EP Jayarajan | ആരോപണങ്ങള്‍ സ്ത്രീത്വത്തെ അപമാനിക്കുന്നു; മുഖ്യമന്ത്രിയുടെ മകള്‍ വീണാ വിജയനെ പിന്‍തുണച്ച് ഇ പി ജയരാജന്‍

കണ്ണൂര്‍: (KVARTHA) മുഖ്യമന്ത്രിയുടെ മകള്‍ വീണാ വിജയനെ പിന്‍തുണച്ച് എല്‍ ഡി എഫ് കണ്‍വീനര്‍ ഇ പി ജയരാജന്‍ രംഗത്തെത്തി. വീണയ്‌ക്കെതിരെയുള്ള ആരോപണങ്ങള്‍ സ്ത്രീത്വത്തെ അപമാനിക്കുന്നതാണെന്ന് ഇ പി ജയരാജന്‍ വ്യക്തമാക്കി.

ജവഹര്‍ ഓഡിറ്റോറിയത്തില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഒരു പാവം പെണ്‍കുട്ടിയുടെ ജീവിതം ഹോമിക്കുന്നതിനാണ് മാധ്യമങ്ങള്‍ ചെയ്യുന്നത്. കഴിവും പ്രാപ്തിയുമുള്ള സ്വയം സംരംഭകരാണവരെന്നും ഇ പി ജയരാജന്‍ പറഞ്ഞു.

പ്രധാനമന്ത്രിയെ മുഖ്യമന്ത്രി സ്വീകരിക്കാന്‍ പോയതിനെ കുറിച്ച് നിലവാരം കുറഞ്ഞ പ്രസ്താവനയാണ് പ്രതിപക്ഷ നേതാവ് വി ഡി സതീശന്‍ പറഞ്ഞത്. രണ്ടു കംപനികളിലായി 4000 കോടിയുടെ മൂന്ന് പദ്ധതികളാണ് കൊച്ചി കപ്പല്‍ നിര്‍മാണശാലയില്‍ വന്നത്. പ്രധാനമന്ത്രിയെ സ്വീകരിക്കാന്‍ പോയില്ലെങ്കില്‍ അതിനും കുറ്റം പറയും. ഭരിക്കുന്നവരുടെ ചുമതലയാണ് പ്രധാനമന്ത്രിയെ സ്വീകരിക്കല്‍.

കൊച്ചി കപ്പല്‍ നിര്‍മാണശാല ഇന്ദിരാ ഗാന്ധി പ്രധാനമന്ത്രിയായ കാലത്ത് ഇടതുപക്ഷം സമരം ചെയ്തു നേടിയെടുത്തതാണ്. രജിസ്ട്രാര്‍ ഓഫ് കംപനീസിന് മുഖ്യമന്ത്രിയെ കുറിച്ചു പറയാന്‍ അവകാശമില്ല. അവര്‍ കംപനിയുടെ ആദായ നികുതികള്‍ മാത്രം നോക്കേണ്ട കംപനിയാണ്. രാഷ്ട്രീയം പറയാനുള്ള അവകാശം അവര്‍ക്കില്ല. മാധ്യമങ്ങള്‍ തെറ്റായ പ്രചരണങ്ങള്‍ നടത്തുന്നത്. ഒരു പെണ്‍കുട്ടിയെ കേരളത്തില്‍ ജീവിക്കാന്‍ അനുവദിക്കാത്ത സാഹചര്യമാണ് സൃഷ്ടിക്കുന്നത്. ആര്‍ ഒ സി റിപോര്‍ടില്‍ വസ്തുതയുണ്ടോ? ആരാണ് ആ റിപോര്‍ട് കണ്ടിട്ടുള്ളതെന്നും ഇ പി ജയരാജന്‍ ചോദിച്ചു.