Emirates ID Renewal? | യുഎഇ എമിറേറ്റ്സ് ഐഡി പുതുക്കാൻ വൈകിയോ? നാട്ടിൽ പോയ സമയത്ത് കാലാവധി കഴിഞ്ഞോ? പിഴ ഒഴിവാക്കാം! ഇളവുകൾ ആർക്കെന്നും എങ്ങനെ പ്രയോജനപ്പെടുത്താമെന്നും അറിയാം

ദുബൈ: (KVARTHA) എല്ലാ യുഎഇ നിവാസികൾക്കും എമിറേറ്റ്സ് ഐഡി കാർഡ് നിർബന്ധമാണ്. ഇത് അവരുടെ ഐഡന്റിറ്റിയും താമസ വിശദാംശങ്ങളും തെളിയിക്കുന്നു, കൂടാതെ രാജ്യത്തെ എല്ലാ ഡോക്യുമെന്റേഷനുകൾക്കും ഇത് ആവശ്യമാണ്. കാലാവധി കഴിഞ്ഞ് 30 ദിവസത്തിനുള്ളിൽ കാർഡ് പുതുക്കുകയോ അപ്‌ഡേറ്റ് ചെയ്യുകയോ ചെയ്യുന്നില്ലെങ്കിൽ, പ്രതിദിനം 20 ദിർഹം പിഴ ഈടാക്കാം, ഇത് പരമാവധി 1,000 ദിർഹം വരെയാകാം.

നിങ്ങളുടെ യുഎഇ എമിറേറ്റ്‌സ് ഐഡി പുതുക്കാൻ കാലതാമസം വരുത്തുകയും പിഴ നേരിടേണ്ടി വരികയും ചെയ്‌താൽ, ചില പ്രത്യേക സാഹചര്യങ്ങളിൽ പിഴയിൽ നിന്ന് ചിലരെ ഒഴിവാക്കുമെന്ന് നിങ്ങൾക്കറിയാമോ? ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) യുടെ അറിയിപ്പ് പ്രകാരം ചില സാഹചര്യങ്ങളിൽ പിഴ ഒഴിവാക്കുമെന്ന് ഗൾഫ് ടുഡേ റിപ്പോർട്ട് ചെയ്തു.

പിഴ ഒഴിവാക്കാനുള്ള മാനദണ്ഡങ്ങൾ:

* മൂന്ന് മാസത്തിലധികം യുഎഇക്ക് പുറത്ത് ചിലവഴിക്കുകയും കൂടാതെ യുഎഇയിൽ നിന്ന് പുറത്തുപോയ ശേഷം ഐഡി കാർഡിന്റെ കാലാവധി കഴിയുകയും ചെയ്‌താൽ പിഴയില്ലാതെ പുതുക്കാവുന്നതാണ്.

* ഉത്തരവിലൂടെയോ ഭരണപരമായ തീരുമാനത്തിലൂടെയോ കോടതി വിധിയിലൂടെയോ നാടുകടത്തുകയോ അല്ലെങ്കിൽ തീർപ്പാക്കാത്ത കേസുകളിൽ പാസ്‌പോർട്ട് പിടിച്ചെടുകയോ ചെയ്യുന്ന സമയത്ത് ഐഡി കാർഡ് കാലഹരണപ്പെടുകയും പിന്നീട്, നാടുകടത്തുകയോ തടഞ്ഞുവയ്ക്കുകയോ ചെയ്ത യോഗ്യതയുള്ള അധികാരികൾ നൽകിയ കത്തിലൂടെയോ രസീതിലൂടേയോ ഇത് തെളിയിക്കപ്പെടുകയും ചെയ്‌താൽ
പിഴയില്ലാതെ എമിറേറ്റ്‌സ് ഐഡി പുതുക്കാവുന്നതാണ്.

* നിങ്ങളുടെ എമിറേറ്റ്‌സ് ഐഡി കാർഡ് അപ്‌ഡേറ്റ് ചെയ്യുന്നതിനോ പുതുക്കുന്നതിനോ ഉള്ള കാലതാമസം കമ്പ്യൂട്ടർ പിശക് മൂലമാണെങ്കിൽ, പിഴകൾ ഒഴിവാക്കാവുന്നതാണ്.

* പൗരത്വം ലഭിക്കുന്നതിന് മുമ്പുള്ള കാലയളവിൽ തിരിച്ചറിയൽ കാർഡ് നൽകാത്ത വ്യക്തി

* കിടപ്പിലായ അല്ലെങ്കിൽ പകർച്ചവ്യാധി അല്ലെങ്കിൽ ഭാഗികമായോ പൂർണമായോ വൈകല്യം ബാധിച്ചിട്ടുണ്ടെങ്കിൽ. രാജ്യത്തെ യോഗ്യതയുള്ള അധികാരികൾ നൽകുന്ന മെഡിക്കൽ സർട്ടിഫിക്കറ്റ് ഹാജരാക്കണം.

* രാജ്യത്തെ നയതന്ത്ര അല്ലെങ്കിൽ കോൺസുലേറ്റുകളിലെ ജീവനക്കാരും അവരുടെ സംരക്ഷണത്തിലുള്ളവരും

ഇളവിന് അപേക്ഷിക്കാനുള്ള മൂന്ന് വ്യത്യസ്ത വഴികൾ

* ഐസിപി കസ്റ്റമർ ഹാപ്പിനസ് സെന്ററുകൾ വഴി
* ഐസിപി-യുടെ സ്മാർട്ട് സേവന വെബ്‌സൈറ്റ് smartservices(dot)icp(dot)gov(dot)ae അല്ലെങ്കിൽ ആപ്പ് (UAEICP) വഴി.
* ഐസിപിയിൽ രജിസ്റ്റർ ചെയ്ത ടൈപ്പിംഗ് സെന്ററുകൾ വഴി

ഐഡി നിർബന്ധം

യുഎഇ പൗരന്മാർ, ജിസിസി രാജ്യങ്ങളിലെ പൗരന്മാർ, രാജ്യത്ത് താമസിക്കുന്ന പ്രവാസികൾ എന്നിവരുൾപ്പെടെ യുഎഇയിലെ എല്ലാ താമസക്കാർക്കും എമിറേറ്റ്സ് ഐഡി കാർഡ് നിർബന്ധമാണ്. ഈ വിഭാഗങ്ങളിലൊന്നിൽ ഉൾപ്പെട്ടിട്ടുള്ള ഏതൊരു വ്യക്തിയും ഐഡി കാർഡിന് അപേക്ഷിക്കുകയും കാലഹരണപ്പെടുമ്പോൾ പുതുക്കുകയും ചെയ്യേണ്ടതുണ്ട്. ഐഡി കാർഡ് എല്ലായ്‌പ്പോഴും കൈവശം വയ്ക്കുകയും നിയമപ്രകാരം ആവശ്യപ്പെട്ടാൽ അത് കാണിക്കുകയും വേണം. എമിറേറ്റ്സ് ഐഡി ഇളവിന് അപേക്ഷിക്കുന്നത് സൗജന്യമാണ്. എന്നിരുന്നാലും, എമിറേറ്റ്സ് ഐഡി പുതുക്കുന്നതിന് നിങ്ങൾ പണം നൽകേണ്ടതുണ്ട്.

Keywords: News, World, International, Gulf, Emirates ID, Dubai, UAE News, Malayalam News, Want to apply for exemption from Emirates ID fines?
< !- START disable copy paste -->