ബണ്ടി ചോറിൻ്റെ കൊച്ചി യാത്ര: ആളൂരിനെ കാണാനെന്ന് മൊഴി, പോലീസ് വിട്ടയച്ചു

കൊച്ചി: (KVARTHA) കുപ്രസിദ്ധ മോഷ്ടാവായ ബണ്ടി ചോറിനെ വിശദമായ ചോദ്യം ചെയ്യലിനുശേഷം എറണാകുളം സൗത്ത് റെയിൽവെ പോലീസ് വിട്ടയച്ചു. സംശയാസ്പദമായി ഒന്നുമില്ലെന്നും, ഇയാൾ നൽകിയ മൊഴികളിൽ വ്യക്തത വരുത്തിയ ശേഷമാണ് വിട്ടയച്ചതെന്നും റെയിൽവെ പോലീസ് അറിയിച്ചു. ദേവേന്ദർ സിംഗ് എന്ന ബണ്ടി ചോർ പോലീസ് സ്റ്റേഷനിൽ നിന്ന് വിട്ടയച്ചശേഷം അഭിഭാഷകൻ ബിഎ ആളൂരിന്റെ ഓഫീസിലേക്കാണ് പോയത്.

ഞായറാഴ്ച രാത്രിയാണ് ബണ്ടി ചോറിനെ എറണാകുളം സൗത്ത് റെയിൽവേ സ്റ്റേഷനിലെ കാത്തിരിപ്പ് മുറിയിൽ നിന്ന് റെയിൽവെ പോലീസ് കസ്റ്റഡിയിൽ എടുത്തത്. സ്ഥിരം പരിശോധനക്കിടെ ഇയാളുടെ മുഖസാദൃശ്യമുള്ള ആളെ ശ്രദ്ധയിൽപ്പെട്ടതിനെ തുടർന്ന് സംശയം തോന്നി കസ്റ്റഡിയിലെടുത്ത് പിന്നീട് സ്ഥിരീകരിക്കുകയായിരുന്നു. രാവിലെ മുതൽ ബണ്ടി ചോർ സ്റ്റേഷനിൽ ഉണ്ടായിരുന്നുവെന്ന് സിസിടിവി ദൃശ്യങ്ങൾ പരിശോധിച്ച് പോലീസ് ഉറപ്പിച്ചു.

കേരളത്തിൽ വന്നത് ആളൂരിനെ കാണാൻ

കേസുമായി ബന്ധപ്പെട്ട് അന്തരിച്ച അഭിഭാഷകൻ ബിഎ ആളൂരിനെ കാണാനാണ് കൊച്ചിയിൽ എത്തിയതെന്നാണ് ബണ്ടി ചോർ പോലീസിനോട് പറഞ്ഞത്. ആളൂർ അന്തരിച്ച വിവരം താൻ എറണാകുളത്ത് എത്തിയതിന് ശേഷമാണ് അറിഞ്ഞതെന്നും അദ്ദേഹം പോലീസിനോട് വെളിപ്പെടുത്തി. തുടർന്ന് എന്ത് ചെയ്യണമെന്ന് ആലോചിച്ച് റെയിൽവേ സ്റ്റേഷനിൽ ഇരിക്കുകയായിരുന്നു എന്നും ബണ്ടി ചോർ മൊഴി നൽകി.

ഹൈക്കോടതി തനിക്ക് അനുകൂലമായി ഒരു ഉത്തരവിട്ടിരുന്നുവെന്നും, ജയിൽ ശിക്ഷ അനുഭവിക്കുന്ന സമയത്ത് പോലീസ് പിടിച്ചുവെച്ച ചില തൊണ്ടിമുതലുകളും കൈവശമുണ്ടായിരുന്ന പണവും വാച്ചുകളും വിട്ടുനൽകാൻ ആയിരുന്നു ആ ഉത്തരവെന്നും ബണ്ടി ചോർ പറഞ്ഞു. അത് കൈപ്പറ്റാൻ വേണ്ടിയാണ് കൊച്ചിയിലെത്തിയതെന്ന ബണ്ടി ചോറിൻ്റെ വിശദീകരണം ആദ്യം പോലീസ് പൂർണ്ണമായും വിശ്വസിച്ചിരുന്നില്ല.

മൊഴി സ്ഥിരീകരിച്ചു, വിട്ടയച്ചു

തുടർന്ന്, തിങ്കളാഴ്ച രാവിലെ പോലീസ് അന്തരിച്ച ബിഎ ആളൂരിൻ്റെ സഹപ്രവർത്തകരെയും, അദ്ദേഹത്തിൻ്റെ സ്ഥാപനമായ ആളൂർ അസോസിയേറ്റ്സിൻ്റെ ജൂനിയർ അഭിഭാഷകരെയും ബന്ധപ്പെട്ടു. ഇതോടെ ബണ്ടി ചോർ നൽകിയ മൊഴി സ്ഥിരീകരിക്കുകയായിരുന്നു. നിലവിലെ കേസുകളിൽ ബണ്ടി ചോർ ജാമ്യത്തിലാണ്. ഹൈക്കോടതിയിൽ നിയമപരമായ ആവശ്യത്തിന് അഭിഭാഷകനെ കാണാൻ വന്നതെന്നാണ് ബണ്ടി ചോറിൻ്റെ വിശദീകരണം സ്ഥിരീകരിച്ചശേഷമാണ് ഇന്ന് വൈകിട്ടോടെ വിട്ടയച്ചത്.

കേരളത്തിൽ ബണ്ടി ചോറിനെതിരേ നിലവിൽ കേസുകളൊന്നും നിലവിലില്ലാത്തതിനാലാണ് കസ്റ്റഡിയിൽ നിന്ന് വിട്ടയച്ചതെന്നും എറണാകുളം സൗത്ത് റെയിൽവെ പോലീസ് അറിയിച്ചു. പതിറ്റാണ്ട് മുമ്പ് വളരെ പേടിയോടെ കേട്ട പേരാണ് ബണ്ടി ചോറിന്റേത്. എറണാകുളം, തൃശൂർ, തിരുവനന്തപുരം ജില്ലകളിലായി മൂന്ന് കേസുകളുണ്ടായിരുന്നതിൽ 2013-ലെ പ്രമാദമായ മോഷണക്കേസിൽ ജയിൽശിക്ഷ അനുഭവിച്ച് 2023-ലാണ് ഇയാൾ പുറത്തിറങ്ങിയത്.

ബണ്ടി ചോറിൻ്റെ വിശദീകരണം നിങ്ങൾ വിശ്വസിക്കുന്നുണ്ടോ? അഭിപ്രായം കമൻ്റ് ചെയ്യുക.

Article Summary: Notorious thief Bunty Chor released from Kochi custody after police verify his legal visit claim.

 #BuntyChor #KochiPolice #BAAloor #TheftCase #KeralaNews #Released