Israel | ഗസ്സയെ ചൊല്ലി ഇസ്രാഈൽ സർക്കാരിൽ ഭിന്നത; നെതന്യാഹുവിന് സ്വന്തം മന്ത്രിയുടെ അന്ത്യശാസനം

  

ബന്ദികളെ നാട്ടിലെത്തിക്കുക, ഗസ്സയിൽ ഹമാസിൻ്റെ നിയന്ത്രണം അവസാനിപ്പിക്കുക തുടങ്ങിയ കാര്യങ്ങളാണ് അദ്ദേഹം മുന്നോട്ട് വെച്ചത്. ഇസ്രാഈൽ സൈനികർ ധീരത പ്രകടിപ്പിക്കുമ്പോൾ, അവരെ യുദ്ധത്തിന് അയച്ചവരിൽ ചിലർ ഭീരുത്വത്തോടെയും ഉത്തരവാദിത്തമില്ലായ്മയോടെയും പ്രവർത്തിക്കുന്നുവെന്ന് വാർത്താസമ്മേളനത്തിൽ ഗാൻ്റ്സ് ആരോപിച്ചു.

ഗസ്സ മുനമ്പിൻ്റെ ഇരുവശങ്ങളിലും ഇസ്രാഈലിൻ്റെ സൈനിക നടപടി വർധിച്ച സമയത്താണ് പുതിയ സംഭവ വികാസങ്ങൾ. ഒരു വശത്ത്, വടക്ക് ഗസ്സ സിറ്റിക്ക് സമീപമുള്ള ജബലിയയിലേക്ക് കൂടുതൽ ഇരച്ചുകയറാൻ ഇസ്രാഈൽ സൈന്യം ശ്രമിക്കുമ്പോൾ, മറുവശത്ത്, തെക്കൻ ഗസ്സയിലെ റഫയിൽ വ്യോമാക്രമണം ആരംഭിച്ചിട്ടുണ്ട്. ഗസ്സയിലെ ഏറ്റവും വലുതും പഴക്കമുള്ളതുമായ അഭയാർത്ഥി ക്യാമ്പുകളിലൊന്നാണ് ജബലിയ.

ഏഴ് മാസത്തിലേറെയായി ഗസ്സ മുനമ്പിൽ ഹമാസുമായി ഇസ്രാഈൽ സൈന്യം പോരാടുകയാണ്. എന്നാൽ ഹമാസ് പോരാളികളെ ഇല്ലാതാക്കിയെന്ന് ഇസ്രാഈൽ അവകാശപ്പെട്ടിരുന്ന വടക്കൻ ഗസ്സയിൽ അവർ വീണ്ടും സംഘടിക്കുകയും പ്രത്യാക്രമണങ്ങൾ നടത്തുകയും ചെയ്തതോടെയാണ് ഇസ്രാഈൽ യുദ്ധ മന്ത്രിസഭയിൽ അഭിപ്രായ ഭിന്നതകൾ രൂക്ഷമയത്. ഒക്ടോബർ ഏഴിന് ശേഷം ഹമാസിനെതിരായ ഇസ്രാഈൽ സൈനിക ആക്രമണത്തിൽ ഇതുവരെ 35,386 പേർ കൊല്ലപ്പെട്ടിട്ടുണ്ട്. ഇതിൽ കൂടുതലും സാധാരണക്കാരാണ്.