Drama | കണ്ണിനും കാതിനും നവ്യാനുഭവമൊരുക്കി കുരുന്നുകള്; ആശയം വാചകങ്ങളില് ചുരുക്കാതെ ദൃശ്യ ശബ്ദ വിന്യാസത്തിലൂടെ രംഗാവിഷ്ക്കാരം കൊണ്ട് ശ്രദ്ധ നേടി 'ഉറവകള്'; അരങ്ങിലും പിന്നണിയിലും വിരുത് കാട്ടി കൊച്ചു പെണ്കുട്ടികള്
Nov 24, 2022, 19:08 IST
ADVERTISEMENT
തൃശൂര്: (www.kvartha.com) കുന്നിടിച്ച് പായുന്ന ജെസിബി, കോടാലിക്ക് ഇരയാകുന്ന മരങ്ങള്, ചത്ത് വീഴുന്ന പക്ഷികള്, നിരത്തില് ചീറിപ്പായുന്ന മണല് ലോറികള് ...... കണ്ണിനും കാതിനും നവ്യാനുഭവമൊരുക്കി കുരുന്നുകള്. ആശയം വാചകങ്ങളില് ചുരുക്കാതെ ദൃശ്യ ശബ്ദ വിന്യാസത്തിലൂടെ വേദിയിലെത്തിയ 'ഉറവകള് ഉണ്ടായിരുന്നു' എന്ന നാടകമാണ് രംഗാവിഷ്ക്കാരം കൊണ്ട് ശ്രദ്ധ നേടിയത്. അവതരണത്തിലെ വ്യത്യസ്തതയാലും മികവ് കൊണ്ടും മത്സരത്തില് നാടകം രണ്ടാം സ്ഥാനം കരസ്ഥമാക്കി.
റവന്യൂ ജില്ലാ സ്കൂള് കലോത്സവത്തിന്റെ ഭാഗമായി ഇരിങ്ങാലക്കുട ഡോണ് ബോസ്കോ സ്കൂളില് അരങ്ങേറിയ യു പി വിഭാഗം നാടക മത്സരത്തില് ഗവ.യു പി സ്കൂള് വരടിയം അവതരിപ്പിച്ച 'ഉറവകള് ഉണ്ടായിരുന്നു' എന്ന നാടകമാണ് മികച്ച നിലവാരം പുലര്ത്തിയത്.
ഒ എന് വിയുടെ ഭൂമിക്കൊരു ചരമഗീതം, സുഗതകുമാരിയുടെ 'ഒരു തൈ നടാം നമുക്കമ്മയ്ക്ക് വേണ്ടി..' തുടങ്ങി കവിതാശകലങ്ങളും നാടകത്തിന്റെ ഭാഗമായി. വല്ലച്ചിറ നാടകദ്വീപിന്റെ ഭാഗമായ സുമേഷ് മണിതറയാണ് നാടകത്തിന്റെ രംഗാവിഷ്കാരം നടത്തിയത്.
ജി യു പി എസ് അധ്യാപിക സിന്ധു സെല്വരാജിന്റെ നേതൃത്വത്തില് ഏഴു പെണ്കുട്ടികള് സ്റ്റേജിലും മൂന്നുപേര് സൗണ്ട് നിയന്ത്രണം നടത്തിയും നാടകത്തിന്റെ സമ്പൂര്ണ കൈയടക്കം കുരുന്നുകളില് തന്നെയായിരുന്നു. നാടക ക്യാംപിന്റെ ഭാഗമായി രൂപപ്പെട്ട പ്രമേയം ആയിരുന്നു ഈ നാടകമെന്ന് സുമേഷ് പറഞ്ഞു.
Keywords: Children excelled in drama, Thrissur, News, Children, School, Kerala.
നിങ്ങളുടെ അഭിപ്രായങ്ങൾ കെവാർത്തയുടെ ഫെയ്സ്ബുക്ക് പേജിൽ പങ്കുവെക്കാം.
അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ
ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന
നിയമനടപടികൾ നേരിടേണ്ടിവന്നേക്കാം.
