Campaign | കണ്ണൂരിൽ സുധാകരനെ വീഴ്ത്താൻ വാരിക്കുഴി ഒരുക്കി എൽഡിഎഫ്; ബിജെപിയിലേക്ക് ചേക്കേറുമെന്ന പ്രചാരണം ശക്തമാക്കി

  
പിണറായി സർക്കാരിനോടുള്ള ഭരണവിരുദ്ധവികാരം ലക്ഷ്യമിട്ടായിരുന്നു തുടക്കത്തില്‍ യു.ഡി.എഫ് പ്രചാരണം. പാനൂര്‍ ബോംബ് സ്‌ഫോടനം കൂടി വീണുകിട്ടിയതോടെ അക്രമരാഷ്ട്രീയത്തിനെതിരെയുള്ള കാമ്പയിനും യു.ഡി.എഫ് ക്യാമ്പിന് കരുത്തായി. കേന്ദ്ര, സംസ്ഥാന സര്‍ക്കാരുകളുടെ ജനവിരുദ്ധ നടപടികൾ ചൂണ്ടിക്കാട്ടിയും യു.ഡി.എഫ് പ്രചാരണത്തിന് കൊഴുപ്പേകുന്നുണ്ട്. ഇത്തവണ മത്സരിക്കാതെ മാറി നില്‍ക്കാനായിരുന്നു കെ സുധാകരന്റെ തീരുമാനം. സുധാകരനില്ലെങ്കില്‍ വേറെയാരെന്ന ചോദ്യത്തിന് ഉത്തരമില്ലാതായതോടെയാണ് പൂര്‍വാധികം കരുത്തോടെ അദ്ദേഹം കളത്തിലിറങ്ങിയത്.

കഴിഞ്ഞതവണ കെ.സുധാകരന് സി.പി.എം കോട്ടകളില്‍ നിന്നു വോട്ടുചോര്‍ന്നു കിട്ടിയിരുന്നു. ഈ തെരഞ്ഞെടുപ്പിലും ആ വോട്ടുകള്‍ കൂടെയുണ്ടെന്ന ആത്മവിശ്വാസം സുധാകരനുണ്ട്. യു.ഡി.എഫിനെ സംബന്ധിച്ച് കണ്ണൂരിലെ ക്രൗഡ് പുള്ളര്‍ കെ സുധാകരന്‍ തന്നെയാണ്. കെ. സുധാകരന്‍ ഇറങ്ങിയാല്‍ കോണ്‍ഗ്രസ് പ്രവര്‍ത്തകര്‍ വര്‍ധിതവീര്യത്തോടെ കൂടെനില്‍ക്കും. കട്ടയ്ക്ക് സപ്പോര്‍ട്ടുമായി മുസ്‌ലിം ലീഗും ഇറങ്ങിയതിനാല്‍ ഇത്തവണയും മണ്ഡലത്തിന്റെ മനസുമാറില്ലെന്നു തന്നെയാണ് കെ.സുധാകരന്റെ പ്രതീക്ഷ. ഘടകകക്ഷിയായ മുസ്‌ലിംലീഗിന് പുറമേ പരസ്യപിന്തുണയുമായി എസ്.ഡി.പി.ഐ കൂടി എത്തിയതോടെ ന്യൂനപക്ഷ വോട്ടുകള്‍ പെട്ടിയിലാകുമെന്ന പ്രതീക്ഷയുണ്ടെങ്കിലും പരമ്പരാഗത വോട്ടുബാങ്കായ ക്രിസ്ത്യന്‍ ഭൂരിപക്ഷ മേഖലകളില്‍ തിരിച്ചടിയാകുമോ എന്ന ആശങ്ക യു.ഡി.എഫ്. ക്യാമ്പിനുണ്ട്.

എസ്.ഡി.പി.ഐ വോട്ട് വേണ്ടെന്ന് പ്രതിപക്ഷനേതാവ് ഉള്‍പ്പെടെയുള്ളവര്‍ പറഞ്ഞെങ്കിലും അത് ഉള്ളില്‍തൊട്ടുള്ള പറച്ചിലല്ലെന്ന് നാട്ടുകാര്‍ക്കറിയാം. ലോക്‌സഭാ തെരഞ്ഞെടുപ്പിന് മുന്നോടിയായി പ്രസിദ്ധീകരിച്ച വോട്ടര്‍പട്ടികപ്രകാരം 21,16,876 വോട്ടര്‍മാരാണ് ജില്ലയിലുള്ളത്. 11,14,246 സ്ത്രീകളും 10,02,622 പുരുഷന്മാരും എട്ട് ട്രാന്‍സ്‌ജെന്‍ഡേഴ്‌സും. ഇതില്‍ 61.6 ശതമാനം ഹിന്ദു വോട്ടര്‍മാരും 26.4 ശതമാനം മുസ്‌ലിം വോട്ടര്‍മാരും 12ശതമാനം ക്രിസ്ത്യന്‍ വോട്ടര്‍മാരുമാണ്.