ഇ-സൈക്കിൾ: കാർബൺ ന്യൂട്രൽ കേരളത്തിലേക്കുള്ള നിർണ്ണായക ചുവടുവെപ്പ്

കണ്ണൂർ: (KVARTHA) കാർബൺ ന്യൂട്രൽ കേരളം എന്ന ലക്ഷ്യത്തിലേക്കുള്ള ആദ്യ ചുവടുവെപ്പാണ് ഇ-സൈക്കിൾ പദ്ധതിയെന്ന് തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് പറഞ്ഞു. തദ്ദേശ സ്വയംഭരണ, ഊർജ വകുപ്പുകളും കേന്ദ്ര ഗ്രാമവികസന മന്ത്രാലയവും സംയുക്തമായി ജില്ലയിൽ വിതരണം ചെയ്യുന്ന ഇലക്ട്രിക് സൈക്കിളുകളുടെ ജില്ലാതല ഉദ്ഘാടനം നിർവഹിച്ചുകൊണ്ട് സംസാരിക്കുകയായിരുന്നു അദ്ദേഹം. 

ഈ പദ്ധതിയിലൂടെ സ്ത്രീകളുടെ ജീവിതനിലവാരത്തിൽ വലിയ പുരോഗതിയുണ്ടാകുമെന്നും മന്ത്രി കൂട്ടിച്ചേർത്തു. സംസ്ഥാനത്തെ മികച്ച എ.ഡി.എസ്സായി തിരഞ്ഞെടുക്കപ്പെട്ട മാട്ടറ എ.ഡി.എസ്സിനും മികച്ച ബഡ്‌സ് സ്കൂളായി തിരഞ്ഞെടുക്കപ്പെട്ട പഴശ്ശിരാജ ബഡ്‌സ് സ്കൂളിനുമുള്ള അവാർഡ് വിതരണവും മന്ത്രി നിർവഹിച്ചു.

രജിസ്‌ട്രേഷൻ, മ്യൂസിയം, പുരാവസ്തു, പുരാരേഖ വകുപ്പ് മന്ത്രി രാമചന്ദ്രൻ കടന്നപ്പള്ളി അധ്യക്ഷനായിരുന്നു. ഏതു മാറ്റവും വേഗത്തിൽ ഉൾക്കൊള്ളുന്ന സംസ്ഥാനമാണ് കേരളമെന്നും ഇ-സൈക്കിളും അത്തരമൊരു പദ്ധതിയാകുമെന്നും അദ്ദേഹം പറഞ്ഞു.

2050 ഓടെ കാർബൺ ന്യൂട്രൽ കേരളം സൃഷ്ടിക്കുക എന്ന ലക്ഷ്യത്തോടെയാണ് കുടുംബശ്രീ അംഗങ്ങൾക്ക് ഇ-സൈക്കിൾ വിതരണം ചെയ്തത്. കുടുംബശ്രീ അംഗങ്ങളായ വനിതകളുടെ കാര്യശേഷി വർദ്ധിപ്പിക്കുക, സംരംഭകത്വ വികസനം പ്രോത്സാഹിപ്പിക്കുക, യാത്രാചെലവ് കുറയ്ക്കുക, മറ്റു വരുമാന വർദ്ധനവിന് സഹായിക്കുക എന്നിവയും പദ്ധതി ലക്ഷ്യമിടുന്നു. 

കണ്ണൂർ ജില്ലയിലെ 71 ഗ്രാമീണ സി.ഡി.എസ്സുകളിലെ 350 വനിതകൾക്കാണ് ഇ-സൈക്കിളുകൾ നൽകുന്നത്. കാർബൺ ന്യൂട്രൽ കേരളം പദ്ധതിയുടെ ആദ്യഘട്ടമായി കണ്ണൂർ, പാലക്കാട് ജില്ലകളിലാണ് കുടുംബശ്രീ അംഗങ്ങൾക്ക് ഇ-സൈക്കിളുകൾ നൽകുന്നത്. ₹40,000 വിലമതിക്കുന്ന ഈ സൈക്കിൾ ₹3,000 ഗുണഭോക്തൃ വിഹിതം വാങ്ങിക്കൊണ്ടാണ് കുടുംബശ്രീ പ്രവർത്തകർക്ക് നൽകുന്നത്.

ജില്ലാ പഞ്ചായത്ത് പ്രസിഡന്റ് അഡ്വ. കെ.കെ. രത്നകുമാരി, തദ്ദേശസ്വയംഭരണ വകുപ്പ് സ്പെഷ്യൽ സെക്രട്ടറി ടി.വി. അനുപമ എന്നിവർ വിശിഷ്ടാതിഥികളായിരുന്നു. എൻ.ആർ.എൽ.എം. ചീഫ് ഓപ്പറേറ്റിങ് ഓഫീസർ സി. നവീൻ പദ്ധതി അവതരണം നടത്തി. 

ജില്ലാ പഞ്ചായത്ത് ഓഡിറ്റോറിയത്തിൽ നടന്ന പരിപാടിയിൽ ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബിനോയ് കുര്യൻ, സ്റ്റാൻഡിങ് കമ്മിറ്റി ചെയർപേഴ്‌സൺമാരായ വി.കെ. സുരേഷ്ബാബു, യു.പി. ശോഭ, എൻ.വി. ശ്രീജിനി, അഡ്വ. ടി. സരള, ജില്ലാ പഞ്ചായത്തംഗം തോമസ് വെക്കത്താനം, കുടുംബശ്രീ ജില്ലാ മിഷൻ കോ-ഓർഡിനേറ്റർ എം.വി. ജയൻ, കേരള എനർജി മാനേജ്‌മെന്റ് സെന്റർ രജിസ്ട്രാർ ബി.വി. സുഭാഷ് ബാബു, ജില്ലാ ഇൻഫർമേഷൻ ഓഫീസർ പി.പി. വിനീഷ്, സി.ഡി.എസ്. ചെയർപേഴ്‌സൺമാരായ വി. ജ്യോതി ലക്ഷ്മി, സി.പി. പ്രീത, കെ.വി. നിർമ്മല, കെ.സി. രേണുക, കെ.പി. സാജിത, പി. മഷൂദ, മിനി ഷേർലി, എം.കെ. ലത, കെ.പി. സുനില, ഇ. വസന്ത, കെ. ബിന്ദു, എം.എ.വി. സജ്‌ന, എ.ഡി.എം.സി. മാരായ പി.ഒ. ദീപ, കെ. വിജിത്ത്, കെ. രാഹുൽ, ഡി.പി.എം.മാരായ കെ.എൻ. നൈൽ, ജിബിൻ സ്കറിയ എന്നിവർ സംസാരിച്ചു.

കാർബൺ ന്യൂട്രൽ കേരളം എന്ന ലക്ഷ്യത്തിലേക്ക് ഈ പദ്ധതി എത്രത്തോളം സഹായിക്കുമെന്ന് നിങ്ങൾ കരുതുന്നു? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: E-cycle project launched in Kannur for Carbon Neutral Kerala, empowering Kudumbashree women.
#ECycleKerala #CarbonNeutral #Kudumbashree #Kannur #GreenKerala #MBRajesh