എന്‍ഡോസള്‍ഫാന്‍: സര്‍ക്കാര്‍ ഉത്തരവ് തിരുത്തണം: പി. കരുണാകരന്‍
Sep 1, 2012, 15:48 IST
ദുരന്തബാധിതര്‍ക്ക് കേന്ദ്ര മനുഷ്യാവകാശ കമീഷന് നിര്‍ദേശിച്ച സാമ്പത്തിക സഹായം നല്‍കുന്നതിന് സര്‍ക്കാര്‍ ഇറക്കിയ ഉത്തരവിലാണ് ഇക്കാര്യം വ്യക്തമാക്കിയിട്ടുള്ളത്. നിലവില്‍ കിട്ടിക്കൊണ്ടിരിക്കുന്ന 2000, 1000 രൂപ പെന്‍ഷന്‍ അഞ്ചുവര്‍ഷം കഴിഞ്ഞാലും തുടരണം. ഉത്തരവ് പ്രകാരം അഞ്ചുവര്‍ഷത്തിനു ശേഷം ഇവര്‍ക്ക് തുഛമായ വികലാംഗ പെന്‍ഷന്‍ മാത്രമാണ് കിട്ടുകയെന്ന് പി. കരുണാകരന്‍ എം.പി. പറഞ്ഞു.
ധനസഹായം നല്‍കുന്നതുമായി ബന്ധപ്പെട്ട് സംസ്ഥാന സര്‍ക്കാര്‍ കേന്ദ്ര മനുഷ്യാവകാശ കമീഷന് നല്‍കിയ റിപോര്‍ട്ട് പൂര്‍ണമായും നടപ്പാക്കണമെന്നും അദ്ദേഹം ആവശ്യപ്പെട്ടു. ദുരന്തബാധിതരായി 4,182 പേരുണ്ടെന്നും ഇതില്‍ കിടപ്പിലായ 2,453 പേര്‍ക്ക് അഞ്ചുലക്ഷം രൂപ വീതവും 1,729 പേര്‍ക്ക് മൂന്നുലക്ഷം രൂപ വീതവും മാര്‍ച്ച് 31ന് മുമ്പായി നല്‍കുമെന്നാണ് സര്‍ക്കാര്‍ കമീഷനെ അറിയിച്ചത്. എന്നാല്‍ ഈ ഓണത്തിനുമുമ്പ് 108 പേര്‍ക്ക് മാത്രമാണ് സഹായത്തിന്റെ ആദ്യഗഡു നല്‍കിയത്. ഇതിനായി പുറത്തിറക്കിയ ലിസ്റ്റ് ജനങ്ങള്‍ക്കിടയില്‍ ആശയക്കുഴപ്പമുണ്ടാക്കി. ബെള്ളൂരിലെ ജാനു നായ്കിന്റെ ആത്മഹത്യയിലേക്കുവരെ ഇത് നയിച്ചു.
നിലവിലുള്ള ലിസ്റ്റില്‍ ഉള്‍പ്പെട്ട മുഴുവനാളുകള്‍ക്കും സഹായം നല്‍കാന്‍ സര്‍ക്കാര്‍ ബാധ്യസ്ഥരാണ്. പെന്‍ഷന്‍ കിട്ടുന്ന ആരും ലിസ്റ്റില്‍ നിന്ന് പുറത്താകാന്‍ പാടില്ല. അതോടൊപ്പം ഈ സര്‍ക്കാര്‍ വന്നതിനുശേഷം നടത്തിയ രണ്ട് മെഡിക്കല്‍ ക്യാമ്പില്‍ കണ്ടെത്തിയവരെക്കൂടി ലിസ്റ്റിലുള്‍പ്പെടുത്തി അവര്‍ക്കും സഹായം നല്‍കണം. ഇക്കാര്യങ്ങള്‍ ചര്‍ച്ച ചെയ്യാന്‍ നിയോഗിച്ച മന്ത്രിമാരുടെ സംഘം എത്രയും വേഗം കാസര്‍കോട്ടെത്തി ചര്‍ച ചെയ്ത് തീരുമാനമെടുക്കണം. ഈ ചര്‍ചയില്‍ തീരുമാനമാകുന്ന കാര്യങ്ങളെല്ലാം നടപ്പാക്കുമെന്നാണ് മുഖ്യമന്ത്രി നല്‍കിയിട്ടുള്ള ഉറപ്പ്. മൂന്നിന് മന്ത്രിമാരുടെ സംഘം വരുമെന്നായിരുന്നു ആദ്യ തീരുമാനം. ഇത് മാറ്റിയതായി അറിയിച്ചു. എന്നാല്‍ സന്ദര്‍ശന തീയതി നീട്ടിക്കൊണ്ടുപോകുന്നത് ശരിയായ നടപടിയല്ല.
ജില്ലാതല സെല്ലാണ് എന്‍ഡോസള്‍ഫാന്‍ ഇരകളുടെ ലിസ്റ്റ് തയ്യാറാക്കിയതെന്ന് ചിലര്‍ പ്രചരിപ്പിക്കുന്നതും അടിസ്ഥാനരഹിതമാണ്. വിദഗ്ദ്ധ ഡോക്ടര്‍മാരുടെ സംഘം ജില്ലയില്‍ നടത്തിയ 29 മെഡിക്കല്‍ ക്യാമ്പില്‍ നിന്നാണ് ലിസ്റ്റ് തയ്യാറാക്കിയത്. കാല്‍ലക്ഷത്തിലധികം രോഗികള്‍ എത്തിയതില്‍നിന്നാണ് 4,182 പേരെ കണ്ടെത്തിയത്. അത് പിന്നീട് സര്‍ക്കാര്‍ അംഗീകരിച്ചു. മുന്‍ സര്‍ക്കാരും ഈ സര്‍ക്കാരും ഈ ലിസ്റ്റുപ്രകാരമാണ് പ്രവര്‍ത്തിച്ചത്.
ദുരന്തബാധിതരെ സഹായിക്കാന്‍ കേന്ദ്രസര്‍ക്കാരിനും ബാധ്യതയുണ്ടെന്ന് മനുഷ്യാവകാശ കമ്മീഷന്‍ നിര്‍ദേശിച്ചിരുന്നു. ഈ മേഖലയില്‍ എല്ലാവിധ ചികിത്സയും കിട്ടുന്ന ആശുപത്രികളും പാലിയേറ്റീവ് സൗകര്യങ്ങളുമേര്‍പ്പെടുത്തണമെന്ന് കേന്ദ്രത്തോട് ആവശ്യപ്പെട്ടതാണ്. 475 കോടി രൂപയുടെ പദ്ധതി സംസ്ഥാന സര്‍ക്കാരും സമര്‍പ്പിച്ചിട്ടുണ്ട്. എന്നിട്ടും ഒരുരൂപപോലും നല്‍കാന്‍ കേന്ദ്രം തയ്യാറായിട്ടില്ല. എന്‍ഡോസള്‍ഫാന്‍ നിരോധിക്കേണ്ടതില്ലെന്ന നിലപാടാണ് കേന്ദ്രം കോടതിയില്‍ സ്വീകരിക്കുന്നത്. ഇത് തിരുത്താന്‍ തയ്യാറാകണമെന്നും എംപി ആവശ്യപ്പെട്ടു.
Keywords: K. Karunakaran. M.P, Press meet, Endosulfan, Goverment, Kerala, Kasaragod, Kvartha, Malayalam News.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
