അമ്മയോട് പിണങ്ങി റെയിൽവേ ട്രാക്കിൽ ഒളിച്ചിരുന്ന 11-കാരനെ രക്ഷപ്പെടുത്തി; ആളൂർ പോലീസിൻ്റെ അതിസാഹസിക നീക്കം

തൃശൂർ: (KVARTHA) അമ്മയോട് പിണങ്ങി വീടുവിട്ടിറങ്ങി റെയിൽവേ ട്രാക്കിന് സമീപം കാട്ടിൽ ഒളിച്ചിരുന്ന 11-കാരനെ ആളൂർ പോലീസ് അതിസാഹസികമായി രക്ഷപ്പെടുത്തി. ട്രെയിനുകൾ തടഞ്ഞുവെച്ചും ട്രാക്കിലൂടെ കാൽനടയായി തിരച്ചിൽ നടത്തിയുമുള്ള പോലീസിൻ്റെ ജാഗ്രത വലിയൊരു അപകടം ഒഴിവാക്കി. 

മുരിയാട് ഭാഗത്ത് റെയിൽവേ ട്രാക്കിലൂടെ ഒരു ബാലൻ ഓടുന്നത് കണ്ട നാട്ടുകാരിലൊരാൾ അതിവേഗം ആളൂർ പോലീസ് സ്റ്റേഷനിൽ വിവരം അറിയിക്കുകയായിരുന്നു. സന്ദേശം ലഭിച്ചയുടനെ ഡ്യൂട്ടിയിലുണ്ടായിരുന്ന വനിതാ സി പി ഒ സനില വിവരം വയർലെസ് വഴി പെട്രോളിംഗ് സംഘത്തിനും സ്റ്റേഷൻ ഗ്രൂപ്പിലും കൈമാറി. സംഭവത്തിൻ്റെ ഗൗരവം ഉൾക്കൊണ്ട് എസ്എച്ച്ഒ ഹരിക്കുട്ടൻ കെ വി, എസ്ഐ മനു പി ചെറിയാൻ, ഗ്രേഡ് എസ്ഐ ജയകുമാർ കെ എന്നിവരുടെ നേതൃത്വത്തിൽ വിവിധ സംഘങ്ങളായി തിരിഞ്ഞായിരുന്നു തിരച്ചിൽ.

ബാലൻ റെയിൽവേ ട്രാക്കിന് സമീപമുണ്ടെന്ന് ഉറപ്പായതോടെ എസ്എച്ച്ഒ റെയിൽവേ അധികൃതരെ ബന്ധപ്പെടുകയും ആ സമയം പാളത്തിലൂടെ വരേണ്ടിയിരുന്ന ട്രെയിനുകൾ ബ്ലോക്ക് ചെയ്യിപ്പിക്കുകയും ചെയ്തു. തുടർന്ന് ട്രാക്കിലൂടെ കിലോമീറ്ററുകളോളം കാൽനടയായി നടത്തിയ പരിശോധനയിലാണ് സി പി ഒമാരായ ശ്രീജിത്ത് എസ്, സിനേഷ് കെ എസ് എന്നിവർ മുരിയാട് പൂവശ്ശേരിക്കാവ് - മനപ്പടി റെയിൽവേ ഗേറ്റുകൾക്കിടയിലെ കാടിനുള്ളിൽ ഒളിച്ചിരുന്ന കുട്ടിയെ കണ്ടെത്തിയത്.

ട്രെയിൻ വരുന്നത് കാത്ത് മരങ്ങൾക്കിടയിൽ പതുങ്ങിയിരിക്കുകയായിരുന്നു കുട്ടി. പോലീസ് ഉദ്യോഗസ്ഥർ സ്നേഹപൂർവ്വം അനുനയിപ്പിച്ചാണ് ബാലനെ കൂട്ടിക്കൊണ്ടുവന്നത്. തുടർന്ന് കുട്ടിയെ സുരക്ഷിതമായി വീട്ടിലെത്തിച്ച് മാതാപിതാക്കളെ ഏൽപ്പിച്ചു. പോലീസിൻ്റെ സമയോചിതമായ ഇടപെടൽ വലിയൊരു ദുരന്തം ഒഴിവാക്കിയതിൻ്റെ ആശ്വാസത്തിലാണ് നാട്ടുകാരും വീട്ടുകാരും.

പുതിയ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താനും മറക്കരുത്.

Article Summary: Alloor police rescued an 11-year-old boy who was hiding on railway tracks in Thrissur after a quarrel with his mother.

#ThrissurNews #PoliceRescue #RailwaySafety #AlloorPolice #KeralaNews #ChildSafety