ലോക്‌സഭാ തെരഞ്ഞെടുപ്പില്‍ കേരളത്തില്‍ ജനവിധി തേടുന്നത് 227 സ്ഥാനാര്‍ത്ഥികള്‍; ഏറ്റവും കൂടുതല്‍ പേര്‍ മത്സരിക്കുന്നത് രാഹുല്‍ ഗാന്ധിക്കെതിരെ

തിരുവനന്തപുരം: (www.kvartha.com 08.04.2019) ലോക്‌സഭ തെരഞ്ഞെടുപ്പില്‍ മത്സരിക്കുന്ന സ്ഥാനാര്‍ത്ഥികള്‍ക്ക് നാമനിര്‍ദേശ പത്രിക പിന്‍വലിക്കാനുള്ള തീയതി അവസാനിച്ചതോടെ കേരളത്തില്‍ തെരഞ്ഞെടുപ്പിന് അന്തിമരൂപമായി. 20 മണ്ഡലങ്ങളില്‍ നിന്നായി 227 സ്ഥാനാര്‍ത്ഥികളാണ് ഇത്തവണ കേരളത്തില്‍ ജനവിധി തേടുന്നത്. 16 പേര്‍ പത്രിക പിന്‍വലിക്കുകയായിരുന്നു.

ഏറ്റവും കൂടുതല്‍ പേര്‍ മത്സരിക്കുന്നത് രാഹുല്‍ ഗാന്ധിക്കെതിരെയാണ്. രാഹുല്‍ മത്സരിക്കുന്ന വയനാട് മണ്ഡലത്തില്‍ 20 സ്ഥാനാര്‍ത്ഥികളാണുള്ളത്. അതേസമയം ഏറ്റവും കുറവ് സ്ഥാനാര്‍ത്ഥികള്‍ ആലത്തൂര്‍ മണ്ഡലത്തിലാണ്. ആറ് പേര്‍ മാത്രമാണ് ഇവിടെ മത്സരരംഗത്തുള്ളത്.

ആറ്റിങ്ങലില്‍ 19 സ്ഥാനാര്‍ത്ഥികളും തിരുവനന്തപുരത്ത് 17 ഉം കോഴിക്കോട്ട് 14 പേരും മത്സരിക്കും. കാസര്‍കോട്: 9, കണ്ണൂര്‍: 13, വയനാട്: 20, വടകര: 12, പൊന്നാനി: 12, മലപ്പുറം: 8, പാലക്കാട്: 9, തൃശൂര്‍: 8, ചാലക്കുടി: 13, എറണാകുളം: 13, ഇടുക്കി: 8, കോട്ടയം: 7, ആലപ്പുഴ: 12, മാവേലിക്കര: 10, പത്തനംതിട്ട: 8, കൊല്ലം: 9 എന്നിങ്ങനെയാണ് മറ്റു മണ്ഡലങ്ങളിലെ കണക്ക്.