ബോംബ് രാഷ്ട്രീയത്തിൻ്റെ ഇരയായ ഡോ അസ്നയ്ക്ക് പുതുജീവിതം; ജൂലൈ 5ന് വിവാഹം
● 24 വർഷം മുൻപാണ് സംഭവം.
● കോഴിക്കോട് മെഡിക്കൽ കോളേജിൽ പഠിച്ചു.
● ഉമ്മൻ ചാണ്ടി സർക്കാർ പിന്തുണ നൽകി.
● നിലവിൽ വടകരയിൽ ഡോക്ടറായി ജോലി.
● നിഖിലാണ് വരൻ.
കണ്ണൂർ: (KVARTHA) കണ്ണൂരിൻ്റെ രാഷ്ട്രീയ ചരിത്രത്തിലെ ഒരു നോവായി മാറിയ ബോംബാക്രമണത്തിൻ്റെ ജീവിക്കുന്ന രക്തസാക്ഷിയായ ഡോക്ടർ അസ്ന പുതിയ ജീവിതത്തിലേക്ക് കടക്കുന്നു. 24 വർഷം മുൻപ് കുത്തുപറമ്പിനടുത്ത് ചെറുവാഞ്ചേരിയിൽ പഞ്ചായത്ത് തിരഞ്ഞെടുപ്പ് കാലത്ത് നടന്ന രാഷ്ട്രീയ അക്രമത്തിൽ ബോംബേറിൽ വലതുകാൽ നഷ്ടപ്പെട്ട ഡോക്ടർ അസ്ന, ജൂലൈ അഞ്ചിന് വിവാഹിതയാകും.
ആലക്കോട് അരങ്ങം വാഴയിൽ വീട്ടിൽ വി.കെ. നാരായണൻ്റെയും ലീന നാരായണൻ്റെയും മകനും ഷാർജയിൽ എഞ്ചിനീയറുമായ നിഖിലാണ് വരൻ. 2000 സെപ്റ്റംബർ 27-ന് തദ്ദേശ തിരഞ്ഞെടുപ്പിനിടെ, പൂവത്തൂർ എൽ.പി. സ്കൂൾ ബൂത്തിനടുത്ത് വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന ആറുവയസ്സുകാരി അസ്നയുടെ ജീവിതത്തെ മാറ്റിമറിച്ച ബോംബേറ് നടക്കുന്നത്.
ബി.ജെ.പി. പ്രവർത്തകർ നടത്തിയ ബോംബേറിൽ അമ്മ ശാന്തയ്ക്കും അനിയൻ ആനന്ദിനും ഗുരുതരമായി പരിക്കേറ്റിരുന്നു. അസ്നയുടെ വലതുകാൽ മുട്ടിന് താഴെവെച്ച് മുറിച്ചുമാറ്റേണ്ടി വന്നു. മൂന്നു മാസത്തോളം വേദന കടിച്ചമർത്തി ആശുപത്രിയിൽ കഴിഞ്ഞിരുന്ന അസ്നയ്ക്ക്, അക്കാലത്ത് ഡോക്ടർമാരിൽ നിന്ന് ലഭിച്ച സ്നേഹവും പരിചരണവുമാണ് ഡോക്ടറാകുക എന്ന സ്വപ്നത്തിലേക്ക് നയിച്ചത്. ഇത് നടക്കാത്ത സ്വപ്നമാണെന്ന് പലരും കരുതിയെങ്കിലും നാടും നാട്ടുകാരും പ്രിയപ്പെട്ടവരും അന്നത്തെ ഉമ്മൻ ചാണ്ടി സർക്കാരും അസ്നയ്ക്ക് താങ്ങും തണലുമായി നിന്നു.
മകളെ ശുശ്രൂഷിക്കാൻ അച്ഛൻ നാണു തൻ്റെ കട നിർത്തി വീട്ടിലിരുന്നു. തോളിലേറ്റി സ്കൂളിലെത്തിച്ച അച്ഛൻ്റെ സ്നേഹവും താങ്ങും അസ്നയുടെ ജീവിതത്തിലെ വലിയ ശക്തിയായി. കൃത്രിമക്കാലിൽ ജീവിതത്തെ മുന്നോട്ട് നയിച്ച അസ്ന, എല്ലാ പ്രതിബന്ധങ്ങളെയും അതിജീവിച്ച് പഠനത്തിൽ ഉന്നത വിജയം നേടി.
2013-ൽ കോഴിക്കോട് മെഡിക്കൽ കോളേജിൽ എം.ബി.ബി.എസിന് പ്രവേശനം നേടി ഡോക്ടറായി. ക്ലാസ് മുറിയിലേക്ക് പടികയറാൻ ബുദ്ധിമുട്ടിയപ്പോൾ ഉമ്മൻ ചാണ്ടി സർക്കാർ ലിഫ്റ്റ് നിർമ്മിച്ച് നൽകി. കൃത്രിമക്കാൽ ശരീരവുമായി പൂർണ്ണമായി ഇണങ്ങിച്ചേരാത്തതിൻ്റെ ബുദ്ധിമുട്ടുകൾ ഇപ്പോഴും അസ്നയെ അലട്ടുന്നുണ്ടെങ്കിലും, നിലവിൽ വടകരയിലെ ഒരു സ്വകാര്യ ക്ലിനിക്കിൽ ഡോക്ടറായി ജോലി ചെയ്തുവരികയാണ്.
ഇതിനുമുമ്പ് ചെറുവാഞ്ചേരി പി.എച്ച്.സിയിലും അസ്ന സേവനമനുഷ്ഠിച്ചിട്ടുണ്ട്. അക്രമ രാഷ്ട്രീയത്തിൻ്റെ ഇരയായിട്ടും അത്ഭുതകരമായി ജീവിതത്തിലേക്ക് തിരിച്ചുവന്ന അസ്നയുടെ ജീവിതം ആത്മവിശ്വാസത്തിൻ്റെയും ഇച്ഛാശക്തിയുടെയും തിളക്കമാർന്ന ഉദാഹരണമാണ്.
ഡോ. അസ്നയുടെ ജീവിതകഥ ഒരു പ്രചോദനമല്ലേ? നിങ്ങളുടെ അഭിപ്രായങ്ങൾ പങ്കുവെക്കുക.
Article Summary: Dr. Asna, a bomb attack victim, to marry on July 5.
#DrAsna, #KeralaNews, #KuthuparambaBombing, #InspiringStory, #NewLife, #Kannur
