ദുബൈ: (KVARTHA) സുഹൃത്തിനോ കുടുംബാംഗത്തിനോ വേണ്ടി യുഎഇ വിസയ്ക്ക് അപേക്ഷിക്കാൻ ആഗ്രഹിക്കുന്നുവെങ്കിൽ, താമസ സ്ഥലത്ത് നിന്ന് പുറത്തുപോകാതെ തന്നെ അപേക്ഷ പൂർത്തിയാക്കാൻ ഇപ്പോൾ സാധിക്കും. ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) ഫോണിൽ 30, 60 അല്ലെങ്കിൽ 90 ദിവസം വരെ സാധുതയുള്ള ഒരു 'എൻട്രി പെർമിറ്റിന്' (പ്രവേശന അനുമതി) അപേക്ഷിക്കുന്നതിനുള്ള നടപടിക്രമങ്ങൾ വ്യക്തമാക്കിയിട്ടുണ്ട്. നാല് ഘട്ടങ്ങളിലൂടെ യുഎഇ വിസ ഓൺലൈനായി അപേക്ഷിക്കാം

ഘട്ടം 1: ആപ്പ് ഡൗൺലോഡ് ചെയ്ത് ലോഗിൻ ചെയ്യുക

ആപ്പിൾ, ആൻഡ്രോയിഡ്, ഹുവാവേ ഉപകരണങ്ങൾക്കായി 'UAEICP' ആപ്പ് ലഭ്യമാണ്. ഇത് ഡൗൺലോഡ് ചെയ്തുകഴിഞ്ഞാൽ, യുഎഇ പാസ് ഉപയോഗിച്ച് ലോഗിൻ ചെയ്യേണ്ടതുണ്ട്. ഫോണിൽ ആപ്പ് ഡൗൺലോഡ് ചെയ്യാൻ ആഗ്രഹിക്കുന്നില്ലെങ്കിൽ, smartservices(dot)icp(dot)gov(dot)ae എന്ന ഔദ്യോഗിക ICP വെബ്‌സൈറ്റിലൂടെയും പ്രക്രിയ പൂർത്തിയാക്കാൻ കഴിയും.

ഘട്ടം 2: പുതിയ വിസ സേവനം തിരഞ്ഞെടുക്കുക

തുടർന്ന്, 'Issuance an Entry Permit (New Visa)' (പ്രവേശന അനുമതി നൽകൽ (പുതിയ വിസ)) എന്ന സേവനം തിരഞ്ഞെടുക്കുകയും 'വിസയുടെ തരം' ബന്ധു അല്ലെങ്കിൽ സുഹൃത്ത് എന്നിങ്ങനെ തിരഞ്ഞെടുക്കുകയും വേണം. തുടർന്ന്, സിംഗിൾ എൻട്രി വിസയ്ക്കോ മൾട്ടിപ്പിൾ എൻട്രി വിസയ്ക്കോ അപേക്ഷിക്കാനാഗ്രഹിക്കുന്നുണ്ടോ എന്ന് പരിശോധിക്കുകയും അവസാനമായി താമസ കാലാവധി തിരഞ്ഞെടുക്കുകയും ചെയ്യുക.

ഘട്ടം3: വിവരങ്ങൾ സ്ഥിരീകരിക്കുക

ആദ്യമായി ലോഗിൻ ചെയ്യുകയാണെങ്കിൽ വ്യക്തിഗത വിശദാംശങ്ങൾ നൽകാനോ, മുൻപ് രജിസ്റ്റർ ചെയ്ത ഉപയോക്താവ് ആണെങ്കിൽ ഫയലിലെ ഡാറ്റ സ്ഥിരീകരിക്കാനോ ആവശ്യപ്പെടും. കോൺടാക്റ്റ് നമ്പർ അല്ലെങ്കിൽ ഇമെയിൽ വിലാസം പോലുള്ള വ്യക്തിഗത വിവരങ്ങളിൽ ഏതെങ്കിലും അപ്ഡേറ്റ് ഉണ്ടെങ്കിൽ, അതിനനുസൃതമായ മാറ്റങ്ങൾ വരുത്താം.

ഘട്ടം 4: പേയ്മെന്റ് നടത്തുക

അവസാനമായി, വിസയ്ക്കുള്ള പേയ്മെന്റ് നടത്തുക. പെർമിറ്റിന്റെ കാലാവധിയനുസരിച്ച് ചെലവ് വ്യത്യാസപ്പെടും. അപേക്ഷ സമർപ്പിച്ചുകഴിഞ്ഞാൽ, അത് എസിപി അവലോകനം ചെയ്യും. വിസ നൽകുന്ന പ്രക്രിയ വളരെ വേഗത്തിലാണ്, പരമാവധി 48 മണിക്കൂറിനുള്ളിൽ പൂർത്തിയാകും. അപേക്ഷയുടെ തുടർനടപടികൾ അറിയണമെങ്കിൽ, ഓൺലൈനായി ട്രാക്ക് ചെയ്യാം അല്ലെങ്കിൽ 600522222 എന്ന നമ്പറിൽ വിളിക്കാം.

#UAEvisa #VisaApplication #MobileApp #ICP #UAE #EasyVisa