ദുബൈ: ട്രാഫിക് കുരുക്കുകൾ രൂക്ഷമായതോടെ ജീവനക്കാർക്ക് വീട്ടിൽ നിന്ന് ജോലി ചെയ്യാനും തങ്ങളുടെ സൗകര്യപ്രകാരം ഓഫീസിൽ എത്താനും അനുവാദം നൽകുന്ന നടപടികളുമായി കമ്പനികൾ രംഗത്തെത്തി.ഇത് സംബന്ധിച്ച് ഔദ്യോഗിക അറിയിപ്പ് ലഭ്യമായില്ലെങ്കിലും സമൂഹ മാധ്യമങ്ങളിൽ വൻ പ്രചാരമാണ് ലഭിക്കുന്നത്.

കാർ പൂളിംഗ് പ്രോത്സാഹിപ്പിക്കുന്നതിനൊപ്പം, ജീവനക്കാർക്ക് അനുയോജ്യമായ സമയത്ത് ഓഫീസിൽ എത്താനുള്ള അനുവാദവും നൽകാനുള്ള തീരുമാനമാണ് കമ്പനികൾ എടുത്തിരിക്കുന്നത്. ദീർഘനേരം ട്രാഫിക്കിൽ പെട്ട് ബുദ്ധിമുട്ടുന്നത് ഒഴിവാക്കാനാണ് ഈ നടപടി.

വീട്ടിൽ നിന്ന് ജോലി ചെയ്യുന്നതിനേക്കാൾ ജീവനക്കാർക്ക് തങ്ങളുടെ സൗകര്യപ്രകാരം ഓഫീസിൽ എത്താനുള്ളതാണ് താൽപ്പര്യമെന്നാണ് അടുത്തകാലത്തെ പഠനങ്ങൾ സൂചിപ്പിക്കുന്നത്. എട്ടുമണിക്കൂർ ജോലികഴിഞ്ഞ് ഓഫീസില്‍ നിന്നിറങ്ങുന്നത് അസമയത്താകുമെങ്കിലും അവശ്യം വേണ്ട സമയങ്ങളില്‍ കുടുംബത്താേടൊപ്പം ചെലവഴിക്കാൻ കഴിയുന്നു എന്ന മേന്മയാണിവർ പ്രധാനമായും ചൂണ്ടിക്കാണിക്കുന്നത്. ഒപ്പം ഓഫീസിലേക്ക് പോകുമ്പോഴും തിരികെ വരുമ്പോഴും തിരക്കുള്ള സമയത്ത് വാഹനമാേടിക്കുന്നതിലെ ടെൻഷൻ ഒഴിവാക്കാനും കഴിയും. രാവിലെ എട്ടുമണിമുതല്‍ വൈകിട്ട് ആറരവരെയുളള സമയത്തിനിടയിലാണ് യോജിച്ച എട്ടുമണിക്കൂർ ജോലിചെയ്യേണ്ടത്.

ദുബൈയിലെയും യുഎഇയിലെയും ജനസംഖ്യയിലുണ്ടായ വർധനവും പ്രവാസികളുടെ വരവും ട്രാഫിക് കുരുക്കുകൾക്ക് പ്രധാന കാരണമായി. രണ്ട് വർഷം മുമ്പുള്ള കണക്കുകളുമായി താരതമ്യം ചെയ്യുമ്പോൾ ജീവനക്കാർ ഓഫീസിലെത്താൻ ഇരട്ടി സമയം ചെലവഴിക്കേണ്ടി വരുന്നു. ഇത് അവരുടെ തൊഴിൽ ജീവിത സന്തുലനത്തെയും മാനസികാരോഗ്യത്തെയും പ്രതികൂലമായി ബാധിക്കുന്നു. ഇത് ഉൽപ്പാദനക്ഷമതയെ കുറയ്ക്കുന്നതിനാൽ കമ്പനികൾ ഈ തീരുമാനത്തിലെത്തിയിരിക്കുകയാണ്.

ദീർഘനേരം ട്രാഫിക്കിൽ അകപ്പെടുന്നത് മാനസിക പ്രശ്നങ്ങൾക്ക് കാരണമാകുമെന്നും അത് രോഗങ്ങൾക്ക് വഴിവെക്കുമെന്നുമാണ് വിദഗ്ധർ പറയുന്നത്.
 
#DubaiWorkPolicy, #FlexibleWorkingHours, #TrafficRelief, #EmployeeWellbeing, #UAE, #WorkLifeBalance