പാലക്കാട്: (KVARTHA) ക്രിസ്മസ് രാവിൽ നെല്ലിയാമ്പതിയിലെ വനപാതയിൽ അതിസാഹസികമായ രക്ഷാപ്രവർത്തനത്തിലൂടെ അമ്മയുടെയും കുഞ്ഞിന്റെയും ജീവൻ രക്ഷിച്ച ആരോഗ്യപ്രവർത്തകർക്ക് അഭിനന്ദനപ്രവാഹം. പാലക്കാട് സീതാർകുണ്ട് സ്വദേശിയായ അതിഥി തൊഴിലാളി സുജയ് സർദാറിൻ്റെ ഭാര്യ സാമ്പയും നവജാത ശിശുവുമാണ് ദുർഘടമായ സാഹചര്യത്തിൽ ആരോഗ്യപ്രവർത്തകരുടെ സമയോചിതമായ ഇടപെടലിലൂടെ രക്ഷപ്പെട്ടത്. 

നെല്ലിയാമ്പതി പ്രാഥമികാരോഗ്യ കേന്ദ്രത്തിലെ ആരോഗ്യ പ്രവർത്തകരാണ് മാതൃകാപരമായ ഈ ദൗത്യത്തിന് നേതൃത്വം നൽകിയത്. അമ്മയും കുഞ്ഞും നിലവിൽ പാലക്കാട് സ്ത്രീകളുടെയും കുട്ടികളുടെയും ആശുപത്രിയിൽ സുഖമായിരിക്കുന്നു.

സംഭവം ഇങ്ങനെ: 

സാമ്പയ്ക്ക് പ്രസവ വേദന അനുഭവപ്പെട്ടതിനെ തുടർന്ന് ഭർത്താവ് നെല്ലിയാമ്പതി പ്രാഥമികാരോഗ്യ കേന്ദ്രത്തിലെ ജൂനിയർ പബ്ലിക് ഹെൽത്ത് നഴ്സായ സുദിനയെ വിവരമറിയിച്ചു. മെഡിക്കൽ ഓഫീസറും ഗൈനക്കോളജിസ്റ്റുമായ ഡോ. ലക്ഷ്മിയുടെ നിർദേശപ്രകാരം സുദിനയും നഴ്സിംഗ് അസിസ്റ്റന്റ് ജാനകിയും ആശുപത്രിയിൽ പ്രസവത്തിനുള്ള സൗകര്യങ്ങൾ ഒരുക്കിയിരുന്നു. സാമ്പയും ഭർത്താവും ഫാർമസിസ്റ്റ് മിഥിലാജിനൊപ്പം ജീപ്പിൽ ആശുപത്രിയിലേക്ക് യാത്ര തുടങ്ങി. എന്നാൽ, ദുർഘടം നിറഞ്ഞ വനപാതയിൽ ആശുപത്രിയിലെത്തും മുൻപ് സാമ്പ കുഞ്ഞിന് ജന്മം നൽകി.

അടിയന്തര സാഹചര്യത്തിൽ സുദിനയും ജാനകിയും സാമ്പയെയും കുഞ്ഞിനെയും നെല്ലിയാമ്പതി ആരോഗ്യ കേന്ദ്രത്തിലേക്ക് സുരക്ഷിതമായി എത്തിച്ചു. പ്രാഥമിക പരിശോധനയിൽ അമ്മയുടെ ആരോഗ്യനില തൃപ്തികരമല്ലാത്തതിനാൽ ജീപ്പിൽ വെച്ചുതന്നെ പൊക്കിൾകൊടി മുറിക്കുകയും മറ്റു പരിചരണങ്ങൾ നൽകുകയും ചെയ്തു. തുടർന്ന്, അമ്മയെയും കുഞ്ഞിനെയും നെന്മാറ സാമൂഹികാരോഗ്യ കേന്ദ്രത്തിലേക്ക് കൊണ്ടുപോകാൻ തീരുമാനിച്ചു.

എന്നാൽ, കൈകാട്ടിയിൽ നിന്ന് യാത്ര തിരിച്ച സംഘത്തെ കാത്തിരുന്നത് വന്യമൃഗങ്ങളുടെ ഭീഷണിയായിരുന്നു. യാത്രയ്ക്കിടെ ഒരു ആന ജീപ്പിന് മുന്നിൽ പ്രത്യക്ഷപ്പെട്ടു. പിന്നോട്ട് പോകാൻ ശ്രമിച്ചപ്പോൾ കാട്ടുപോത്ത് വഴി തടഞ്ഞു. ഏകദേശം രണ്ട് മണിക്കൂറോളം സംഘം വന്യമൃഗങ്ങൾക്കിടയിൽ കുടുങ്ങിപ്പോയി. ഈ സമയം മുഴുവൻ ഡോക്ടറുടെ നിർദേശപ്രകാരം സുദിനയും ജാനകിയും രക്തസ്രാവം നിയന്ത്രിക്കാനുള്ള നടപടികളും മറ്റു പരിചരണങ്ങളും നൽകി. മുലയൂട്ടൽ തുടരാൻ ഡോക്ടർ നിർദ്ദേശിച്ചത് അമ്മയ്ക്ക് പ്രസവാനന്തരം ആവശ്യമായ ഹോർമോൺ ഉത്പാദിപ്പിക്കാനും കുഞ്ഞിനെ ഹൈപ്പോഗ്ലൈസീമിയയിൽ നിന്ന് രക്ഷിക്കാനും സഹായിച്ചു.

വനം വകുപ്പ് ഉദ്യോഗസ്ഥരുടെ സഹായത്തോടെ വന്യമൃഗങ്ങളുടെ ഭീഷണി മറികടന്ന് അമ്മയെയും കുഞ്ഞിനെയും നെന്മാറ സാമൂഹികാരോഗ്യ കേന്ദ്രത്തിലെത്തിച്ചു. അവിടെ ഡോ. ലക്ഷ്മിയുടെ നേതൃത്വത്തിലുള്ള സംഘം കൂടുതൽ പരിചരണങ്ങൾ നൽകി. പിന്നീട് ഇരുവരെയും പാലക്കാട് സ്ത്രീകളുടെയും കുട്ടികളുടെയും ആശുപത്രിയിലേക്ക് മാറ്റി. അമ്മയും കുഞ്ഞും സുഖമായിരിക്കുന്നുവെന്ന് അധികൃതർ അറിയിച്ചു. ആരോഗ്യ വകുപ്പ് മന്ത്രി വീണാ ജോർജ്, ജീവൻ രക്ഷിച്ച ആരോഗ്യപ്രവർത്തകരെ അഭിനന്ദിച്ചു.

#WildlifeRescue #Kerala #ChristmasDay #ElephantRescue #MotherAndChild #Emergency