'പരാതി പറയാന് വിളിച്ചപ്പോള് അസി.കമീഷണര് തന്നോട് പൊട്ടിത്തെറിച്ചു'; ഒരു മുന് ഡിജിപിയുടെ അവസ്ഥ ഇതാണെങ്കില് സാധാരണക്കാരുടെ അവസ്ഥയെന്തായിരിക്കുമെന്ന് ആര് ശ്രീലേഖ
Dec 11, 2021, 16:26 IST
ADVERTISEMENT
തിരുവനന്തപുരം: (www.kvartha.com 11.12.2021) കേരള പൊലീസിനെതിരെ പരാതിയുമായി മുന് ഡിജിപി ആര് ശ്രീലേഖ. ഒരു വീട്ടമ്മയുടെ പരാതിയെക്കുറിച്ച് അറിയിക്കാന് പൊലീസിനെ ബന്ധപ്പെട്ടപ്പോള് വളരെ മോശം അനുഭവമാണ് തനിക്കുണ്ടായതെന്നും ശംഖുമുഖം എസിപി തന്നോട് ഫോണിലൂടെ പൊട്ടിത്തെറിച്ചെന്നും അവര് പറഞ്ഞു.
പൊട്ടിത്തെറിച്ച എസിപി സ്വന്തം പേര് വെളിപ്പെടുത്തി സംസാരിക്കാന് പോലും അദ്ദേഹം തയ്യാറായില്ലെന്നും ശ്രീലേഖ കുറിച്ചു. എസിപിയുടെ ഈ പെരുമാറ്റത്തെ കുറിച്ച് പരാതിപ്പെടാന് ഞാന് ക്രമസമാധാനചുമതലയുള്ള എഡിജിപിയെ ഫോണില് വിളിച്ചെങ്കിലും കോള് എടുത്തില്ലെന്നും അവര് പറയുന്നു.
ഫേസ്ബുകിലൂടെയാണ് ശ്രീലേഖ പരാതിയുമായി രംഗത്തെത്തിയത്. ഒരു മുന്ഡിജിപിയുടെ അവസ്ഥ ഇതാണെങ്കില് സാധാരണക്കാരുടെ അവസ്ഥയെന്തായിരിക്കുമെന്നും ശ്രീലേഖ ചോദിക്കുന്നു. ഫേസ്ബുക് ഫ്രണ്ട്സിന് മാത്രം വായിക്കാവുന്ന രീതിയിലാണ് ശ്രീലേഖ ഫേസ്ബുക് പോസ്റ്റ് പബ്ലിഷ് ചെയ്തിരിക്കുന്നത്.
ശ്രീലേഖയുടെ ഫേസ്ബുക് പോസ്റ്റ്:
എന്തുകൊണ്ടാണ് പോലീസിന് ഇത്രയും ചീത്തപ്പേരുണ്ടായത്? തിരുവനന്തപുരം ശംഖുമുഖം അസി.കമീഷണറില് നിന്നും എനിക്കും വളരെ മോശം അനുഭവമാണുണ്ടായത്. ലിജി എന്ന സാധാരണക്കാരിയായ സ്ത്രീ സഹായം തേടി എന്നെ വിളിച്ചിരുന്നു. വളരെ മോശം അവസ്ഥയിലാണ് അവളെന്റെ സഹായം തേടിയത്. പല സ്ത്രീകളേയും പോലെ ആത്മഹത്യയുടെ വക്കിലായിരുന്നു അവള്.
ഭയാനകമായ പീഡനങ്ങളാണ് അവള് നേരിട്ടത്. വലിയതുറ പൊലീസ് സ്റ്റേഷന്, വനിതാ സെല് മറ്റു ചില പോലീസ് ഓഫീസുകള്. അവരെല്ലാം അവളെ ഭീഷണിപ്പെടുത്തി. സ്വന്തം കുഞ്ഞുമായി ഭര്ത്താവിന്റെ വീടൊഴിയാനാണ് പൊലീസുകാര് അവളോട് ആവശ്യപ്പെട്ടത്. ഈ വിഷയത്തെക്കുറിച്ച് സംസാരിക്കാനായി ശംഖുമുഖം അസി.കമീഷണറെ വിളിച്ചപ്പോള് അയാള് എന്നോട് ഫോണിലൂടെ പൊട്ടിത്തെറിക്കുകയാണ് ചെയ്തത്.
സ്വന്തം പേര് വെളിപ്പെടുത്തി സംസാരിക്കാന് പോലും അദ്ദേഹം തയ്യാറായില്ല. ഈ വിഷയത്തില് ഞാന് പൊലീസിനെ പിന്തുണയ്ക്കുകയാണ് വേണ്ടതെന്ന് അയാള് എന്നോട് പറഞ്ഞു. ഇങ്ങനെയുള്ള സ്ത്രീകള് പറയുന്ന കഥകള് കേട്ട് തന്നെ പോലെയുള്ള ഉദ്യോഗസ്ഥരെ വിളിക്കരുതെന്നും എസിപി എന്നോട് ആവശ്യപ്പെട്ടു.
എസിപിയുടെ ഈ പെരുമാറ്റത്തെ കുറിച്ച് പരാതിപ്പെടാന് ഞാന് ക്രമസമാധാനചുമതലയുള്ള എഡിജിപിയെ ഫോണില് വിളിച്ചെങ്കിലും അദ്ദേഹം എന്റെ കോള് എടുത്തില്ല. കാര്യങ്ങള് വിശദീകരിച്ച് അദ്ദേഹത്തിന് ഞാനൊരു എസ്എംഎസ് അയച്ചു. എന്താണ് എഡിജിപി ചെയ്യുന്നത് എന്ന് നോക്കാം.... പാവം ലിജി... ആത്മഹത്യ മാത്രമായിരിക്കുമോ ഇനി അവള്ക്കുള്ള ഏകവഴി എന്നാണ് എന്റെ ആശങ്ക.
നിങ്ങളുടെ അഭിപ്രായങ്ങൾ കെവാർത്തയുടെ ഫെയ്സ്ബുക്ക് പേജിൽ പങ്കുവെക്കാം.
അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ
ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന
നിയമനടപടികൾ നേരിടേണ്ടിവന്നേക്കാം.
