രാജധാനിയില്‍ ടിക്കറ്റ് പരിശോധകരുടെ കീശയിലെത്തുന്നത് ലക്ഷങ്ങള്‍
Sep 13, 2012, 15:06 IST
രാജധാനി എക്‌സ്പ്രസ്സിലെ യാത്രക്കാരായ സ്ത്രീയെയും യുവാവിനെയും മര്‍ദിക്കുകയും പരാതി അന്വേഷിക്കാനെത്തിയ പോലീസ് ഉദ്യോഗസ്ഥനെ ആക്രമിക്കുകയും ചെയ്തതിന് കഴിഞ്ഞ ദിവസം പിടിയിലായ ട്രെയിന്‍ സൂപ്രണ്ട് ഉത്തര്‍പ്രദേശ് സ്വദേശി രോഹിതാഷ് സിംഗ്, ടിടിഇ ഹരിയാനയിലെ സുരേന്ദ്ര പുനായ് എന്നിവരില്‍ നിന്നാണ് കൈക്കൂലിയെക്കുറിച്ചുള്ള ഞെട്ടിപ്പിക്കുന്ന വിവരങ്ങള്‍ പോലീസിന് ലഭിച്ചത്.
ഉന്നത റെയില്‍വെ ഉദ്യോഗസ്ഥരടങ്ങിയ ഡല്‍ഹി മാഫിയയാണ് രാജധാനിയില്‍ ആര്‍ക്കൊക്കെ ടിടിഇമാരായി ഡ്യൂട്ടി നല്‍കണമെന്ന് നിശ്ചയിക്കുന്നതും തീരുമാനിക്കുന്നതും. കൈക്കൂലി ഇനത്തില്‍ കിട്ടുന്ന തുകയില്‍ നിന്ന് 20 ശതമാനം ഡല്‍ഹി മാഫിയയ്ക്ക് കൈമാറണം. രാജധാനിയുടെ ഒറ്റ ഷെഡ്യൂള്‍ യാത്ര പൂര്‍ത്തിയാകുമ്പോള്‍ ടിടിഇമാരുടെ കീശയില്‍ 3.20 ലക്ഷത്തോളം രൂപയും ഡല്‍ഹി മാഫിയയുടെ കൈകളിലേക്ക് ഒരു ലക്ഷത്തോളം രൂപയും എത്തിച്ചേരും.
രാജധാനിയില്‍ പരിശോധന നടത്തേണ്ടത് റെയില്‍വെ ബോര്‍ഡിന്റെ നിയന്ത്രണത്തിലുള്ള വിജിലന്‍സ് വിഭാഗമാണ്. ഓരോ സര്‍വീസ് പൂര്‍ത്തിയാകുമ്പോഴും അരലക്ഷത്തിലേറെ രൂപ അവര്‍ക്കും പടിയായി എത്തുന്നതിനാല്‍ പരിശോധന നടക്കാറില്ല.
ഈ സൗകര്യങ്ങള്‍ മുതലെടുത്ത് ടി .ടി .ഇമാരുടെ പണപ്പിരിവിനുള്ള ആര്‍ത്തിയാണ് യാത്രക്കാര്‍ ആക്രമിക്കപ്പെടുന്നതടക്കമുള്ള പ്രശ്‌നങ്ങള്‍ സൃഷ്ടിക്കുന്നത്. രാജ്യമാകെയുള്ള നഗരങ്ങളെ ഡല്‍ഹിയുമായി ബന്ധിപ്പിച്ചുള്ള 25 രാജധാനി ട്രെയിനുകളില്‍ ഏറ്റവും ലാഭകരമാണ് കേരളത്തിലേക്കുള്ള ട്രെയിന്‍. രാജധാനിയില്‍ ടി.ടി.ഇ മാര്‍ക്ക് ഡെപ്യൂട്ടി ട്രെയിന്‍ സൂപ്രണ്ട് എന്ന പദവിയാണ് നല്‍കുന്നത്. രാജധാനിയില്‍ ഡ്യൂട്ടിക്ക് ഡല്‍ഹിയിലെ ടി.ടി.ഇമാരെ മാത്രമേ പരിഗണിക്കൂ.
രാജധാനിയില്‍ റിസര്‍വേഷന്‍ ടിക്കറ്റില്ലാതെ കയറുന്ന യാത്രക്കാരില്‍ നിന്നും ഉയര്‍ന്ന ക്ലാസിലേക്ക് മാറാന്‍ ആഗ്രഹിക്കുന്നവരില്‍ നിന്നും സാധാരണ ടിക്കറ്റുമായി ഹ്രസ്വയാത്രയ്ക്ക് കയറുന്നവരില്‍ നിന്നുമാണ് ടി.ടി. ഇമാരുടെ കൊള്ളപ്പിരിവ്. സീറ്റൊഴിവുണ്ടെങ്കില്‍ താഴ്ന്ന ക്ലാസിലെ ടിക്കറ്റുകള്‍ ഉയര്‍ന്ന ക്ലാസിലേക്ക് മാറ്റി നല്‍കാമെന്ന് രാജധാനിയുടെ നിയമാവലിയിലുണ്ട്.
ഡല്‍ഹിയില്‍ നിന്ന് തിരുവനന്തപുരത്തേക്കുള്ള രാജധാനിയില്‍ ഒന്നാംക്ലാസില്‍ 6220ഉം രണ്ടാംക്ലാസില്‍ 3620ഉം മൂന്നാംക്ലാസില്‍ 2410ഉം രൂപയാണ് നിരക്ക്. മറ്റ് ട്രെയിനുകളിലെ ഒന്നാംക്ലാസ് ടിക്കറ്റുമായി രാജധാനിയിലെ രണ്ടാംക്ലാസ് നിരക്കിന് വലിയ വ്യത്യാസമില്ല. ഇതടക്കം എല്ലാ ക്ലാസുകളിലേക്കും ഇരട്ടിതുകയും പിഴയായി മറ്റൊരു വന്‍തുകയും അടക്കണമെന്ന് ടി.ടി.ഇമാര്‍ ആദ്യം നിര്‍ദ്ദേശിക്കും.
പിഴ ഒഴിവാക്കുകയും ഒന്നാംക്ലാസിന്റെ നിരക്കായ 6220 രൂപ നല്‍കിയാല്‍ യാത്ര അനുവദിക്കാമെന്നുമാവും അടുത്തഘട്ടം.
ചില ടി.ടി.ഇമാര്‍ രണ്ടാംക്ലാസ് ടിക്കറ്റിന്റെ ഇരട്ടിയാണ് വാങ്ങുന്നത്. ഈ തുകയ്ക്ക് രസീത് നല്‍കാതെ ഒഴിവുള്ള സീറ്റുകളില്‍ യാത്ര അനുവദിക്കുകയാണ് രീതി. തിരുവനന്തപുരത്തു നിന്ന് മംഗലാപുരത്തേക്കോ ഗോവയിലേക്കോ പോകേണ്ടവരില്‍ നിന്നും ഡല്‍ഹിക്കുള്ള നിരക്ക് ഈടാക്കുന്നതും പതിവാണ്.
നൂറുകണക്കിന് യാത്രക്കാരാണ് ഇത്തരത്തില്‍ ടി.ടി.ഇമാരുടെ കൊള്ളയ്ക്ക് ഇരയാവുന്നത്. കേരള രാജധാനിയിലെ കൈക്കൂലി മാഫിയയെക്കുറിച്ച് സ്ഥിരയാത്രക്കാരായ പന്‍വേലിലെയും മംഗലാപുരത്തേയും വ്യവസായികള്‍ സി.ബി.ഐക്ക് പരാതി നല്‍കിയിട്ടുണ്ട്.
Keywords: Train, Ticket, Attack, Police, Reservation, CBI, Kerala, Rajadhani Express
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
