ഭാമനാവത്ത്

(KVARTHA) കുട്ടിക്കാലത്തു തന്നെ വളരെയധികം ചിത്രങ്ങൾ വരച്ച് ലോകത്തെ അതിശയിപ്പിച്ച ചിത്രകാരനായിരുന്നു ക്ലിന്റ്. ഉദിക്കും മുമ്പ് അസ്തമിച്ച അത്ഭുത പ്രതിഭയായ ക്ലിൻ്റ്, കേവലം ആറു വർഷവും 10 മാസവും 26 ദിവസവും മൂന്നു മണിക്കൂറും മാത്രം നീണ്ടുനിന്ന ജീവിതത്തിൽ 26000-ലേറെ ചിത്രങ്ങൾ വരച്ച അത്ഭുത പ്രതിഭയായിരുന്നു (1976–1983).

ശൈശവ ജീവിതം പോലും ആസ്വദിച്ച് തീരാൻ ഇടവരാതെ ക്ലിന്റ് ഈ ലോകത്തോട് വിടവാങ്ങിയിട്ട് ഇന്നേക്ക് 42 വർഷം പൂർത്തിയാവുകയാണ്. ഒരു ദിവസം നൂറ് ചിത്രങ്ങൾ വരെ വരച്ചിട്ടുള്ള ക്ലിന്റ് ഇന്ന് ജീവിച്ചിരിപ്പുണ്ടായിരുന്നെങ്കിൽ പോലും കേവലം 49 വയസ്സ് മാത്രമേ പ്രായമുണ്ടാകുമായിരുന്നുള്ളൂ.

ചിത്രകലയെ സ്നേഹിക്കുന്നവർക്കും ചിത്രകലാ ബോധമുള്ളവർക്കും ക്ലിന്റ് എന്ന ഏഴ് വയസ്സുകാരൻ സൃഷ്ടിച്ച കലാവിരുന്നുകൾ എന്നും അത്ഭുതത്തോടും നഷ്ടബോധത്തോടും കൂടി മാത്രമേ നോക്കിനിൽക്കാൻ സാധിക്കൂ. കഥ കേൾക്കാൻ ഏറെ ഇഷ്ടമുള്ള കുട്ടിയായിരുന്നു ക്ലിന്റ്. അച്ഛൻ വാങ്ങിക്കൊണ്ടുവരുന്ന പുസ്തകങ്ങളിൽ നിന്നും അമ്മ പറഞ്ഞു കൊടുക്കുന്ന കഥകൾ അവന്റെ ഭാവനയെ പ്രായത്തിനപ്പുറം കാഴ്ചയുടെ വിശാല ലോകത്തിലേക്ക് പറത്തി വിട്ടു.

ചെറിയ കല്ലെടുത്ത് വീടിന്റെ നടുമുറിയിൽ വൃത്തം വരച്ചു തുടങ്ങിയ ക്ലിന്റ് പിന്നീട് ക്രയോൺസിലും ജലച്ചായത്തിലും ഓയിൽ പെയിന്റിങ്ങിലും ഒക്കെ വിസ്മയം കാട്ടി. പക്ഷികളും മൃഗങ്ങളും പ്രകൃതിയും തീവണ്ടിയും വിമാനവും ഒക്കെ അവൻ ഉത്സവ കാഴ്ചകളാക്കി. ഭഗവാന്റെ വിശ്വരൂപം മുതൽ ശരശയ്യ വരെ ഉൾപ്പെട്ട മഹാഭാരത ചിത്ര പരമ്പര ഒരു കുഞ്ഞു ചെയ്തതാണോ എന്ന് പലർക്കും വിശ്വസിക്കാൻ സാധിച്ചിട്ടില്ല.

1976 മേയ് 19-ന് എം.ടി. ജോസഫ് - ചിന്നമ്മ ദമ്പതികൾക്ക് ജനിച്ച ഏക മകനായിരുന്നു ക്ലിന്റ് എന്ന ചുരുക്കപ്പേരിൽ വിളിച്ചിരുന്ന എഡ്മണ്ട് തോമസ് ക്ലിന്റ്. തന്റെ വീടിന്റെ അടുത്തുള്ള ക്ഷേത്രങ്ങളിലെ ആഘോഷങ്ങളുടെ ചിത്രങ്ങൾ വരയ്ക്കുന്നതിനായിരുന്നു ക്ലിന്റിന് ഏറെ താൽപര്യം. സാധാരണ രീതിയിൽ വർഷങ്ങളുടെ തപസ്യകൊണ്ടു മാത്രം വരച്ചുതീർക്കാൻ കഴിയുന്ന മനോഹരമായ അനവധി ചിത്രങ്ങൾ ക്ലിന്റ് തന്റെ ക്ഷണികമായ ജീവിതത്തിനുള്ളിൽ വരച്ചു തീർത്തിരുന്നു. ക്ലിന്റിന് 5 വയസ്സുള്ളപ്പോൾ തന്നെ ചിത്രരചനാ മത്സരങ്ങളിലും മറ്റും സമ്മാനങ്ങൾ ലഭിക്കുകയുണ്ടായി.

ക്ലിന്റ് വരച്ച ചിത്രങ്ങളുടെ പ്രദർശനങ്ങൾ തിരുവനന്തപുരത്ത് നടക്കുകയുണ്ടായി. കൂടാതെ ക്ലിന്റിന്റെ ഓർമ്മക്കായി ചിത്രരചനാ മത്സരവും നടന്നുവരാറുണ്ട്.

വളരെ ചെറുപ്പത്തിൽ മരണമടയുന്ന അസാമാന്യ സംഗീതപാടവമുള്ള ഒരു കുട്ടിയുടെ കഥ പറയുന്ന ചിത്രമായിരുന്ന ആനന്ദഭൈരവി എന്ന മലയാള ചലച്ചിത്രത്തിന്റെ പ്രചോദനം ക്ലിന്റിന്റെ ജീവിതമായിരുന്നു എന്ന് സംവിധായകൻ ജയരാജ് പറയുന്നു. മൂന്നാമത്തെ വയസ്സിൽ പനിക്ക് നൽകിയ മരുന്നിന് പ്രത്യാഘാതം മൂലം വൃക്കകൾക്കു സംഭവിച്ച ഗുരുതരമായ രോഗം മൂലം തന്റെ ഏഴാമത്തെ ജന്മദിനത്തിനു മുമ്പായി 1983 ഏപ്രിൽ 15-ന് വിഷുദിനത്തിൽ ക്ലിന്റ് മരണമടയുമ്പോൾ ഈ ഭൂമിയിൽ ക്ലിന്റ് ജീവിച്ചത് 2522 ദിവസങ്ങൾ മാത്രമാണ്.

ക്ലിന്റിന്റെ ചിത്രങ്ങളെക്കുറിച്ചും ജീവിതത്തെക്കുറിച്ചും നിങ്ങളുടെ അഭിപ്രായങ്ങൾ പങ്കുവെക്കുക.

Clint was a child prodigy in drawing, drawing over 26,000 drawings before he died at the age of seven.

#Clint #Kerala #ChildProdigy #ArtHistory #Inspiration #KeralaArts