എയിംസ് ആലപ്പുഴയിൽ തന്നെ, തടഞ്ഞാൽ തൃശ്ശൂരിൽ കൊണ്ടുവരും; കേന്ദ്ര പിന്തുണയുണ്ടെന്ന് സുരേഷ് ഗോപി; എയിംസിനായി പോരാടി കാസർകോടും

തൃശ്ശൂർ: (KVARTHA) എയിംസ് (AIIMS - All India Institute of Medical Sciences) ആലപ്പുഴയിൽ തന്നെ സ്ഥാപിക്കണമെന്ന നിലപാട് ആവർത്തിച്ച് കേന്ദ്രമന്ത്രി സുരേഷ് ഗോപി. അതേസമയം, എയിംസിനായി ശക്തമായ വാദമുയർത്തി കാസർകോടും രംഗത്തുണ്ട്. എൻഡോസൾഫാൻ ദുരിതബാധിതർക്ക് പ്രത്യേക ചികിത്സാ സൗകര്യങ്ങൾ ആവശ്യമായ കാസർകോട് ജില്ല, എയിംസിന് ഏറ്റവും യോഗ്യമായ സ്ഥലമാണെന്ന് വിവിധ സംഘടനകൾ ചൂണ്ടിക്കാട്ടുന്നു.

സുരേഷ് ഗോപിയുടെ നിലപാട്

വികസന കാര്യങ്ങളിൽ മറ്റ് ജില്ലകളെ അപേക്ഷിച്ച് പിന്നോക്കം നിൽക്കുന്ന ആലപ്പുഴയെ മുന്നോട്ട് കൊണ്ടുവരേണ്ടത് നമ്മുടെ കടമയാണെന്ന് സുരേഷ് ഗോപി പറഞ്ഞു. ഈ വിഷയത്തിൽ കേന്ദ്രസർക്കാരിൽ നിന്നും പൂർണ്ണ പിന്തുണ ലഭിച്ചിട്ടുണ്ടെന്നും അദ്ദേഹം വ്യക്തമാക്കി. ഒരു ആവശ്യം എതിർക്കപ്പെട്ടാൽ അതിനുള്ള പ്രതിവിധി താൻ കണ്ടിട്ടുണ്ടെന്നും അദ്ദേഹം കൂട്ടിച്ചേർത്തു. 'രാഷ്ട്രീയ ഉദ്ദേശ്യത്തോടെ അത് ചെയ്യില്ലെന്ന് തീരുമാനിച്ചാൽ പിന്നെ എനിക്ക് എൻ്റെ പ്രധാനമന്ത്രിയുടെ അടുത്തും ആരോഗ്യ മന്ത്രിയുടെ അടുത്തും എനിക്ക് അധികാരമുണ്ട്, അവകാശമുണ്ട്. കേരളത്തിൽനിന്നുള്ള ബിജെപിയുടെ ആദ്യ എംപി എന്ന നിലയിൽ തൃശൂരിന് പിന്നെ അത് നിർബന്ധമാണ്,' സുരേഷ് ഗോപി പറഞ്ഞു. തൃശ്ശൂരിൽ എയിംസിന് സ്ഥലമില്ലെന്നാണ് മുഖ്യമന്ത്രിയുടെ ചീഫ് സെക്രട്ടറി അറിയിച്ചതെങ്കിലും തൃശ്ശൂരിൽ എയിംസ് വരുന്നതിനെ ചിലർ എതിർക്കുന്നത് തനിക്ക് പെരുമയായി മാറുമെന്ന ഭയം കൊണ്ടാണെന്നും സുരേഷ് ഗോപി ആരോപിച്ചു.

കാസർകോടിന്റെ പോരാട്ടം

ആരോഗ്യരംഗത്ത് കേരളത്തിൽ ഏറ്റവും പിന്നോക്കാവസ്ഥയിലുള്ള ജില്ലകളിലൊന്നാണ് കാസർകോട്. കേരളത്തിൽ മൾട്ടി-സൂപ്പർ സ്പെഷ്യാലിറ്റി (Multi-super Specialty) സൗകര്യങ്ങളുള്ള ആശുപത്രി ഇല്ലാത്ത ഏക ജില്ലയാണിത്. എൻഡോസൾഫാൻ ദുരിതബാധിതരായ ആയിരക്കണക്കിന് ആളുകൾക്ക് പ്രത്യേക ചികിത്സ ആവശ്യമായതിനാൽ, ഒരു എയിംസ് ആശുപത്രിയുടെ അനിവാര്യത വളരെ വലുതാണ്. എയിംസ് കാസർകോടിന്റെ അവകാശമാണെന്ന് രാജ്‌മോഹൻ ഉണ്ണിത്താൻ എംപി ഉൾപ്പെടെയുള്ളവർ നേരത്തെ വ്യക്തമാക്കിയിരുന്നു.

കാസർകോടിന്റെ ആവശ്യം ഉന്നയിച്ച് വിദ്യാർത്ഥികളും പൊതുജനങ്ങളും ഉൾപ്പെടെയുള്ളവർ വലിയ പ്രക്ഷോഭങ്ങൾ നടത്തിയിരുന്നു. അടുത്തിടെ രാജപുരം കോളേജിലെ നാഷണൽ സർവീസ് സ്കീം (National Service Scheme - NSS) വിദ്യാർത്ഥികൾ പതിനായിരം പേർ ഒപ്പിട്ട ഭീമഹർജി പ്രധാനമന്ത്രി, കേന്ദ്ര ആരോഗ്യമന്ത്രി, കേരള മുഖ്യമന്ത്രി, കേരള ആരോഗ്യമന്ത്രി എന്നിവർക്ക് അയച്ചിരുന്നു. എൻഡോസൾഫാൻ ഇരകളും, വർഷങ്ങളോളം സമരം നടത്തിയ 'എയിംസ് കാസർകോട് ജനകീയ കൂട്ടായ്മ' പോലുള്ള സംഘടനകളും ഈ വിഷയത്തിൽ നിരന്തരമായ ഇടപെടലുകലും കോടതിവ്യവഹാരങ്ങളും നടത്തുന്നുണ്ട്.

സർക്കാർ നിലപാടും വെല്ലുവിളികളും

കേരളത്തിന് എയിംസ് അനുവദിക്കണമെന്ന ആവശ്യം കേന്ദ്രത്തിന്റെ പരിഗണനയിലാണ്. തിരുവനന്തപുരം, കോഴിക്കോട് ജില്ലകളാണ് എയിംസിനായി സംസ്ഥാന സർക്കാർ കേന്ദ്രത്തിന് നിർദേശിച്ചിരുന്നത്. കോഴിക്കോട്ടെ കിനാലൂരിൽ എയിംസിനായി 200 ഏക്കർ സ്ഥലം കണ്ടെത്തിയെന്നും സർക്കാർ അറിയിച്ചിരുന്നു. എന്നാൽ ഈ തീരുമാനം ചോദ്യം ചെയ്ത് എയിംസ് കാസർകോട് ജനകീയ കൂട്ടായ്മ കേരള ഹൈക്കോടതിയിൽ ഹർജി നൽകിയിരുന്നു. ഈ ഹർജി പരിഗണിച്ച് എയിംസ് തിരഞ്ഞെടുക്കുന്നതിന് കേന്ദ്ര സർക്കാർ മാനദണ്ഡങ്ങൾ പാലിച്ചിട്ടുണ്ടോയെന്ന് അറിയിക്കാൻ ഹൈക്കോടതി സംസ്ഥാന സർക്കാരിനോട് ആവശ്യപ്പെട്ടിരുന്നു.

സംസ്ഥാനത്ത് മെഡിക്കൽ വിദ്യാഭ്യാസ മേഖലയിൽ വലിയ പുരോഗതി ഉണ്ടായിട്ടുണ്ടെങ്കിലും, കാസർകോട് ജില്ലയിലെ മെഡിക്കൽ കോളേജ് പൂർണ്ണമായി പ്രവർത്തനക്ഷമമല്ലാത്തത് വലിയ തിരിച്ചടിയാണ്. നിലവിൽ ഇവിടെ അക്കാദമിക് ബ്ലോക്ക് മാത്രമാണ് പ്രവർത്തിക്കുന്നത്. മെഡിക്കൽ കോളേജ് പൂർണ്ണതോതിൽ പ്രവർത്തനസജ്ജമാക്കാൻ കൂടുതൽ തസ്തികകളും, അടിസ്ഥാന സൗകര്യങ്ങളും ഒരുക്കേണ്ടതുണ്ടെന്ന് വിവിധ കോണുകളിൽ നിന്നും അഭിപ്രായങ്ങൾ ഉയർന്നിരുന്നു. ഈയടുത്താണ് മെഡിക്കൽ കോളജിൽ ക്ലാസ് ആരംഭിക്കാനുള്ള കേന്ദ്രാനുമതി ലഭിച്ചതും തുടർനടപടികൾ ആരംഭിച്ചതും.

ഈ വിഷയത്തിൽ നിങ്ങളുടെ അഭിപ്രായം എന്താണ്? കമന്റ് ചെയ്യൂ.

Article Summary: Suresh Gopi favors AIIMS in Alappuzha, Kasaragod fights for it.