പ്രതിസന്ധിയിൽ ഇൻഡിഗോയ്ക്ക് പിന്തുണ; വിമാനക്കമ്പനികളുടെ കൊള്ള കേന്ദ്രത്തിൻ്റെ വീഴ്ചയെന്ന് ഇ പി ജയരാജൻ

കണ്ണൂർ: (KVARTHA) തനിക്കെതിരെ യാത്രാ വിലക്ക് ഏർപ്പെടുത്തിയതിന് പ്രതിഷേധം സംഘടിപ്പിച്ചതുകൊണ്ട് ഇൻഡിഗോ വിമാനക്കമ്പനി നശിക്കണമെന്ന് ആഗ്രഹിക്കുന്നില്ലെന്ന് സി.പി.എം കേന്ദ്ര കമ്മിറ്റിയംഗം ഇ പി ജയരാജൻ. ഇന്ന് ഇൻഡിഗോ വിമാനക്കമ്പനി വലിയ പ്രതിസന്ധിയിലാണ്. ഈ സമയത്ത് അവരുടെ മേൽ കല്ലെടുത്തുവെയ്ക്കാൻ താനില്ലെന്നും ഇ പി ജയരാജൻ മാധ്യമങ്ങളോട് പ്രതികരിച്ചു. വിമാനക്കമ്പനിയുടെ സർവീസുകൾ നല്ല നിലയിൽ മുന്നോട്ട് പോകണമെന്നാണ് തന്റെ ആഗ്രഹമെന്നും അദ്ദേഹം കൂട്ടിച്ചേർത്തു.

ഇൻഡിഗോ നല്ല വിമാന സർവ്വീസാണ് നടത്തുന്നതെന്നും, ആയിരക്കണക്കിന് ആളുകളുടെ ജോലിയാണ് ആ സ്ഥാപനത്തെ ആശ്രയിച്ചുള്ളതെന്നും അദ്ദേഹം ചൂണ്ടിക്കാട്ടി. പ്രതിഷേധം ഉള്ളതുകൊണ്ട് മാത്രം ഒരു വിമാന കമ്പനി നശിക്കണം എന്നാഗ്രഹിക്കുന്നില്ലെന്ന് ഇ പി ജയരാജൻ വ്യക്തമാക്കി. കഴിഞ്ഞ തവണയുണ്ടായ പ്രശ്നത്തിന്റെ അടിസ്ഥാനത്തിൽ താൻ ഇൻഡിഗോയുടെ നിലപാടിനെ വിമർശിച്ചിരുന്നു. അതിന്റെ ഭാഗമായി കുറച്ചുകാലം ഇൻഡിഗോയിൽ യാത്ര ചെയ്യില്ലെന്ന് തീരുമാനിച്ചിരുന്നതായും അദ്ദേഹം ഓർമ്മിച്ചു.

യാത്രാ വിലക്കിന് ശേഷമുള്ള യാത്ര

തനിക്ക് യാത്രാ വിലക്ക് ഏർപ്പെടുത്തി കുറച്ചുകാലത്തിന് ശേഷം, സീതാറാം യെച്ചൂരി അന്തരിച്ചപ്പോൾ അവിടെ പോകേണ്ടത് ഏറ്റവും ആവശ്യമായിരുന്നു. ആ സമയത്താണ് കോഴിക്കോട് നിന്നും താൻ ഇൻഡിഗോയിൽ വീണ്ടും യാത്ര ചെയ്തതെന്നും ഇ പി ജയരാജൻ വിശദീകരിച്ചു. അതിന് ശേഷവും ഇൻഡിഗോയിൽ യാത്ര ചെയ്തിട്ടുണ്ട്. താൻ ഇൻഡിഗോയുടെ നിലപാടിനെ വിമർശിച്ചിരുന്നു എന്നല്ലാതെ, ഈ കമ്പനി നശിക്കണം എന്നാഗ്രഹിക്കുന്നില്ലെന്ന് അദ്ദേഹം ഉറപ്പിച്ചു പറഞ്ഞു.

വിമാനക്കമ്പനികളുടെ വീഴ്ച കേന്ദ്രത്തിന്റേത്

ഇൻഡിഗോ മാത്രമല്ല, ഇവിടെ എയർസർവ്വീസ് നടത്തുന്നതിൽ പൊതുവായി വലിയ വീഴ്ചയുണ്ടെന്നും അദ്ദേഹം അഭിപ്രായപ്പെട്ടു. ഇൻഡിഗോ പോലുള്ള വിമാനസർവ്വീസുകൾ റദ്ദാക്കി എത്ര യാത്രക്കാരെയാണ് ബുദ്ധിമുട്ടിക്കുന്നത് എന്നും അദ്ദേഹം ചോദിച്ചു. വിമാനക്കമ്പനികൾക്ക് ഇഷ്ടംപോലെ ചെയ്യാൻ എങ്ങനെയാണ് സാധിക്കുന്നത്? അത് സർക്കാരിന്റെ വീഴ്ചയാണെന്നും ഇ പി ജയരാജൻ കുറ്റപ്പെടുത്തി.

സീസൺ വന്നാൽ വൻകൊള്ളയാണ് വിമാനക്കമ്പനികൾ നടത്തുന്നത്. ഇഷ്ടംപോലെ വിമാനകമ്പനികൾക്ക് ചാർജ് ഈടാക്കാൻ എങ്ങനെയാണ് സാധിക്കുന്നത്. യാത്രക്കാരെ ചൂഷണം ചെയ്യുന്നത് കേന്ദ്ര സർക്കാരിന്റെയും വ്യോമയാന വകുപ്പിന്റെയും വീഴ്ചയാണെന്നും ഇ പി ജയരാജൻ വിമർശിച്ചു. വിമാനക്കമ്പനികളുടെ പ്രവർത്തനങ്ങളിൽ കേന്ദ്രം ശക്തമായ ഇടപെടൽ നടത്തേണ്ടതുണ്ടെന്നും അദ്ദേഹം ആവശ്യപ്പെട്ടു.

ഇൻഡിഗോ പ്രതിസന്ധിയെക്കുറിച്ചുള്ള ഇ പി ജയരാജൻ്റെ നിലപാട് നിങ്ങൾ അംഗീകരിക്കുന്നുണ്ടോ? അഭിപ്രായം പങ്കുവെക്കുക.

Article Summary: E P Jayarajan supports IndiGo during crisis; blames central government for high fares and service lapses.

#EPJayarajan #IndiGo #AviationCrisis #CentralGovt #AirfareHike #CPM