മംഗ്ളുറു: (KVARTHA) കർണാടക സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷൻ (കെഎസ്ആർടിസി) ഡിജിറ്റൽ പണമിടപാടുകളിലേക്ക് ചുവടുമാറ്റിയതോടെ, കേരളത്തിലും സമാനമായ സംവിധാനം എല്ലായിടത്തും എപ്പോൾ വരുമെന്ന ആകാംക്ഷയിലാണ് യാത്രക്കാർ. ബെംഗളൂരു, മൈസൂരു തുടങ്ങിയ നഗരങ്ങളിൽ വിജയകരമായി ഡിജിറ്റൽ പേയ്‌മെന്റ് സംവിധാനം നടപ്പാക്കിയ ശേഷം, കർണാടക ആർടിസി ഇത് മടിക്കേരിയിലും പരിസര പ്രദേശങ്ങളിലേക്കും വ്യാപിപ്പിച്ചു. 

കാസർകോട് - മംഗ്ളുറു റൂട്ടിൽ ഈ സൗകര്യം നേരത്തെ തന്നെ ലഭ്യമാണ് എന്നത് ശ്രദ്ധേയമാണ്. പണം നൽകി ടിക്കറ്റ് എടുക്കുമ്പോൾ ഉണ്ടാകുന്ന ബുദ്ധിമുട്ടുകൾക്കും തർക്കങ്ങൾക്കും ഇതോടെ ഒരളവുവരെ പരിഹാരമാകും. മുമ്പ് കെഎസ്ആർടിസി ബസുകളിൽ യാത്ര ചെയ്യുമ്പോൾ യാത്രക്കാർ പണം നൽകിയാണ് ടിക്കറ്റ് എടുത്തിരുന്നത്. ചില്ലറ കൊടുക്കുന്നതിലും വാങ്ങുന്നതിലും പലപ്പോഴും തർക്കങ്ങൾ ഉണ്ടാവാറുണ്ടായിരുന്നു. എന്നാൽ, ഇപ്പോൾ പലയിടങ്ങളിലും ഈ പ്രശ്നങ്ങൾക്ക് പരിഹാരമായിരിക്കുകയാണ്. 

യാത്രക്കാർക്ക് ഡിജിറ്റലായി പണം നൽകി കണ്ടക്ടർമാരുടെ കയ്യിലുള്ള ക്യുആർ കോഡ് സ്കാൻ ചെയ്ത് ടിക്കറ്റ് എടുക്കാവുന്നതാണ്. പുത്തൂർ ഡിവിഷൻ ഒന്നാം യൂണിറ്റിലെ 228 ഓളം ഓപ്പറേറ്റർമാർക്ക് (ഡ്രൈവർമാർക്കും കണ്ടക്ടർമാർക്കും) യുപിഐ ഡിജിറ്റൽ സംവിധാനം നൽകുന്നതിലൂടെ യാത്രക്കാരും ഓപ്പറേറ്റർമാരും തമ്മിൽ മുൻപുണ്ടായിരുന്ന പല തർക്കങ്ങൾക്കും വിരാമമായി. ഇനി ബസുകളിൽ യാത്ര ചെയ്യുന്നവർക്ക് ഡിജിറ്റൽ പണമിടപാട് നടത്താം. പണം ലഭിച്ചതിന്റെ സന്ദേശം ഉടൻതന്നെ ഓപ്പറേറ്ററുടെ മൊബൈലിൽ എത്തും.

നെറ്റ്‌വർക്ക് പ്രശ്നങ്ങളുള്ള സ്ഥലങ്ങളിൽ പഴയ രീതിയിൽ പണം നൽകി ടിക്കറ്റ് എടുക്കാവുന്നതാണ്. യൂണിറ്റിലെ എല്ലാ ഓപ്പറേറ്റർമാർക്കും ഡിജിറ്റൽ പണമിടപാടിനെക്കുറിച്ച് പരിശീലനം നൽകിയിട്ടുണ്ട്. ഈ സംവിധാനം ഓപ്പറേറ്റർമാർക്കും യാത്രക്കാർക്കും ഒരുപോലെ ഉപകാരപ്രദമാകുമെന്ന് ബന്ധപ്പെട്ടവർ  കൂട്ടിച്ചേർത്തു. ഈ പുതിയ സംവിധാനം കെഎസ്ആർടിസിയുടെ പ്രവർത്തനങ്ങളിൽ കൂടുതൽ സുതാര്യതയും കാര്യക്ഷമതയും ഉറപ്പാക്കുന്നു.

കർണാടക ആർടിസിയുടെ ഈ മുന്നേറ്റം കേരളത്തിലെ യാത്രക്കാർക്ക് പ്രതീക്ഷ നൽകുന്നു. ഡെബിറ്റ്‌ കാർഡിലൂടെയും യുപിഐ ആപ്പിലൂടെയും ടിക്കറ്റ് എടുക്കാനുള്ള സൗകര്യം നിലവിൽ തിരുവനന്തപുരം പോലുള്ള ചിലയിടങ്ങളിൽ കേരള ആർടിസിയിലുണ്ട്. ചലോ ആപ്പുമായി സഹകരിച്ചാണ്‌ പദ്ധതി. അത്‌ വ്യാപിപ്പിക്കുമെന്ന് ഗതാഗതമന്ത്രി കെ ബി ഗണേഷ്‌കുമാർ നേരത്തെ പറഞ്ഞിട്ടുണ്ട്.  ഡിജിറ്റൽ വൽക്കരണത്തിന്റെ ഈ കാലഘട്ടത്തിൽ പൊതുഗതാഗത സംവിധാനങ്ങളിലും മാറ്റങ്ങൾ അനിവാര്യമാണെന്ന് യാത്രക്കാർ ചൂണ്ടിക്കാട്ടുന്നു.

#KSRTC #DigitalPayment #KeralaTransport #KarnatakaRTC #OnlineTickets #CashlessTravel