സിപിഎം ലോകൽ സെക്രടറിയുടെ കൊലപാതകവുമായി ബന്ധപ്പെട്ട് നാല് പേർ പൊലീസ് പിടിയിൽ; പിന്നിൽ ആർ എസ് എസ് എന്ന് ആരോപണം; ഹർത്താൽ പൂർണം

കൊലപാതകം ആസൂത്രിതമാണെന്നും ആർഎസ്എസുകാരാണ് ആക്രമണത്തിന് പിന്നിലെന്നും സിപിഎം ജില്ലാ നേതൃത്വം ആരോപിച്ചു. അതേസമയം ക്രിമിനല്‍ സംഘങ്ങള്‍ തമ്മിലുള്ള വ്യക്തിവൈരാഗ്യമാണ് സംഘര്‍ഷത്തിന് കാരണമെന്ന് ബിജെപി നേതാക്കൾ പറഞ്ഞു.

തിരുവല്ലയിലെ ചാത്തങ്കരിയിൽ വ്യാഴാഴ്ച രാത്രി എട്ട് മണിയോടെയാണ് സംഭവം നടന്നത്. സന്ദീപ് കുമർ വീട്ടിലേക്ക്‌ ബൈകിൽ പോകുമ്പോൾ ഇദ്ദേഹത്തെ രണ്ട്‌ ബൈകിലെത്തിയ സംഘം വഴിയിൽ തടഞ്ഞു ആക്രമിക്കുകയും കത്തികൊണ്ട് കുത്തി വീഴ്ത്തുകയും ആയിരുന്നെന്നാണ് വിവരം. കരച്ചിൽ കേട്ടെത്തിയ പ്രദേശത്തുള്ളവർ ഉടൻ തിരുവല്ലയിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇരുചക്രവാഹനങ്ങളിൽ എത്തിയ ആറംഗ സംഘമാണ് സന്ദീപിനെ ആക്രമിച്ചതെന്ന് തിരുവല്ല ഡിവൈഎസ്പി ടി രാജപ്പൻ പറഞ്ഞു.

പെരിങ്ങര മുൻ പഞ്ചായത്ത് അംഗമായിരുന്നു സന്ദീപ്. അടുത്തിടെ നടന്ന സമ്മേളനത്തിൽ ലോകൽ സെക്രടറിയായി സന്ദീപിനെ ഏകകണ്ഠമായി തിരഞ്ഞെടുത്തിരുന്നു. ഇദ്ദേഹം പെരിങ്ങരയിൽ പാർടിയെ ശക്തിപ്പെടുത്തുന്നവരിൽ പ്രധാനിയായിരുന്നെന്ന് സിപിഎം നേതാക്കൾ പറഞ്ഞു. സന്ദീപിന്റെ മൃതദേഹം പോസ്റ്റ് മോർടെത്തിന് ശേഷം വെള്ളിയാഴ്ച ഉച്ചയോടെ സിപിഎം ഏരിയാ കമിറ്റി ഓഫിസ്, പെരിങ്ങര ലോകല്‍ കമിറ്റി ഓഫിസ്, പെരിങ്ങര പഞ്ചായത്ത് ഓഫിസ് എന്നിവിടങ്ങളിൽ പൊതുദർശനത്തിന് വെക്കും. വൈകീട്ടോടെ വീട്ടുവളപ്പിൽ സംസ്കരിക്കും.