Oommen Chandy | ഉമ്മന്‍ചാണ്ടി ഉള്‍പെടെയുള്ള 6 പേര്‍ക്കെതിരെയും കേസുമായി മുന്നോട്ട് പോകുമെന്ന് സോളാര്‍ പീഡനക്കേസിലെ പരാതിക്കാരി

ഉമ്മന്‍ചാണ്ടിയുടെ ആരോഗ്യാവസ്ഥ പരിഗണിച്ചാണ് നിയമ നടപടിക്ക് പോകാത്തതെന്നും ബാക്കിയുള്ളവര്‍ക്ക് ക്ലീന്‍ചിറ്റ് നല്‍കിയ സി ബി ഐ റിപോര്‍ട് തള്ളണമെന്ന് ആവശ്യപ്പെട്ട് കോടതിയെ സമീപിക്കുമെന്നും പരാതിക്കാരി പറഞ്ഞിരുന്നു.

എന്നാല്‍ ഇപ്പോള്‍ ഉമ്മന്‍ചാണ്ടി ഉള്‍പെടെയുള്ള ആറ് പേര്‍ക്കെതിരെയും ഹര്‍ജി നല്‍കുമെന്നാണ് പരാതിക്കാരി അറിയിച്ചിരിക്കുന്നത്. നിയമോപദേശത്തിന്റെ അടിസ്ഥാനത്തിലാണ് നിലപാട് മാറ്റിയതെന്നും അവര്‍ വ്യക്തമാക്കി.

സോളാര്‍ കേസില്‍ ഉമ്മന്‍ ചാണ്ടിക്കും എ പി അബ്ദുല്ലക്കുട്ടിക്കും കൂടി സി ബി ഐ ക്ലീന്‍ ചീറ്റ് നല്‍കിയ സാഹചര്യത്തില്‍ പ്രതികരണം തേടിയപ്പോഴാണ് പരാതിക്കാരി ഇക്കാര്യം വ്യക്തമാക്കിയത്. പീഡിപ്പിച്ചതിന് തെളിവില്ലെന്ന് കാണിച്ചാണ് തിരുവനന്തപുരം സി ജെ എം കോടതിയില്‍ സി ബി ഐ റിപോര്‍ട് നല്‍കിയത്.

ഉമ്മന്‍ ചാണ്ടി ക്ലിഫ് ഹൗസില്‍ വെച്ച് പരാതിക്കാരിയെ പീഡിപ്പിച്ചെന്നായിരുന്നു ആരോപണം. എന്നാല്‍ ഇത് വസ്തുതകളില്ലാത്ത ആരോപണമാണെന്ന് സി ബി ഐ കണ്ടെത്തി. പരാതിക്കാരി പറയുന്ന ദിവസം ഉമ്മന്‍ചാണ്ടി ക്ലിഫ് ഹൗസിലുണ്ടായിരുന്നില്ലെന്ന് സി ബി ഐ റിപോര്‍ടില്‍ പറയുന്നു.

തിരുവനന്തപുരം മാസ്‌കറ്റ് ഹോടെലില്‍ വെച്ച് അബ്ദുല്ലക്കുട്ടി പീഡിപ്പിച്ചെന്നായിരുന്നു മറ്റൊരു ആരോപണം. സോളാര്‍ പീഡനത്തില്‍ ആദ്യം രെജിസ്റ്റര്‍ ചെയ്ത കേസാണിത്. എന്നാല്‍, ഈ ആരോപണത്തിലും തെളിവില്ലെന്ന് സി ബി ഐ കോടതിയെ അറിയിച്ചു.

കേസില്‍ നേരത്തെ ഹൈബി ഈഡന്‍, അടൂര്‍ പ്രകാശ്, എ പി അനില്‍കുമാര്‍, കെ സി വേണുഗോപാല്‍ എന്നിവര്‍ക്ക് സി ബി ഐ ക്ലീന്‍ ചിറ്റ് നല്‍കിയിരുന്നു.

Keywords:  Complainant of solar harassment case says to proceed with case, Thiruvananthapuram, News, Politics, Allegation, Complaint, CBI, Kerala.