അന്തര്‍ജില്ലാ മോഷണ സംഘം പിടിയില്‍

പന്തളം: അന്തര്‍ജില്ലാ മോഷണ സംഘം പിടിയില്‍. ശനിയാഴ്ച രാവിലെ കീരുകുഴി റബര്‍ മാര്‍­ക്ക­റ്റിംഗ് സൊസൈറ്റി കുത്തിത്തുറന്ന് കവര്‍ച്ച നടത്താനുള്ള ശ്രമം നടത്തുമ്പോഴാണ് അന്തര്‍ ജില്ലാ കവര്‍ച്ചാ സംഘത്തിലെ നാലുപേരെ ആയുധങ്ങള്‍ സഹി­തം പോലീസ് അറസ്റ്റുചെയ്ത­ത്.

കൊല്ലം കുണ്ടറ ഇളമ്പള്ളൂര്‍ പെരുമ്പുഴ അശ്വതി ഭവനില്‍ മനോജ്(19), ഓച്ചിറ തുണ്ടുപറമ്പില്‍ പഴുക്ക അനി എന്ന് വിളിക്കുന്ന അനില്‍ കുമാര്‍(40), പാലമേല്‍ ആദിക്കാട്ടുകുളങ്ങര മരുതിങ്കല്‍ പൂങ്കുവിളവീട്ടില്‍ നാസര്‍(38), കുമളി റോസപ്പൂക്കണ്ടം ആദിവാസി കോളനി അ­ബ്ദുല്ല (23) എന്നിവരാണ് പിടിയിലായ­ത്.

പത്തനംതിട്ട ജില്ലയ്ക്ക് അകത്തും പുറത്തുമായി ഒട്ടേറെ കേസുകളിലെ പ്രതികളാണ് ഇവരെന്ന് പോലീസ് പറഞ്ഞു. വീടുകളും കടകളും കുത്തിത്തുറന്ന് മോഷണം നടത്തുന്ന സംഘത്തിലെ പിടിയിലായവര്‍ താഴേയ്ക്കിടയിലുള്ളവരാണെന്നും ശൃംഖലയിലെ വമ്പന്മാര്‍ക്കുവേണ്ടി അന്വേഷണം ഊര്‍ജിതമാക്കിയിട്ടുണ്ടെന്നും പോലീസ് അറിയി­ച്ചു.

ഇവര്‍ അറസ്റ്റിലായതോടെ സംസ്ഥാനത്തെ വിവിധ പോലീസ് സ്‌റ്റേഷനുകളില്‍ നിന്ന് ഇനി അന്വേഷണം ഉണ്ടാകാം. പന്തളം സി.ഐ. ആര്‍. ജയരാജിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.