പ്രവാസികളെ തിരിച്ചു കൊണ്ടുവരണമെന്നാവശ്യപ്പെട്ട് വിമാനത്താവളത്തിന് മുന്‍പില്‍ കോണ്‍ഗ്രസ് പ്രതിനിധികളുടെ സമരം
Apr 29, 2020, 16:32 IST
ADVERTISEMENT
കണ്ണൂർ: (www.kvartha.com 29.04.2020) പ്രവാസി മലയാളികളെ എത്രയും പെട്ടെന്ന് തിരിച്ചു കൊണ്ടുവരാൻ സർക്കാർ തയ്യാറായില്ലെങ്കിൽ. അതിശക്തമായ പ്രക്ഷോഭമാരംഭിക്കുമെന്ന മുന്നറിയിപ്പുമായി കോൺഗ്രസ് ജനപ്രതിനിധികൾ രംഗത്തെത്തി. വിദേശത്തുള്ള മലയാളികളുടെ നാട്ടിലേക്കുള്ള മടങ്ങിവരവുമായി ബന്ധപ്പെട്ട് കേന്ദ്ര-സംസ്ഥാന സർക്കാരുകളുടെ മെല്ലെപ്പോക്ക് അവസാനിപ്പിക്കണമെന്ന് ആവശ്യപ്പെട്ട് കണ്ണൂർ വിമാനത്താവള കവാടത്തിന് മുന്നിൽ കോൺഗ്രസ് ധർണ നടത്തി.
കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ വീഡിയോ കോൺഫറൻസിലൂടെ പ്രതിഷേധം ഉദ്ഘാടനം ചെയ്തു. പ്രവാസി മലയാളികളെ നാട്ടിലെത്തിക്കാനുള്ള നടപടി വേഗത്തിലാക്കുക, പ്രതിസന്ധിയിലായവരുടെയും സാമ്പത്തികമായി പിന്നോക്കം നിൽക്കുന്ന പ്രവാസികളുടെയും വിമാനയാത്രാ ചിലവ് കേന്ദ്ര-സംസ്ഥാന സർക്കാരുകൾ വഹിക്കുക, തിരിച്ചെത്തുന്ന പ്രവാസികൾക്ക് ശാസ്ത്രീയമായ ക്വാറന്‍റൈൻ സൗകര്യം ഒരുക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു പ്രതിഷേധം.
എംപിമാരായ കെ സുധാകരൻ, കെ മുരളീധരൻ, രാജ്മോഹൻ ഉണ്ണിത്താൻ, സണ്ണി ജോസഫ് എംഎൽഎ, കാസർകോട്‌ ഡിസിസി പ്രസിഡന്‍റ് ഹക്കീം കുന്നിൽ, കണ്ണൂർ ഡിസിസി പ്രസിഡന്‍റ് സതീശൻ പാച്ചേനി തുടങ്ങിയവർ ധർണയിൽ പങ്കെടുത്തു.
കോൺഗ്രസ് പ്രവർത്തക സമിതി അംഗങ്ങളായ എ കെ ആന്‍റണി, കെ സി വേണുഗോപാൽ, പ്രതിപക്ഷ നേതാവ് രമേശ് ചെന്നിത്തല, മുൻ മുഖ്യമന്ത്രി ഉമ്മൻ ചാണ്ടി തുടങ്ങിയവർ വീഡിയോ കോൺഫറൻസിലൂടെ സമരത്തെ അഭിവാദ്യം ചെയ്തു. ലോക്ക് ഡൗൺ ക്രമീകരണങ്ങൾ പാലിച്ചുകൊണ്ടാണ് സമരം നടത്തിയത്.
Keywords: Congressional delegation in front of airport to bring back expatriates, Kannur, News, Politics, Congress, Leaders, Strike, Airport, Inauguration, Kerala.
നിങ്ങളുടെ അഭിപ്രായങ്ങൾ കെവാർത്തയുടെ ഫെയ്‌സ്‌ബുക്ക് പേജിൽ പങ്കുവെക്കാം.
അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ
ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന
നിയമനടപടികൾ നേരിടേണ്ടിവന്നേക്കാം.
