ആറളം ഫാമിൽ 'ഒരു വീട്ടിൽ ഒരു സംരംഭം' പദ്ധതിക്ക് തുടക്കം; 25 ലക്ഷം രൂപയുടെ ഉപജീവന പദ്ധതികൾ വിതരണം ചെയ്തു

ഇരിട്ടി: (KVARTHA) ആറളം ഫാമിലെ കുടുംബങ്ങളുടെ ജീവിത നിലവാരം മെച്ചപ്പെടുത്താൻ ലക്ഷ്യമിട്ട് 'ഒരു വീട്ടിൽ ഒരു സംരംഭം' പദ്ധതിക്ക് തുടക്കമായി. കുടുംബശ്രീ ജില്ലാ മിഷന്റെയും ആറളം കുടുംബശ്രീ പട്ടികവർഗ പ്രത്യേക പദ്ധതി പ്രവർത്തകരുടെയും നേതൃത്വത്തിലാണ് പദ്ധതി നടപ്പിലാക്കുന്നത്. ഉപജീവന മാർഗങ്ങൾ മെച്ചപ്പെടുത്തുന്നതിന്റെ ഭാഗമായി 25 ലക്ഷം രൂപയുടെ സഹായങ്ങൾ സംരംഭകർക്ക് വിതരണം ചെയ്തു. ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബിനോയ് കുര്യനാണ് പദ്ധതിയുടെ ഉദ്ഘാടനം നിർവഹിച്ചത്.

പദ്ധതിയുടെ ആദ്യ ഘട്ടത്തിൽ ഒൻപത് പേർക്ക് തയ്യൽ മെഷീനുകൾ, 26 പേർക്ക് നാല് വീതം ആടുകൾ, 30 പേർക്ക് പോത്ത് കുട്ടി, 20 പേർക്ക് കോഴിയും കൂടുകളും എന്നിവയാണ് നൽകിയത്. ഒരു വീട്ടിൽ ഒരു സംരംഭം എന്ന ലക്ഷ്യത്തോടെയാണ് പദ്ധതി ആവിഷ്കരിച്ചിരിക്കുന്നത്. അടുത്ത രണ്ട് വർഷത്തിനുള്ളിൽ ആറളം ഫാമിലെ ആറ് ബ്ലോക്കുകളിലെയും മുഴുവൻ വീടുകളിലും ഇത് വ്യാപിപ്പിക്കാനാണ് കുടുംബശ്രീ ലക്ഷ്യമിടുന്നത്.

കാർഷിക മേഖല, സ്വയം തൊഴിൽ, ചെറുകിട സംരംഭങ്ങൾ, തേൻ കൃഷി, കേരള ചിക്കൻ ഫാം, പുൽ തൈലം യൂണിറ്റ്, കുട നിർമ്മാണ യൂണിറ്റ്, പുസ്തക നിർമാണ യൂണിറ്റ്, വളം നിർമാണം, വിത്തുൽപാദനം, ചെറു ധാന്യ കൃഷികൾ, ആഭരണ നിർമാണം, ആയുർവേദ മരുന്ന് യൂണിറ്റ്, തനത് ഭക്ഷ്യ വിഭവങ്ങളുമായി ആറളം സ്‌പെഷ്യൽ കാറ്ററിങ് യൂണിറ്റ്, മുട്ടക്കോഴി വളർത്തൽ, പന്നി പരിപാലനം എന്നിങ്ങനെയുള്ള സംരംഭങ്ങൾക്കാണ് ആദ്യ ഘട്ടത്തിൽ ഊന്നൽ നൽകുക. ഇതിനായി മുഴുവൻ ബ്ലോക്കുകളിലും കുടുംബശ്രീയുടെ നേതൃത്വത്തിൽ സംരംഭകർക്ക് പരിശീലനവും ക്ലാസ്സുകളും നൽകും. നിലവിൽ ആറളം ഫാമിൽ കുടുംബശ്രീയുടേതായി 55 സംരംഭങ്ങൾ പ്രവർത്തിക്കുന്നുണ്ട്. കൂടാതെ, കേരള എക്സൈസ് വിമുക്തി മിഷനുമായി ചേർന്ന് ആറളം മേഖലയിലെ ഉദ്യോഗാർഥികൾക്ക് സൗജന്യ പി എസ് സി പരിശീലനവും നൽകുന്നുണ്ട്.

വളയഞ്ചാലിൽ നടന്ന പരിപാടിയിൽ ആറളം ഗ്രാമപഞ്ചായത്ത് പ്രസിഡന്റ് കെ.പി രാജേഷ് അധ്യക്ഷനായിരുന്നു. ഇരിട്ടി ബ്ലോക്ക് പഞ്ചായത്ത് പ്രസിഡന്റ് കെ വേലായുധൻ, കുടുംബശ്രീ ജില്ലാ മിഷൻ കോ ഓർഡിനേറ്റർ എം.വി ജയൻ, ആറളം സ്പെഷ്യൽ പ്രൊജക്റ്റ് കോ ഓർഡിനേറ്റർ പി സനൂപ്, അസിസ്റ്റന്റ് ജില്ലാ മിഷൻ കോ ഓർഡിനേറ്റർ കെ വിജിത്, മിനി ദിനേശൻ, സുമ ദിനേശൻ, സി ഷൈജു, നിതീഷ് കുമാർ, രമ്യ രാഘവൻ, സിന്ധു ചന്ദ്രൻ എന്നിവർ പങ്കെടുത്തു.

ഈ നല്ല വാർത്ത നിങ്ങളുടെ സുഹൃത്തുക്കളുമായി പങ്കുവയ്ക്കുക.

Article Summary: Kudumbashree's 'One Enterprise Per Household' project launched in Aralam Farm.

#Kudumbashree #AralamFarm #Livelihood #Empowerment #Kerala #RuralDevelopment