Adv P Santhosh Kumar | ലക്ഷക്കണക്കിനാളുകളെ ബാധിക്കുന്ന വിഷയങ്ങളെ കേന്ദ്രം ലാഘവത്തോടെ കാണുന്നു: അഡ്വ പി സന്തോഷ് കുമാര്‍ എം പി

കണ്ണൂര്‍: (www.kvartha.com) ലക്ഷക്കണക്കിനാളുകളെ ബാധിക്കുന്ന വിഷയങ്ങളെ കേന്ദ്രം ലാഘവത്തോടെയാണ് കാണുന്നതെന്ന് അഡ്വ പി സന്തോഷ് കുമാര്‍ എം പി. ബഫര്‍സോണുമായി ബന്ധപ്പെട്ടുള്ള സുപ്രീം കോടതിയുടെ ഉത്തരവിനെയും അതുപോലെ തന്നെ വര്‍ധിച്ചു വരുന്ന വിമാനക്കൂലിയെ സംബന്ധിച്ചുമെല്ലാം നിരുത്തരവാദിത്തപരമായ സമീപനമാണ് കേന്ദ്രസര്‍കാര്‍ കൈക്കൊള്ളുന്നത് എന്നും അദ്ദേഹം ആരോപിച്ചു.

ബഫര്‍ സോണ്‍ വിഷയത്തില്‍ സുപ്രീം കോടതിയുടെ ഉത്തരവ് പുറത്തിറങ്ങിയ ഉടന്‍ വിഷയത്തില്‍ അടിയന്തിരമായി ഇടപെടണം എന്നാവശ്യപ്പെട്ട് എഴുതിയ കത്തിനുള്ള മറുപടിയില്‍ കേന്ദ്രമന്ത്രി പറയുന്നത് സുപ്രീം കോടതി ഉത്തരവില്‍ ജനങ്ങളെ കുടിയൊഴിപ്പിക്കും എന്ന് പറയുന്നില്ല എന്ന് മാത്രമാണ്.

കൊമേഴ്സ്യല്‍ മൈനിങ്, ക്വാറികള്‍, ക്രഷിങ് യൂനിറ്റുകള്‍ തുടങ്ങിയവ മാത്രമാണ് നിരോധിക്കുന്നതെന്നും മറ്റുള്ളവ 'പൊതുവായി നിയന്ത്രിക്കുക' മാത്രമാണ് ചെയ്യുകയെന്നുമാണ് മന്ത്രി മറുപടിയില്‍ അറിയിച്ചത്. എന്നാല്‍ 'നിയന്ത്രണങ്ങളുടെ' വിശാലമായ അര്‍ഥം അദ്ദേഹം പരിഗണിക്കുന്നില്ലെന്നും ജനങ്ങളുടെ ആശങ്കകളെ നിസാരവത്കരിക്കുകയാണ് ചെയ്യുന്നതെന്നും എം പി ആരോപിച്ചു.

കോടതി ഉത്തരവിലെ 44 എഫ് -ല്‍ വ്യക്തമായി പറയുന്നത് ഒരു കിലോമീറ്റര്‍ പരിധി പൊതുജനാഭിപ്രായം പരിഗണിച്ചുകൊണ്ട് മാറ്റം വരുത്തണമെങ്കില്‍ സംസ്ഥാനസര്‍കാര്‍ സെന്‍ട്രല്‍ എംപവേര്‍ഡ് കമറ്റിയെയും, വനം-പരിസ്ഥിതി മന്ത്രാലയത്തേയും സമീപിക്കണം എന്നാണ്.