Arrested | സംവിധായകന്‍ ജോഷിയുടെ പനമ്പിള്ളിനഗറിലെ വീട്ടില്‍ കവര്‍ച നടത്തിയ പ്രതി കര്‍ണാടകയില്‍ അറസ്റ്റില്‍; പിടിയിലായത് മോഷണമുതലുമായി മടങ്ങുന്നതിനിടെ; എത്തിയത് മുംബൈയില്‍നിന്ന്

മോഷണത്തിനുശേഷം മടങ്ങുന്നതിനിടെയാണ് ഇയാള്‍ പിടിയിലായത്. പ്രതി വലയിലായ വിവരമറിഞ്ഞ് കൊച്ചിയില്‍ നിന്നുള്ള പൊലീസ് സംഘം ഉഡുപ്പിയിലേക്ക് തിരിച്ചു. പ്രതിയെ അധികം വൈകാതെ കൊച്ചിയിലേക്ക് കൊണ്ടുവരുമെന്നാണ് വിവരം.

എറണാകുളം സൗത് പൊലീസ് പറയുന്നത്: പുലര്‍ചെ മോഷണത്തില്‍ ഒരു കോടിയിലേറെ വിലമതിക്കുന്ന സ്വര്‍ണ, വജ്ര ആഭരണങ്ങളാണ് പ്രതി കവര്‍ന്നത്. മോഷ്ടാവിന്റെ സിസിടിവി ദൃശ്യങ്ങള്‍ പൊലീസിന് ലഭിച്ചിരുന്നു. പനമ്പിള്ളിനഗറിലെ 10 ബി ക്രോസ് റോഡ് സ്ട്രീറ്റ് ബിയിലെ വീട്ടില്‍നിന്ന് ശനിയാഴ്ച രാത്രി ഒന്നരയ്ക്കും രണ്ടിനും ഇടയിലാണ് മോഷണം നടന്നതെന്നാണ് സി സി ടിവി ദൃശ്യങ്ങളില്‍ നിന്ന് വ്യക്തമായത്.

വീടിന്റെ പിന്‍ഭാഗത്ത് കൂടിയെത്തി അടുക്കളയുടെ ജനല്‍ തുറന്നാണ് മോഷ്ടാവ് ഉള്ളില്‍ കയറിയത്. തൊപ്പി ധരിച്ചെത്തിയ മോഷ്ടാവ് ജനലിന് സമീപത്തെത്തുന്നതും ജനല്‍ തുറക്കുന്നതുമായ ദൃശ്യങ്ങളാണ് സി സി ടി വിയില്‍ നിന്ന് പൊലീസിന് ലഭിച്ചത്. ഇതിനുശേഷമുള്ള ദൃശ്യങ്ങള്‍ ലഭിക്കാത്തത് മോഷ്ടാവ് സി സി ടി വി കാമറകള്‍ മറുവശത്തേക്ക് തിരിച്ചു വച്ചതിനാലാണ്. കയ്യുറ ധരിച്ചാണ് മോഷ്ടാവ് എത്തിയത്.

വീടിന്റെ മുകള്‍ നിലയിലെ കിടപ്പുമുറിയിലെ അലമാര കുത്തിപ്പൊളിച്ച് ജോഷിയുടെ മകനും സംവിധായകനുമായ അഭിലാഷിന്റെ മുറിയില്‍ സൂക്ഷിച്ചിരുന്ന, ഒരു സെറ്റ് വജ്ര നെക്ലസ്, 10 വജ്രമോതിരങ്ങള്‍, 12 വജ്ര കമ്മല്‍, രണ്ട് സ്വര്‍ണ വങ്കി(മോതിരം), 10 സ്വര്‍ണമാലകള്‍, 10 സ്വര്‍ണ വള, 10 വാചുകള്‍ എന്നിവയാണ് പ്രതി കവര്‍ന്നത്.