ബൂത്ത് ലെവൽ ഓഫീസറുടെ മരണം: സിപിഎം ഭീഷണിയെക്കുറിച്ചുള്ള ആരോപണത്തിൽ സമഗ്ര അന്വേഷണം വേണമെന്ന് മാർട്ടിൻ ജോർജ്ജ്

കണ്ണൂർ: (KVARTHA) പയ്യന്നൂർ അസംബ്ലി മണ്ഡലത്തിലെ ബൂത്ത് 18-ലെ ബൂത്ത് ലെവൽ ഓഫീസറായ അനീഷ് ജോർജിന്റെ മരണത്തിൽ സമഗ്രമായ അന്വേഷണം വേണമെന്ന് ഡി.സി.സി. പ്രസിഡൻ്റ് അഡ്വ. മാർട്ടിൻ ജോർജ്ജ് ആവശ്യപ്പെട്ടു. കോൺഗ്രസ് അനുഭാവിയായ ബൂത്ത് ലെവൽ അസിസ്റ്റന്റിനെ ഗൃഹസന്ദർശനത്തിന് കൂടെ കൂട്ടിയതിൻ്റെ പേരിൽ സി.പി.എമ്മുകാരിൽ നിന്ന് അനീഷ് ജോർജ്ജിന് ഭീഷണിയുണ്ടായിരുന്നതായി അദ്ദേഹം ആരോപിച്ചു.

അനീഷ് ആത്മഹത്യ ചെയ്ത ദിവസം രാവിലെയും വീടിൻ്റെ പരിസരത്തുനിന്ന് സി.പി.എമ്മുകാർ ഇദ്ദേഹത്തെ ഭീഷണിപ്പെടുത്തിയതായി മനസ്സിലാക്കുന്നു എന്നാണ് മാർട്ടിൻ ജോർജ്ജ് വ്യക്തമാക്കിയത്. ജോലിയുമായി ബന്ധപ്പെട്ട സമ്മർദ്ദങ്ങൾക്കു പുറമെ, ഭരണകക്ഷിയിൽ നിന്നുള്ള മാനസിക സമ്മർദ്ദവും ബി.എൽ.ഒമാർ കണ്ണൂർ ജില്ലയിൽ അനുഭവിക്കുന്നുണ്ടെന്നും അദ്ദേഹം കൂട്ടിച്ചേർത്തു.

ജില്ലയിലെ മിക്കവാറും ബി.എൽ.ഒമാർ സി.പി.എമ്മിൻ്റെ പ്രാദേശിക നേതൃത്വങ്ങൾ പറയുന്നതനുസരിച്ചാണ് ജോലി ചെയ്യുന്നതെന്നും, വോട്ടർപട്ടിക സമഗ്ര പരിഷ്കരണം പൂർണ്ണമായും രാഷ്ട്രീയവൽക്കരിക്കുന്ന സ്ഥിതിയാണെന്നും മാർട്ടിൻ ജോർജ്ജ് ആരോപണമുയർത്തി.

ഇക്കാര്യത്തിൽ തിരഞ്ഞെടുപ്പ് കമ്മീഷൻ ഇടപെടണമെന്നും, ഭരണകക്ഷിയുടെ അനാവശ്യ സമ്മർദ്ദങ്ങൾക്കും ഭീഷണികൾക്കും ബി.എൽ.ഒമാർ ഇരകളാകുന്ന സാഹചര്യം ഒഴിവാക്കണമെന്നും അദ്ദേഹം ആവശ്യപ്പെട്ടു. ഇത്തരം ആത്മഹത്യകൾ ആവർത്തിക്കാതിരിക്കാൻ എസ്.ഐ.ആർ. നടപടികൾ തൽക്കാലം നിർത്തിവയ്ക്കണമെന്നും, മതിയായ സമയമനുവദിച്ച് മാത്രം പുനരാരംഭിക്കണമെന്നും മാർട്ടിൻ ജോർജ്ജ് അധികൃതരോട് ആവശ്യപ്പെട്ടു.

ഈ വിഷയത്തിൽ നിങ്ങളുടെ അഭിപ്രായം കമൻ്റ് ചെയ്യുക. വാർത്ത ഷെയർ ചെയ്യുക. 

Article Summary: DCC President Martin George demands inquiry into BLO Anish George's death, alleging CPM threat and political pressure.

#MartinGeorge #BLO #Kasaragod #CPMThreat #ElectionCommission #AnishGeorge