കൽപറ്റ: (KVARTHA) മുണ്ടക്കൈ ചൂരൽമല ദുരന്ത ബാധിതരുടെ പുനരധിവാസത്തിനായി നിർമ്മിക്കുന്ന ടൗൺഷിപ്പിന് മുഖ്യമന്ത്രി പിണറായി വിജയൻ തറക്കല്ലിട്ടു. കഴിഞ്ഞ എട്ട് മാസക്കാലം ഭയം നിറഞ്ഞ നിമിഷങ്ങളിലൂടെ കടന്നുപോയ നൂറുകണക്കിന് ജീവിതങ്ങൾക്ക് വ്യാഴാഴ്ച പുഞ്ചിരിയുടെ ദിനമായിരുന്നു. ഒരിക്കലും തിരികെ വരില്ലെന്ന് കരുതിയ പഴയ സന്തോഷങ്ങളിലേക്ക് അവർ പതുക്കെ നടന്നടുക്കുകയാണ്. 'ഒപ്പമുണ്ട് സർക്കാർ' എന്ന വാഗ്ദാനം വെറും വാക്കല്ലെന്ന് തെളിയിച്ചുകൊണ്ട് വയനാട് ജില്ലയിലെ കല്പറ്റയിൽ മുണ്ടക്കൈ-ചൂരൽമല ദുരന്തബാധിതർക്കായി സംസ്ഥാന സർക്കാർ നടപ്പാക്കുന്ന മാതൃക ടൗൺഷിപ്പ് പദ്ധതിയുടെ ശിലാസ്ഥാപന ചടങ്ങിൽ പങ്കെടുത്തവരുടെ മുഖങ്ങളിൽ ആശ്വാസവും സന്തോഷവും നിറഞ്ഞുനിന്നു.

കല്പറ്റ ബൈപ്പാസിന് സമീപം എൽസ്റ്റൺ എസ്റ്റേറ്റിലെ വിശാലമായ 64 ഏക്കർ സ്ഥലത്ത് ഉയരുന്ന ഈ മാതൃകാ ടൗൺഷിപ്പ് പദ്ധതിയുടെ ശിലാസ്ഥാപന ചടങ്ങ് ദുരന്തത്തിൽ സർവതും നഷ്ടപ്പെട്ടവരുടെ ആഹ്ലാദത്തിന്റെയും വീണ്ടെടുക്കലിന്റെയും വേദിയായി മാറി. ഓർമ്മകൾ അയവിറക്കി ഗുണഭോക്താക്കൾ പരസ്പരം സംസാരിച്ചപ്പോൾ പലരുടെയും കണ്ഠമിടറി, അവർ പരസ്പരം കെട്ടിപ്പുണർന്ന് സന്തോഷം പങ്കുവെച്ചു. തങ്ങളുടെ ജന്മനാടുകളുടെ ഗൃഹാതുരത്വം അവരെ അലട്ടുന്നുണ്ടെങ്കിലും, കല്പറ്റ നഗരത്തിന്റെ ഹൃദയഭാഗത്ത് ഏഴ് സെന്റ് ഭൂമിയിൽ 1000 ചതുരശ്ര അടി വിസ്തീർണ്ണമുള്ള വീടുകളും എല്ലാവിധ ആധുനിക സൗകര്യങ്ങളുമുള്ള ഒരു ടൗൺഷിപ്പ് യാഥാർത്ഥ്യമാകുന്നതിന്റെ പ്രതീക്ഷയിലാണ് ഓരോ ഗുണഭോക്താവും.

മുണ്ടക്കൈയിലും ചൂരൽമലയിലും പുഞ്ചിരിമട്ടത്തും ഒരുമയോടെ ജീവിച്ചതുപോലെ, ഈ ടൗൺഷിപ്പിലും തങ്ങളുടെ അയൽക്കാരോടും സുഹൃത്തുക്കളോടുമൊപ്പം വേർപിരിയാതെ ജീവിക്കാൻ സാധിക്കുമെന്ന സ്വപ്നത്തിന്റെ തറക്കല്ലിടൽ കൂടിയായിരുന്നു എൽസ്റ്റൺ എസ്റ്റേറ്റിൽ നടന്നത്. ഒരു വലിയ പ്രകൃതിദുരന്തത്തെ സംസ്ഥാന സർക്കാർ ജനങ്ങളുടെ പിന്തുണയോടെ അതിജീവിക്കുന്ന മനോഹരമായ കാഴ്ചയ്ക്കാണ് ഏവരും സാക്ഷ്യം വഹിച്ചത്.

റവന്യൂ-ഭവന നിർമ്മാണ വകുപ്പ് മന്ത്രി കെ രാജൻ ചടങ്ങിൽ അധ്യക്ഷത വഹിച്ചു. പട്ടികജാതി- പട്ടികവർഗ-പിന്നാക്ക ക്ഷേമ വകുപ്പ് മന്ത്രി ഒ ആർ കേളു, രജിസ്ട്രേഷൻ, പുരാവസ്‌തു - പുരാരേഖ വകുപ്പ് മന്ത്രി രാമചന്ദ്രൻ കടന്നപ്പള്ളി, പൊതുമരാമത്ത്, വിനോദസഞ്ചാര വകുപ്പ് മന്ത്രി പി എ മുഹമ്മദ് റിയാസ്, ടി സിദ്ദിഖ് എംഎൽഎ, പ്രിയങ്ക ഗാന്ധി എംപി, പ്രതിപക്ഷ നേതാവ് വി ഡി സതീശൻ, പ്രതിപക്ഷ ഉപനേതാവ് പി കെ കുഞ്ഞാലിക്കുട്ടി തുടങ്ങിയ വിശിഷ്ടാതിഥികളും ചടങ്ങിൽ പങ്കെടുത്തു.

വയനാട് ടൗൺഷിപ്പ് പ്രോജക്ട് സ്പെഷൽ ഓഫീസർ എസ് സുഹാസ് പദ്ധതിയുടെ വിശദമായ റിപ്പോർട്ട് അവതരിപ്പിച്ചു. ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ, കൽപ്പറ്റ നഗരസഭ ചെയർമാൻ ടി ജെ ഐസക്, കൽപ്പറ്റ ബ്ലോക്ക് പഞ്ചായത്ത് പ്രസിഡന്റ് ചന്ദ്രിക കൃഷ്ണൻ, മേപ്പാടി ഗ്രാമപഞ്ചായത്ത് പ്രസിഡന്റ് കെ ബാബു, റവന്യൂ ദുരന്തനിവാരണ വകുപ്പ് പ്രിൻസിപ്പൽ സെക്രട്ടറി ടിങ്കു ബിസ്വാൾ, മറ്റ് ഉന്നതതല ഉദ്യോഗസ്ഥർ, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ എന്നിവരും ചടങ്ങിൽ സന്നിഹിതരായിരുന്നു. ചീഫ് സെക്രട്ടറി ശാരദ മുരളീധരൻ സ്വാഗതവും ജില്ലാ കളക്ടർ ഡി ആർ മേഘശ്രീ നന്ദിയും പറഞ്ഞു.

ദുരന്ത പുനരധിവാസത്തിൽ കേരളം ലോകത്തിന് മാതൃകയെന്ന് മന്ത്രി കെ. രാജൻ

ദുരന്ത പുനരധിവാസത്തിൽ കേരളം ലോകത്തിന് തന്നെ മാതൃകയാണെന്ന് റവന്യൂ- ഭവന നിർമ്മാണ വകുപ്പ് മന്ത്രി കെ.രാജൻ അഭിപ്രായപ്പെട്ടു. ദുരന്ത നിവാരണ പ്രവർത്തനങ്ങളിൽ ലോകം കേരളത്തെ മാതൃകയാക്കും. ദുരന്തബാധിതരെ പലതായി വേർതിരിക്കാതെ ഒരുമിച്ച് ജീവിക്കാൻ വീടൊരുക്കുകയാണ് ഈ ടൗൺഷിപ്പ് പദ്ധതിയിലൂടെ ലക്ഷ്യമിടുന്നത്. കല്പറ്റ എൽസ്റ്റൺ എസ്റ്റേറ്റിൽ നടന്ന ടൗൺഷിപ്പ് ശിലാസ്ഥാപന പരിപാടിയിൽ അധ്യക്ഷത വഹിച്ചു സംസാരിക്കുകയായിരുന്നു അദ്ദേഹം. നിറഞ്ഞ മനസ്സോടെയാണ് എല്ലാവരും ഒത്തുചേർന്നിരിക്കുന്നതെന്നും, കാലമെത്ര കഴിഞ്ഞാലും ജൂലൈ 30 എന്ന ദുരന്തദിനം മനസ്സിൽ മായാതെ നിൽക്കുമെന്നും മന്ത്രി ഓർമ്മിപ്പിച്ചു.

ജാതി-മത-വർണ്ണ വ്യത്യാസമില്ലാതെ ദുരന്ത നിവാരണത്തിൽ കേരളം ഒറ്റക്കെട്ടായി പ്രവർത്തിച്ചത് ലോകം കണ്ടതാണ്. അപ്രതീക്ഷിതമായ ദുരന്തത്തിൽ ചൂരൽമലയ്ക്ക് നഷ്ടപ്പെട്ടതെല്ലാം തിരികെപ്പിടിക്കാനാണ് എല്ലാവരും ഒറ്റക്കെട്ടായി മുന്നിട്ടിറങ്ങുന്നത്. നഷ്ടപ്പെട്ട ഭൂമി, കൃഷി, സ്കൂൾ, റോഡ്, പാലം, കെട്ടിടം എന്നിവയെല്ലാം പുനർനിർമ്മിക്കും. ദുരന്തത്തിൽ നഷ്ടപ്പെട്ടവയിൽ തിരികെ പിടിക്കാൻ സാധ്യമായതെല്ലാം അനുഭവങ്ങളിലൂടെ തിരികെ നൽകുകയാണ് സർക്കാരിന്റെ ലക്ഷ്യം. ദുരന്ത പ്രദേശത്തെ ഭൂമി നഷ്ടപ്പെടുത്തില്ലെന്നും, കൃഷി-മൃഗ സംരക്ഷണ മേഖലയിലെ സാധ്യതകൾ കണ്ടെത്തി നടപ്പാക്കുമെന്നും മന്ത്രി ഉറപ്പുനൽകി.

മൂന്നര കോടി ജനങ്ങളുടെ പിന്തുണയോടെയാണ് സർക്കാർ ദുരന്ത നിവാരണ പ്രവർത്തനങ്ങൾക്ക് നേതൃത്വം നൽകിയത്. ദുരന്തത്തിൽ അപ്രതീക്ഷിതമായി തനിച്ചായവരെ സർക്കാർ ഒരിക്കലും ഒറ്റപ്പെടുത്തില്ലെന്നും, അവസാനത്തെ ദുരന്തബാധിതരെയും പുനരധിവസിപ്പിക്കുമെന്നും മന്ത്രി കൂട്ടിച്ചേർത്തു.

ഈ വാർത്ത എല്ലാവരിലേക്കും എത്തിക്കുക. നിങ്ങളുടെ അഭിപ്രായങ്ങൾ പങ്കുവെക്കുക.

Chief Minister Pinarayi Vijayan laid the foundation stone for the rehabilitation township for the victims of the Mundakkai-Chooralmala disaster in Wayanad. The project aims to provide new hope and a better life for the affected families, with modern housing and facilities.

#WayanadDisaster #Rehabilitation #PinarayiVijayan #KeralaGovernment #DisasterRelief #NewHope