Inauguration | ചൊറുക്കള - നെടുമുണ്ട റോഡ് നവീകരണ പ്രവൃത്തി ഉദ്ഘാടനം ചെയ്തു

തളിപ്പറമ്പ്: (KVARTHA) തളിപ്പറമ്പ് - ഇരട്ടി സംസ്ഥാന പാതയിലെ (എസ് എച് - 36 )ചൊറുക്കള - നെടുമുണ്ട പിഡബ്ല്യുഡി റോഡ് ബിസി ഓവര്‍ലേ ചെയ്ത് നവീകരിക്കുന്നതിന്റെ പ്രവൃത്തി ഉദ്ഘാടനം എം വി ഗോവിന്ദന്‍ മാസ്റ്റര്‍ എംഎല്‍എ നിര്‍വഹിച്ചു. പിഡബ്ല്യുഡി പ്ലാന്‍ തുകയില്‍ നിന്നും രണ്ട് കോടി രൂപയാണ് ഇതിനായി അനുവദിച്ചത്.

ആകെ 46 കി മീ നീളമുള്ള ഈ റോഡ് തളിപ്പറമ്പ് ദേശീയപാതയിലെ ചിറവക്കില്‍ നിന്നും ആരംഭിച്ച് ഇരിട്ടി പാലത്തിനു സമീപം അവസാനിക്കുന്നതാണ്. തളിപ്പറമ്പ്, ഇരിക്കൂര്‍, പേരാവൂര്‍, മട്ടന്നൂര്‍ നിയോജക മണ്ഡലങ്ങളിലൂടെ കടന്നു പോകുന്ന റോഡാണിത്. ഇതില്‍ 7.200 കിമീ മുതല്‍ 10 കിമീ വരെയുള്ള റോഡാണ് ഇപ്പോള്‍ നവീകരിക്കുന്നത്.

നാല് സെമീ കനത്തില്‍ നിലവിലുള്ള റോഡ് ബിറ്റുമിനസ് കോണ്‍ക്രീറ്റും (ബി സി) കുറുമാത്തൂര്‍ സ്‌കൂളിന് ഇരുവശത്തുമുള്ള താഴ്ന്ന ഭാഗങ്ങള്‍ 38 സെ മീ ഉയര്‍ത്തി ബിറ്റുമിനസ് മെകാഡവും (ബി എം) ബിറ്റുമിനസ് കോണ്‍ക്രീറ്റും (ബി സി) ചെയ്യും. കൂടാതെ ഈ ഭാഗത്ത് ആവശ്യമായ നീളത്തില്‍ ഡ്രെയിനേജുകള്‍ നിര്‍മിച്ച് റോഡ് മാര്‍കിങ്ങുകളും സ്റ്റഡുകളും സൈന്‍ ബോര്‍ഡുകളും സ്ഥാപിക്കും. ഒന്‍പതു മാസം കൊണ്ട് ഇവ പൂര്‍ത്തിയാക്കുകയാണ് ലക്ഷ്യം.

നിര്‍മാണം പൂര്‍ത്തിയാവുന്നതോടെ ഈ ഭാഗത്തെ വെള്ളക്കെട്ടിന് പരിഹാരമാകുമെന്ന് എംഎല്‍എ പറഞ്ഞു.