തെരുവ് നായയുടെ കടിയേറ്റ പശു പേ ഇളകി ചത്തു; ഗവേഷകയ്ക്ക് തെരുവുനായയുടെ കടിയേറ്റു

മലപ്പുറം: (www.kvartha.com 09.11.2016) വളവന്നൂര്‍ വാരണാക്കരയില്‍ തെരുവ് നായയുടെ കടിയേറ്റ് ചികിത്സയിലായിരുന്ന പശു പേ ഇളകി ചത്തു. കഴിഞ്ഞ മാസം 17നാണ് മൂന്ന് വയസുള്ള ഒരു കുട്ടിയുള്‍പ്പടെ മൂന്ന് പേര്‍ക്കും നീര്‍ക്കാട്ടില്‍ ആയിശയുടെ പശുവിനും തെരുവ് നായയുടെ കടിയേറ്റത്.

കടിയേറ്റ മൂന്ന് പേരെയും കോഴിക്കോട് മെഡിക്കല്‍ കോളേജ് ആശുപത്രിയിലെത്തിച്ച് വാക്‌സിനേഷന്‍ നല്‍കിയിരുന്നു. അന്ന് തന്നെ കടിയേറ്റ പശുവിനും മൃഗ സംരക്ഷണ വകുപ്പ് ഉദ്യോഗസ്ഥര്‍ കുത്തിവെപ്പ് നടത്തിയിരുന്നു. എന്നാല്‍ രണ്ട് ദിവസമായി പേവിഷബാധ ലക്ഷണങ്ങള്‍ പ്രകടിപ്പിച്ച് തുടങ്ങിയ പശു ബുധനാഴ്ച കാലത്ത് 9 മണിയോടെ ചത്ത് വീഴുകയായിരുന്നു.

കടിച്ച തെരുവ് നായയെ നാട്ടുകാര്‍ കൊലപ്പെടുത്തിയെങ്കിലും ഇത് മറ്റ് തെരുവ് നായകളെയും വളര്‍ത്തു മൃഗങ്ങളെയും കടിച്ചിട്ടുണ്ടാകുമെന്ന ഭീതിയിലാണ് നാട്ടുകാര്‍.


മറ്റൊരു സംഭവത്തിൽ കാലിക്കറ്റ് സര്‍വ്വകലാശാല സുവോളജി പഠനവിഭാഗത്തിലെ പ്രൊജക്റ്റ് ഫെലോ എ. ആതിരയെ തെരുവുനായ കടിച്ചു. സര്‍വ്വകലാശാല ക്യാമ്പസിലെ സുവോളജി പഠനവിഭാഗത്തിന് മുന്നില്‍ വച്ചാണ് നായ ആതിരയെ ആക്രമിച്ചത്. കാലിന് കടിയേറ്റ ആതിരയെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ച് ചികിത്സ നല്‍കി. ഇതിനു മുമ്പും സര്‍വ്വകലാശാല ക്യാമ്പസില്‍ വച്ച് വിദ്യാര്‍ത്ഥികള്‍ക്ക് തെരുവു നായകളുടെ കടിയേറ്റിട്ടുണ്ട്.