യുഎഇ തീരങ്ങളിൽ എണ്ണച്ചോർച്ച; ശാർജയിലും ഉമ്മുൽഖുവൈനിലും റാസൽഖൈമയിലും ബീച്ചുകൾ അടച്ചു; അന്തരീക്ഷത്തിലെ ദുർഗന്ധത്തിൽ ആശങ്ക വേണ്ടെന്ന് പരിസ്ഥിതി മന്ത്രാലയം

ശാർജ: (KVARTHA) ഖോർഫക്കാൻ തീരത്ത് വൻതോതിൽ എണ്ണ അടിഞ്ഞതിനെ തുടർന്ന് അൽ ലുലുഇയാ ബീച്ച് താൽക്കാലികമായി അടച്ചു. യുഎഇയുടെ സമുദ്രാതിർത്തിയിൽ സഞ്ചരിച്ചിരുന്ന എണ്ണ ടാങ്കറിലുണ്ടായ ചോർച്ചയാണ് രാജ്യത്തെ തീരങ്ങളിൽ എണ്ണ അടിയാൻ കാരണമായത്. ഇതേത്തുടർന്ന് ശാർജയിലും അജ്മാനിലും റാസൽഖൈമയിലുമുള്ള ബീച്ചുകൾ അധികൃതർ പൂർണമായും അടച്ചിരുന്നു. ഖോർഫക്കാനിൽ കടലിൻ്റെ ഉപരിതലത്തിൽ എണ്ണപ്പാളി വ്യാപകമായി രൂപപ്പെട്ടിട്ടുണ്ട്. ഇത് തീരത്തേക്ക് അടിഞ്ഞു തുടങ്ങിയതിനാലാണ് ജനങ്ങൾക്ക് കർശന നിയന്ത്രണം ഏർപ്പെടുത്തുന്നതെന്ന് ഖോർഫക്കാൻ മുനിസിപ്പാലിറ്റി അറിയിച്ചു. എണ്ണച്ചോർച്ചയുമായി ബന്ധപ്പെട്ട കൂടുതൽ വിവരങ്ങൾ മുനിസിപ്പൽ അധികൃതർ പുറത്തുവിട്ടിട്ടില്ല.

എണ്ണടാങ്കറിലെ ചോർച്ചയെ തുടർന്നുള്ള മലിനീകരണം കഴിഞ്ഞ മാസമാണ് ആദ്യം റിപ്പോർട്ട് ചെയ്തത്. ഉമ്മുൽഖുവൈൻ തീരത്താണ് ആദ്യം എണ്ണ അടിഞ്ഞുകൂടിയത്. പിന്നീട് ശാർജയിലും അജ്മാനിലും റാസൽഖൈമയിലും അന്തരീക്ഷത്തിൽ രൂക്ഷമായ ദുർഗന്ധം പരന്നിരുന്നു.

ദുർഗന്ധവും ആരോഗ്യപ്രശ്നങ്ങളും

തീരത്ത് എണ്ണയടിഞ്ഞത് ശ്രദ്ധയിൽ വന്നതിന് പിന്നാലെ ജനങ്ങൾക്ക് സുരക്ഷ ഒരുക്കുന്ന നടപടികളിലേക്ക് അധികൃതർ കടന്നു. അന്തരീക്ഷത്തിലെ ഈ ദുർഗന്ധം ആരോഗ്യപ്രശ്നങ്ങൾ ഉണ്ടാക്കില്ലെന്ന് പരിസ്ഥിതി മന്ത്രാലയം വ്യക്തമാക്കി. എന്നാൽ, എണ്ണ അടിഞ്ഞുകൂടിയ തീരത്തുപോകുന്നതും വെള്ളത്തിൽ കുളിക്കുന്നതും ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്ന് മുന്നറിയിപ്പുണ്ട്. 'ജെം നമ്പർ 2' എണ്ണ ടാങ്കറിൽ നിന്നാണ് ഈ ചോർച്ചയുണ്ടായിരിക്കുന്നത്. ടാങ്കറിലെ ചോർച്ചയടയ്ക്കാനുള്ള ശ്രമങ്ങൾ ഇപ്പോൾ തുടരുകയാണ്. ടാങ്കറിൽ നിന്ന് പുതിയതായി ചോർച്ചയൊന്നും റിപ്പോർട്ട് ചെയ്യപ്പെട്ടിട്ടില്ല.

കുടിവെള്ളത്തിനും മത്സ്യത്തിനും സുരക്ഷാ ഭീഷണിയില്ല

കുടിവെള്ളത്തിൻ്റെ സുരക്ഷയിൽ പൊതുജനങ്ങൾ യാതൊരു ആശങ്കയും പെടേണ്ടതില്ലെന്ന് ദേശീയ ജല, വൈദ്യുതി കമ്പനി അറിയിച്ചു. കടൽവെള്ളം ശുദ്ധീകരിക്കുന്ന ഡീസാലിനേഷൻ പ്ലാൻ്റുകൾ വഴിയാണ് യുഎഇയിൽ കുടിവെള്ളം പ്രധാനമായും വിതരണം ചെയ്യുന്നത്. കുടിവെള്ള ഉൽപാദനത്തിൽ പരമാവധി സുരക്ഷ ഉറപ്പാക്കാനുള്ള കർശന നടപടികൾ അധികൃതർ സ്വീകരിച്ചിട്ടുണ്ട്. ഉൽപാദിപ്പിക്കുന്ന വെള്ളത്തിൻ്റെയും വിതരണം ചെയ്യുന്ന വെള്ളത്തിൻ്റെയും സുരക്ഷാ പരിശോധന കർശനമാക്കിയിട്ടുണ്ട്. കടൽ മത്സ്യങ്ങളും കടൽ ഉൽപ്പന്നങ്ങളും പൂർണമായും ഭക്ഷ്യയോഗ്യമാണെന്നും അധികൃതർ അറിയിച്ചു.

അടച്ചിട്ട ബീച്ചുകൾ

ഉമ്മുൽഖുവൈൻ: എമിറേറ്റിലെ എല്ലാ ബീച്ചുകളും അടച്ചിരിക്കുകയാണ്. ഇവിടുത്തെ തീരത്ത് എണ്ണയുടെ സാന്നിധ്യം ശക്തമായുണ്ട്. 

ശാർജ: എല്ലാ ബീച്ചുകളും അടച്ചു. തീരങ്ങളിൽ എണ്ണ അടിഞ്ഞുകൂടുന്നത് തടയാനുള്ള ശ്രമങ്ങൾ തുടരുന്നു. 

റാസൽഖൈമ: എമിറേറ്റിലെ എല്ലാ ബീച്ചുകളും അടച്ചു. സർക്കാരിൻ്റെ ഭാഗത്തുനിന്ന് ഇനിയൊരു അറിയിപ്പ് ഉണ്ടാകും വരെ ബീച്ചിലേക്ക് പ്രവേശനമില്ല.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: UAE authorities close beaches in Sharjah, Ras Al Khaimah, and Umm Al Quwain following a massive oil spill from a tanker.

#Kvartha #UAENews #SharjahBeach #OilSpill #RasAlKhaimah #Khorfakkan #EnvironmentNews #MalayalamGulfNews #SobhaNews