കുവൈറ്റ് സിറ്റി: (KVARTHA) കുവൈറ്റിൽ വിദേശ തൊഴിലാളികളുടെ സുരക്ഷയും അവകാശങ്ങളും സംരക്ഷിക്കുന്നതിനായി കർശന നടപടികളുമായി അധികൃതർ. മനുഷ്യക്കടത്ത് കേസുകൾ നിരീക്ഷിക്കുന്നതിനും തൊഴിലുടമകൾ നിയമങ്ങൾ പാലിക്കുന്നുണ്ടെന്ന് ഉറപ്പുവരുത്തുന്നതിനുമായി പ്രത്യേക പരിശോധനാ സംഘത്തിന് രൂപം നൽകിയിട്ടുണ്ടെന്ന് പബ്ലിക് അതോറിറ്റി ഫോർ മാൻപവറിലെ (പിഎഎം) പ്രവാസി തൊഴിലാളികളുടെ സംരക്ഷണ വിഭാഗം ഡെപ്യൂട്ടി ഡയറക്ടർ ജനറൽ ഡോ. ഫഹദ് അൽ-മുറാദ് അറിയിച്ചു.

തൊഴിൽ വിപണിയിൽ അതോറിറ്റി സജീവമായി ഇടപെടും. സർക്കാർ, സ്വകാര്യ സ്ഥാപനങ്ങളിലെ തൊഴിലാളികൾ, തൊഴിലുടമകൾ എന്നിവരുടെ പ്രവർത്തനങ്ങൾ വിലയിരുത്തുന്നതിനൊപ്പം തൊഴിലാളികളുടെ താമസസ്ഥലങ്ങളും പരിശോധിക്കും. രാജ്യത്തെ നിയമങ്ങളും നിയന്ത്രണങ്ങളും പാലിക്കുന്നുണ്ടെന്ന് ഉറപ്പാക്കുകയാണ് ഇതിലൂടെ ലക്ഷ്യമിടുന്നത്. അന്താരാഷ്ട്ര കരാറുകൾ പ്രകാരം ധാർമികവും ഭരണഘടനാപരവുമായ കാഴ്ചപ്പാടിലാണ് ഈ നടപടികളെന്ന് അൽ-മുറാദ് പറഞ്ഞു.

പുരുഷ പ്രവാസി തൊഴിലാളികൾക്കായി 10,000 ചതുരശ്ര മീറ്റർ വിസ്തീർണമുള്ള പുതിയ ഷെൽട്ടർ ഉടൻ തുറക്കുമെന്നും അദ്ദേഹം അറിയിച്ചു. തൊഴിലാളികളുടെ അവകാശങ്ങൾ സംരക്ഷിക്കുന്നതിനും ചൂഷണം, മനുഷ്യക്കടത്ത് തുടങ്ങിയ നിയമലംഘനങ്ങൾ തടയുന്നതിനും ഈ നടപടി സഹായകമാകും. രാജ്യത്തെ എല്ലാ പ്രവാസി തൊഴിലാളികൾക്കും അനുയോജ്യമായ തൊഴിൽ അന്തരീക്ഷം സൃഷ്ടിക്കുന്നതിൽ അതോറിറ്റി പ്രതിജ്ഞാബദ്ധമാണെന്നും അൽ-മുറാദ് കൂട്ടിച്ചേർത്തു.

പുതിയ നടപടികൾ കുവൈത്തിലെ വിദേശ തൊഴിലാളികളുടെ ജീവിതനിലവാരം ഉയർത്തുന്നതിനും അവരുടെ അവകാശങ്ങൾ സംരക്ഷിക്കുന്നതിനും ഏറെ സഹായകമാകും എന്ന് പ്രതീക്ഷിക്കുന്നു.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക 

Kuwait is strengthening protections for foreign workers, including the opening of a new 10,000 sqm shelter to improve living conditions and prevent exploitation.

#KuwaitNews #ForeignWorkers #LaborRights #KuwaitMeasures #HumanRights #WorkerProtection