Miracle | കുവൈത്ത് കൈകോർത്തു; യു എ ഇയിൽ വിദേശിവനിതയ്ക്ക് പുതുജീവൻ

ദുബൈ: (KVARTHA) അബുദാബിയിലെ നാല്പത്തിമൂന്ന് വയസുള്ള നൂർ എന്ന ഇന്തോനേഷ്യൻ വനിതക്ക് അപൂർവമായ ഒരു അവയവദാനത്തിലൂടെ പുതുജീവൻ ലഭിച്ചു. കരളിന്റെ ഗുരുതര പ്രശ്നത്തെ തുടർന്ന് അടിയന്തര കരൾ മാറ്റിവയ്ക്കൽ ശസ്ത്രക്രിയ ആവശ്യമായി വന്ന നൂറിന് യുഎഇയിൽ അനുയോജ്യമായ അവയവം ലഭ്യമായില്ല.

ജിസിസി രാജ്യങ്ങളിലെ ആരോഗ്യ സംവിധാനങ്ങളുടെ സഹകരണത്തോടെയാണ് ഈ അപൂർവ വിജയം സാധ്യമായത്. കുവൈറ്റിൽ നിന്നും അനുയോജ്യമായ കരൾ കണ്ടെത്തിയതോടെ 48 മണിക്കൂറിനുള്ളിൽ അത്ഭുതകരമായ രീതിയിൽ ശസ്ത്രക്രിയ പൂർത്തിയാക്കാൻ മെഡിക്കൽ സംഘത്തിനായി.

ബുർജീൽ മെഡിക്കൽ സിറ്റിയിലെ ഡോ. ഗൗരബ് സെന്നിയുടെ നേതൃത്വത്തിലുള്ള മെഡിക്കൽ സംഘവും അബ്ഡോമിനൽ മൾട്ടി-ഓർഗൻ ട്രാൻസ്പ്ലാൻറ് പ്രോഗ്രാം ഡയറക്ടർ ഡോ. രെഹാൻ സൈഫിയുടെ നേതൃത്വത്തിലുള്ള സംഘവും ചേർന്ന് നടത്തിയ ഈ ശസ്ത്രക്രിയ വിജയകരമായി. അനസ്തേഷ്യ കൺസൾട്ടൻറ് ഡോ. രാമമൂർത്തി ഭാസ്കരനും സംഘത്തിൽ ഉണ്ടായിരുന്നു.

യുഎഇ അധികൃതർ മെഡിക്കൽ സംഘത്തിന് പ്രൈവറ്റ് ജെറ്റ് ഏർപ്പാടാക്കിയതിലൂടെ കുവൈറ്റിൽ നിന്നും അവയവം എത്തിക്കുന്നതിൽ വേഗത കൂട്ടാൻ സാധിച്ചു. ആരോഗ്യ മന്ത്രാലയം, ഡിപ്പാർട്ട്മെന്റ് ഓഫ് ഹെൽത്ത് - അബുദാബി, കുവൈറ്റ് എംബസി, അബുദാബി എയർപോർട്ട് തുടങ്ങിയ വിവിധ സർക്കാർ ഏജൻസികളുടെ സഹകരണവും ഈ ദൗത്യത്തിന്റെ വിജയത്തിൽ നിർണായകമായി.

നൂറിന്റെ അവസ്ഥ ഗുരുതരമായതിനാൽ ശസ്ത്രക്രിയ വളരെ സങ്കീർണമായിരുന്നു. തലച്ചോറിനെ ബാധിക്കാത്ത വിധത്തിൽ അനസ്തേഷ്യ നൽകുന്നത് വലിയ വെല്ലുവിളിയായിരുന്നു. 14 മണിക്കൂർ നീണ്ട ശസ്ത്രക്രിയയ്ക്ക് ശേഷം നൂറിന്റെ ആരോഗ്യം ക്രമേണ മെച്ചപ്പെട്ടു.
അടിയന്തര കരൾ മാറ്റിവയ്ക്കലിന്റെ പ്രാധാന്യത്തെക്കുറിച്ച് മെഡിക്കൽ സംഘത്തിലെ മലയാളി വിദഗ്ദൻ ഡോ. ജോൺസ് മാത്യു വിശദീകരിച്ചു. കുവൈറ്റിലെ അവയവദാതാവിനെയും സർക്കാർ ഏജൻസികളെയും പ്രശംസിക്കുകയും ചെയ്തു.

നൂർ ഇപ്പോൾ തുടർ ചികിത്സയിലാണ്. അദ്ഭുതകരമായ രീതിയിൽ ജീവൻ തിരിച്ചുപിടിച്ചതിൽ സന്തോഷവും നന്ദിയും പ്രകടിപ്പിച്ചു.
ഈ അപൂർവ വിജയം ജിസിസി രാജ്യങ്ങളിലെ ആരോഗ്യ സംവിധാനങ്ങളുടെ സഹകരണത്തിന്റെ മികച്ച ഉദാഹരണമായി.

#organtransplant #medicalmiracle #UAE #Kuwait #healthcare #donation #humanity #hope