വന്ദേഭാരത് നിർമാണത്തിൽ കൂടുതൽ ശ്രദ്ധ; എറണാകുളം-കൊല്ലം മെമുവിൽ കോച്ചുകൾ കുറച്ചു, യാത്രക്കാർക്ക് ദുരിതം

കൊല്ലം: (KVARTHA) കോച്ചുകൾ വെട്ടിക്കുറച്ചതോടെ എറണാകുളം-കൊല്ലം മെമു സർവീസിൽ യാത്രക്കാർക്ക് നിൽക്കാനിടമില്ലാത്ത തിരക്ക്. വൈകിട്ട് 5.40ന് കോട്ടയത്തു നിന്നു കൊല്ലത്തേക്കുള്ള യാത്രയിലാണ് വലിയ തിരക്കനുഭവപ്പെടുന്നത്. രണ്ടാഴ്‌ചയായി വെറും എട്ട് കോച്ചുമായാണ് മെമു സർവീസ് നടത്തുന്നത്. ഇത് യാത്രക്കാർക്ക് വലിയ ദുരിതമാകുകയാണ്.

ദുരിതമായി കോച്ചുകളുടെ കുറവ്

12 കോച്ചുകളായിരുന്നു നേരത്തെ ഈ മെമുവിനുണ്ടായിരുന്നത്. കോട്ടയം വിട്ടാൽ ചെങ്ങന്നൂർ മുതൽ തിരക്ക് വർധിക്കുകയാണ്. പിന്നീടിങ്ങോട്ടുള്ള സ്റ്റേഷനുകളിൽ നിന്നു കൂടി യാത്രക്കാർ കയറുന്നതോടെ നിൽക്കാൻ പോലും ഇടമില്ലാത്ത സ്ഥിതിയാണുള്ളത്. ദിവസേന മെമുവിനെ ആശ്രയിക്കുന്ന സ്ഥിരം യാത്രക്കാരാണ് ഇതിൽ ഭൂരിഭാഗം പേരും.

അറ്റകുറ്റപ്പണിക്കും ബുദ്ധിമുട്ട്

കാലപ്പഴക്കം മൂലം കൊല്ലത്തു നിന്നുള്ള മെമു സർവീസുകൾക്ക് അറ്റകുറ്റപ്പണി പതിവാണ്. ഇപ്പോൾ അറ്റകുറ്റപ്പണിക്കായി പാലക്കാട് കൊണ്ടുപോയിരിക്കുന്ന കോച്ചുകൾ വൈകാതെ തിരിച്ചെത്തുമെന്ന പ്രതീക്ഷയിലാണ് കൊല്ലത്തെ മെമു സർവീസിൻ്റെ ചുമതലയുള്ളവർ. പാലക്കാട് നിന്ന് എൻജിനുകൾ തിരിച്ചെത്തിയാൽ ഇവിടെയുള്ള കോച്ചുകളുമായി ബന്ധിപ്പിച്ച് വീണ്ടും 12 കോച്ചുമായി സർവീസ് പുനരാരംഭിക്കാനാകും.

വന്ദേഭാരത് നിർമാണത്തിൽ കൂടുതൽ ശ്രദ്ധ റെയിൽവേ നൽകുന്നതോടെ മെമു കോച്ചുകൾ പുതിയത് നിർമിക്കുന്നില്ലെന്നതാണ് പ്രധാന പ്രശ്‌നം. കാലപ്പഴക്കം വന്ന മെമുവാണ് കൊല്ലം-എറണാകുളം റൂട്ടിൽ സർവീസ് നടത്തുന്നത്. എൻജിൻ്റെ മോട്ടറുകൾ കേടായതിന് പുറമെ കോച്ചുകൾക്കുള്ള അറ്റകുറ്റപ്പണിയും പതിവാണ്. ബോഗികളുടെ വീലുകൾക്ക് ഉണ്ടാകുന്ന ചെറിയ തകരാർ പോലും പരിഹരിക്കാൻ കൊല്ലത്ത് നിലവിൽ സൗകര്യമില്ല. കൊച്ചുവേളിയിലും എറണാകുളത്തും തിരക്കൊഴിയുമ്പോഴാണ് വീൽ ടേണിങ് നടത്താൻ കഴിയുന്നത്. ഇതിനായി ബോഗികൾ ദിവസങ്ങളോളം കയറ്റിയിടേണ്ടിവരും. ഈ ദിവസങ്ങളിൽ ബോഗി കുറയുന്നത് യാത്രക്കാരെയാണ് ബുദ്ധിമുട്ടിലാക്കുന്നത്.

റെയിൽവേ മന്ത്രിയെ കണ്ട് കൊടിക്കുന്നിൽ സുരേഷ് എംപി

യാത്രക്കാരുടെ ദുരിതം ചൂണ്ടിക്കാട്ടി പാർലമെൻ്റ് സമ്മേളനത്തിനിടെ കേന്ദ്ര റെയിൽവേ മന്ത്രി അശ്വിനി വൈഷ്ണവിനെ കൊടിക്കുന്നിൽ സുരേഷ് എംപി സന്ദർശിച്ച് പ്രശ്നം ശ്രദ്ധയിൽപ്പെടുത്തി. തിരുവനന്തപുരം റെയിൽവേ ഡിവിഷനിലെ ഒരു മെമു റേക്കിൻ്റെ സാങ്കേതിക തകരാറാണ് നിലവിൽ കോച്ചുകളുടെ എണ്ണം എട്ടായി ചുരുങ്ങാൻ കാരണമായതെന്നും, ഡിവിഷൻ്റെ കീഴിൽ ആവശ്യമായ സ്പെയർ റേക്ക് ഇല്ലാത്തതാണ് പ്രതിസന്ധി രൂക്ഷമാക്കിയതെന്നും അദ്ദേഹം ചൂണ്ടിക്കാട്ടി.

നിലവിലെ പ്രതിസന്ധിക്ക് ശാശ്വത പരിഹാരം കാണുന്നതിനായി തിരുവനന്തപുരം റെയിൽവേ ഡിവിഷന് അടിയന്തരമായി ഒരു സ്പെയർ മെമു റേക്ക് അനുവദിക്കണമെന്നും, കോച്ചുകളുടെ എണ്ണം പുനഃസ്ഥാപിച്ച് യാത്രക്കാരുടെ ദുരിതത്തിന് അറുതി വരുത്തണമെന്നും അദ്ദേഹം മന്ത്രിയോട് ആവശ്യപ്പെട്ടു.

പ്രാദേശിക വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Ernakulam-Kollam MEMU passengers face severe hardship as coaches are reduced from 12 to 8.

#IndianRailways #MEMUTrain #ErnakulamKollamMEMU #VandeBharat #KodikunnilSuresh #AshwiniVaishnaw #KeralaNews #MalayalamNews #AnjanaNews