. 

അപേക്ഷ സമർപ്പിച്ച് 24 മണിക്കൂറിനുള്ളിൽ അടിയന്തര അനുമതി നൽകിയ സന്ദർഭങ്ങൾ വരെ റിപ്പോർട്ട് ചെയ്യപ്പെട്ടിട്ടുണ്ട്. സാാരണക്കാരന്റെ ഒരു സർട്ടിഫിക്കറ്റിനായി മാസങ്ങളോളം ഫയലുകൾ ചുവപ്പുനാടയിൽ കുടുങ്ങിക്കിടക്കുന്ന നാട്ടിലാണ് ബാർ ലൈസൻസ് ഫയലുകൾ പ്രകാശവേഗതയിൽ നീങ്ങിയതെന്നത് ഭരണസംവിധാനത്തിന്റെ ജീർണത വ്യക്തമാക്കുന്നു.

മന്ത്രിയെയും സർക്കാരിനെയും അറിയിക്കാതെ ഉദ്യോഗസ്ഥ തലത്തിൽ എടുത്ത ഇത്തരം തീരുമാനങ്ങൾക്ക് പിന്നിൽ കോടികളുടെ അഴിമതി നടന്നിട്ടുണ്ടെന്ന സംശയമാണ് സാമൂഹ്യ മാധ്യമങ്ങളിൽ ഉയരുന്നത്. അപേക്ഷ നൽകി ഒന്നു രണ്ടു ദിവസത്തിനുള്ളിൽ അനുമതി നൽകാൻ എന്ത് അടിയന്തര സാഹചര്യമാണ് ഇവിടെയുണ്ടായിരുന്നത്?

സർക്കാരിന്റെ നയപരമായ തീരുമാനങ്ങളെ വെല്ലുവിളിച്ചുകൊണ്ട് ഉദ്യോഗസ്ഥർ സ്വന്തം നിലയ്ക്ക് ഇത്തരം ഉത്തരവുകൾ ഇറക്കുമ്പോൾ അതിനു പിന്നിലെ സാമ്പത്തിക ബന്ധം വിജിലൻസ് അന്വേഷണത്തിലൂടെ വ്യക്തമാകേണ്ടതുണ്ട്. 

കൈകഴുകൽ നാടകം

വിവാദം കൊടുമ്പിരിക്കൊണ്ടതോടെ എറണാകുളം ഡെപ്യൂട്ടി കമ്മിഷണർ പി കെ. സതീഷ്, കോട്ടയം ജില്ലയുടെ ചുമതലയുണ്ടായിരുന്ന പത്തനംതിട്ട ഡെപ്യൂട്ടി കമ്മിഷണർ പി എൽ. ഷിബു എന്നിവരെ സസ്പെൻഡ് ചെയ്ത് സർക്കാർ തടിയൂരാൻ ശ്രമിക്കുകയാണ്. എക്സൈസ് കമ്മിഷണറോട് വിശദീകരണം ചോദിക്കുകയും വകുപ്പുതല വിജിലൻസ് അന്വേഷണത്തിന് ഉത്തരവിടുകയും ചെയ്തിട്ടുണ്ട്. എന്നാൽ ഈ നടപടികളിലൂടെ മാത്രം സർക്കാരിന് പങ്ക് ഒഴിഞ്ഞുമാറാനാകുമോ? 

മന്ത്രി അറിയാതെയാണ് കാര്യങ്ങൾ നടന്നതെന്ന വാദം  ഉത്തരവാദിത്തങ്ങളിൽ നിന്നുള്ള തടിയൂരിയുള്ള ഒളിച്ചുകളിയെയോ ആണ് സൂചിപ്പിക്കുന്നത്?
മുൻ എക്സൈസ് മന്ത്രി എം ബി രാജേഷ് അടക്കമുള്ള പ്രതിപക്ഷ നേതാക്കൾ ഉന്നയിച്ച വിമർശനങ്ങൾ ഈ ഘട്ടത്തിൽ പ്രസക്തമാണ്. മദ്യനയം വരുന്നത് വരെ ബാർ ലൈസൻസ് നൽകുന്നത് തടയാൻ എക്സൈസ് വകുപ്പ് എന്തുകൊണ്ട് രേഖാമൂലമുള്ള ഭരണ ഉത്തരവ് ഇറക്കിയില്ല എന്ന ചോദ്യത്തിന് മറുപടിയില്ല. 

മന്ത്രിയുടെ നിർദ്ദേശം കേവലം വാക്കാലുള്ളതായിരുന്നുവെങ്കിൽ, ചട്ടപ്രകാരം ലൈസൻസ് അനുവദിച്ച ഉദ്യോഗസ്ഥരെ മാത്രം ബലി നൽകി യഥാർത്ഥ സൂത്രധാരന്മാരെ സംരക്ഷിക്കാൻ ശ്രമിക്കുകയാണോ എന്ന സംശയം ജനങ്ങളിൽ ശക്തമാകുന്നു.

അഴിമതിയുടെ വേരുകൾ

മുൻ സർക്കാരിന്റെ കാലത്തുണ്ടായ ചട്ടഭേദഗതികളും ഉദ്യോഗസ്ഥർക്ക് നൽകിയ അനാവശ്യ അധികാരങ്ങളുമാണ് ഇപ്പോഴത്തെ പ്രതിസന്ധിക്ക് കാരണമെന്ന് മുഖ്യമന്ത്രി വി ഡി സതീശനും ഭരണപക്ഷവും സ്ഥാപിക്കാൻ ശ്രമിക്കുന്നുണ്ട്. എന്നാൽ അധികാരമേറ്റ് മാസങ്ങൾ കഴിഞ്ഞിട്ടും ഭരണപരമായ പോരായ്മകൾ തിരുത്താനോ ഇത്തരം സുപ്രധാന തീരുമാനങ്ങൾ മന്ത്രിതലത്തിലേക്ക് മാത്രമായി ചുരുക്കുന്ന ഭേദഗതികൾ വരുത്താനോ സർക്കാർ മുതിർന്നില്ല എന്നത് വീഴ്ച തന്നെയാണ്. 

മുൻ സർക്കാരിന്റെ നയപരമായ തീരുമാനങ്ങളുടെ മറപിടിച്ച് ഉദ്യോഗസ്ഥർ അഴിമതിക്ക് വഴിയൊരുക്കുമ്പോൾ അത് കണ്ടില്ലെന്ന് നടിക്കാൻ ഭരിക്കുന്നവർക്ക് കഴിയില്ല.
വകുപ്പുകളിൽ ഭരണം നിയന്ത്രിക്കുന്നത് ഉദ്യോഗസ്ഥ മാഫിയകളാണോ എന്ന് സംശയിക്കേണ്ടിയിരിക്കുന്നു. വിജിലൻസ് അന്വേഷണം പ്രഖ്യാപിച്ചതുകൊണ്ട് മാത്രം ചോദ്യങ്ങൾ അവസാനിക്കുന്നില്ല. ഏതാനും താഴെത്തട്ടിലെ ഉദ്യോഗസ്ഥരെ സസ്പെൻഡ് ചെയ്ത് വിഷയം തണുപ്പിക്കാനാണ് നീക്കമെങ്കിൽ അത് അഴിമതിക്ക് കൂടുതൽ വളം വെച്ചുനൽകുകയേ ഉള്ളൂ. 

ലൈസൻസ് നേടാൻ ഹോട്ടലുടമകൾ നൽകിയ തുകയെത്ര, അതിൽ ആർക്കൊക്കെ പങ്കുണ്ട്, ഏതൊക്കെ ഉന്നത തലങ്ങളിലേക്ക് ഈ പണം ഒഴുകി എന്ന കാര്യങ്ങൾ പുറത്തുവരണം.

തകരുന്ന വിശ്വാസ്യത

സംസ്ഥാനത്ത് ജനാധിപത്യപരമായ ഭരണസംവിധാനങ്ങളുടെ തകർച്ചയാണ് ഈ സംഭവം വരച്ചുകാട്ടുന്നത്. വകുപ്പ് മന്ത്രിയുടെയോ സർക്കാരിന്റെയോ അനുമതിയില്ലാതെ കോടികളുടെ സാമ്പത്തിക മൂല്യമുള്ള ഉത്തരവുകൾ ഇറക്കാൻ ഉദ്യോഗസ്ഥർ ധൈര്യം കാണിക്കുന്നുവെങ്കിൽ, അവിടെ ഭരണ നേതൃത്വത്തിന്റെ ആജ്ഞാശക്തി ചോദ്യം ചെയ്യപ്പെടുകയാണ്. 

സിവിൽ സർവീസ് ഓഫീസർമാർ സർക്കാരിന് മുകളിലാണെന്ന അവസ്ഥ വരുന്നത് അപകടകരമായ സന്ദേശമാണ് നൽകുന്നത്. ജനങ്ങളോട് മറുപടി പറയേണ്ടത് ഉദ്യോഗസ്ഥരല്ല, മറിച്ചു ജനാധിപത്യപരമായി തിരഞ്ഞെടുക്കപ്പെട്ട ജനപ്രതിനിധികളാണ്.

ഉദ്യോഗസ്ഥ തലത്തിലെ അഴിമതി തടയാനും നയപരമായ തീരുമാനങ്ങളിൽ സർക്കാരിന് സമ്പൂർണ നിയന്ത്രണം ഉറപ്പാക്കാനും അടിയന്തര നിയമനിർമ്മാണവും ചട്ടഭേദഗതിയും അത്യാവശ്യമാണ്. 

ചട്ടങ്ങളിലെ പഴുതുകൾ മുതലെടുക്കാൻ ഉദ്യോഗസ്ഥർക്ക് അവസരമൊരുക്കുന്ന സംവിധാനങ്ങൾ പൊളിച്ചെഴുതണം. അല്ലാത്തപക്ഷം, വകുപ്പ് മന്ത്രിമാർ കേവലം നോക്കുകുത്തികളായും ഉദ്യോഗസ്ഥർ ഭരിക്കുന്ന സ്ഥിതിയുമായി മാറും. ഈ ബാർ ലൈസൻസ് വിവാദം നൽകുന്ന മുന്നറിയിപ്പ് അതിരൂക്ഷമാണ്; തങ്ങളുടെ നിയന്ത്രണത്തിലല്ലാത്ത വകുപ്പുകൾ ഭരിക്കുന്ന മന്ത്രിമാർ ജനത്തിന് മുന്നിൽ ഉണ്ടാക്കുന്ന അപമാനം ചെറുതല്ല.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Two excise officials suspended in Kerala for issuing bar licenses without the minister's knowledge.

#Kvartha #KeralaPolitics #ExciseDepartment #BarLicenseControversy #KeralaNews #PoliticalNewsMalayalam #SobhaNews