ആലപ്പുഴ റെയിൽവേ സ്റ്റേഷനിൽ എടിഎമ്മും പ്രീ-പെയ്ഡ് ഓട്ടോ കൗണ്ടറും വരുന്നു; നിർമാണം സെപ്റ്റംബർ 30-നകം പൂർത്തിയാകുമെന്ന് കെ സി വേണുഗോപാൽ എം പി

ആലപ്പുഴ: (KVARTHA) ആലപ്പുഴ റെയിൽവേ സ്റ്റേഷനിൽ എടിഎമ്മും പ്രീ-പെയ്ഡ് ഓട്ടോ കൗണ്ടറും സ്ഥാപിക്കാനുള്ള നടപടികൾ റെയിൽവേ ആരംഭിച്ചതായി കെസി വേണുഗോപാൽ എംപി അറിയിച്ചു. സ്റ്റേഷനിൽ പ്രീ-പെയ്ഡ് ഓട്ടോ കൗണ്ടർ നിർമിക്കുന്നതിന് പ്രീ-ഫാബ്രിക്കേറ്റഡ് ഘടന സ്ഥാപിക്കുന്നതിനുള്ള പ്രവൃത്തികൾ എത്രയും വേഗം ആരംഭിച്ച് സെപ്റ്റംബർ 30-നകം പൂർത്തിയാക്കുമെന്ന് റെയിൽവേ മന്ത്രാലയം എംപിയെ രേഖാമൂലം അറിയിച്ചിട്ടുണ്ട്. കൗണ്ടറിൻ്റെ പ്രവർത്തനത്തിന് ട്രാഫിക് പൊലീസിൻ്റെ ഭാഗത്തുനിന്നുള്ള സാങ്കേതിക നടപടിക്രമങ്ങൾ സജ്ജീകരിക്കുന്നതിന് സഹായം തേടിയതായും റെയിൽവേ വ്യക്തമാക്കി.

റെയിൽവേയുടെ സ്വന്തം ഫണ്ട്

പ്രീ-പെയ്ഡ് ഓട്ടോ കൗണ്ടർ സ്ഥാപിക്കാനുള്ള തുക എംപി ഫണ്ടിൽനിന്ന് അനുവദിക്കാമെന്ന് കെസി വേണുഗോപാൽ നേരത്തെ റെയിൽവേയെ അറിയിച്ചിരുന്നു. എന്നാൽ, റെയിൽവേയുടെ തനത് ഫണ്ട് ഉപയോഗിച്ച് തന്നെ നിർമാണം നടത്താനുള്ള സന്നദ്ധതയാണ് റെയിൽവേ മന്ത്രാലയം എംപിയെ അറിയിച്ചിട്ടുള്ളത്.

എടിഎമ്മിനുള്ള സ്ഥലം കണ്ടെത്തി

വാണിജ്യ ലൈസൻസിങ് നടപടിക്രമങ്ങൾ പൂർത്തിയാക്കിയ ശേഷം എടിഎം കൗണ്ടർ സൗകര്യവും റെയിൽവേ സ്റ്റേഷൻ പരിസരത്ത് വേഗത്തിൽ സ്ഥാപിക്കും. റെയിൽവേയുടെയും ബാങ്കിൻ്റെയും ഉദ്യോഗസ്ഥർ നടത്തിയ സംയുക്ത പരിശോധനയിൽ എടിഎം കൗണ്ടർ സ്ഥാപിക്കാനുള്ള സ്ഥലം ഇതിനോടകം കണ്ടെത്തിയിട്ടുണ്ടെന്നും റെയിൽവേ മന്ത്രാലയം കെസി വേണുഗോപാൽ എംപിയെ അറിയിച്ചു. പ്രീ-പെയ്ഡ് ഓട്ടോ കൗണ്ടറിൻ്റെയും എടിഎം കൗണ്ടറിൻ്റെയും അഭാവം യാത്രക്കാർക്കുണ്ടാക്കുന്ന ബുദ്ധിമുട്ട് ശ്രദ്ധയിൽപ്പെട്ടതിനെ തുടർന്നാണ് ഇവ സ്ഥാപിക്കുന്നതിനുള്ള ഇടപെടൽ എംപി നടത്തിയത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Alappuzha railway station will soon get an ATM and a pre-paid auto counter.

#Kvartha #AlappuzhaRailwayStation #KCVenugopal #IndianRailways #AlappuzhaNews #MalayalamNews #KeralaRailways #AmmuNews