ദുബൈ: (KVARTHA) അൽ ബർഷ് പ്രദേശത്ത് നിന്ന് വീണുകിട്ടിയ 100,000 ദിർഹം തുക കൈമാറി സത്യസന്ധത കാട്ടിയ പ്രവാസി ഇന്ത്യക്കാരൻ സ്വദേശ് കുമാറിന് ദുബൈ പൊലീസിന്റെ ആദരവ്. അൽ ബർഷ് പോലീസ് സ്റ്റേഷൻ ഡയറക്ടർ ബ്രിഗേഡിയർ മജിദ് അൽ സുവൈദി, ട്രാഫിക് രജിസ്ട്രേഷൻ വിഭാഗം മേധാവി കേണൽ മുസ്തഫ മുഹമ്മദ് അബ്ദുല്ല, ക്രിമിനൽ രേഖകൾ വിഭാഗം മേധാവി ലെഫ്റ്റനന്റ് കേണൽ യാസർ അൽ ഹാശിമി എന്നിവരുടെ സാന്നിധ്യത്തിൽ ആദരവ് സമർപ്പിച്ചു.

ദുബൈ പൊലീസ് സമൂഹത്തിൽ പ്രോത്സാഹിപ്പിക്കാൻ ശ്രമിക്കുന്ന നന്മ, ഉത്തരവാദിത്തം എന്നീ ഉന്നത മൂല്യങ്ങളുടെ പ്രതീകമാണ് സ്വദേശ് കുമാർ എന്ന് ബ്രിഗേഡിയർ അൽ സുവൈദി അഭിനന്ദിച്ചു. പൊതുജനങ്ങളുടെ സഹകരണം വളർത്തിക്കൊണ്ട് ദുബൈ പൊലീസിന് തന്ത്രപരമായ ലക്ഷ്യങ്ങൾ കൈവരിക്കാൻ ഇത്തരം സത്യസന്ധതയുള്ള പ്രവർത്തനങ്ങൾ സഹായിക്കുന്നുവെന്ന് അദ്ദേഹം പറഞ്ഞു.

സമൂഹത്തിൽ സുരക്ഷയും നല്ല മൂല്യങ്ങളും പ്രചരിപ്പിക്കുന്നതിൽ പങ്കുവഹിച്ചതിന് കുമാറിനെ ബ്രിഗേഡിയർ അൽ സുവൈദി അഭിനന്ദിച്ചു. സമ്മാന ചടങ്ങിന്റെ ഭാഗമായി അഭിനന്ദന സർട്ടിഫിക്കറ്റ് നൽകി. വിലപ്പെട്ട വസ്തുക്കൾ നിയമാനുസൃത ഉടമയ്ക്ക് തിരികെ നൽകുന്നത് തന്റെ കടമയാണെന്ന് പറഞ്ഞ് സ്വദേശ് കുമാർ ആദരത്തിന് നന്ദി പ്രകടിപ്പിച്ചു.

#Dubai #expat #honesty #lostmoney #DubaiPolice #communityvalues