ഒമാനിൽ അത്യാധുനിക ചികിത്സാ സംവിധാനങ്ങളോടെ 'ആസ്റ്റർ റോയൽ' മൾടി സ്പെഷ്യാലിറ്റി ആശുപത്രി വരുന്നു; പേരും ലോഗോയും പ്രകാശനം ചെയ്തു

മസ്ഖത്: (www.kvartha.com 10.01.2022) ഒമാനിൽ നിർമാണം പൂർത്തിയാകുന്ന 200 കിടക്കകളുള്ള മൾടി സ്പെഷ്യാലിറ്റി ആശുപത്രിയായ 'ആസ്റ്റർ റോയൽ' ന്റെ പേരും ലോഗോയും പ്രകാശനം ചെയ്തു. ചടങ്ങിൽ മുഖ്യാതിഥിയായ ഇൻഡ്യൻ അംബാസിഡർ അമിത് നാരഗ് പ്രകാശന കർമം നിർവഹിച്ചു. ആസ്റ്റർ ഡി എം ഹെൽത് കെയറിന്റെ 35-ാം വാർഷികത്തിൽ ചെയർമാൻ ആസാദ് മൂപ്പൻ പ്രഖ്യാപിച്ച പദ്ധതിയായ 'കെയർ ഈസ് ജസ്റ്റ് ആൻ ആസ്റ്റർ എവേ' യാഥാർഥ്യമാക്കുന്നതിന്റെ ഭാഗമായി മറ്റുരണ്ട് സേവനങ്ങൾക്കും തുടക്കമായി.
                     
ഒമാനിൽ ജോലി ചെയ്യുന്ന പ്രവാസികളുടെ നാട്ടിലുള്ള മുതിർന്നവർ അടക്കമുള്ള കുടുംബാംഗങ്ങളെ വീടുകളിലെത്തി പരിചരിക്കുകയും ആശുപത്രികളിൽ ലഭ്യമായ എല്ലാ സൗകര്യങ്ങളും നൽകുകുകയും ചെയ്യുന്ന പദ്ധതിയായ 'ആസ്റ്റർ ദിൽസേ'യുടെയും, കോവിഡ് മഹാമാരി മൂലവും അസുഖങ്ങളുടെ ആധിക്യം മൂലവും യാത്രചെയ്യാൻ സാധിക്കാത്ത ഒമാൻ നിവാസികൾക്കായുള്ള 'ആസ്റ്റർ അറ്റ് ഹോം' സേവനങ്ങളുടെയും ഉദ്ഘാടനവും അമിത് നാരഗ് നിർവഹിച്ചു. ആസ്റ്റർ ദിൽസേ പദ്ധതിയുടെ ആദ്യ റെജിസ്ട്രേഷൻ അദ്ദേഹം ഏറ്റുവാങ്ങി. താൻ ഒരു പ്രവാസിയാണെന്നും ഈ പദ്ധതി പ്രവാസി ജനതയ്ക്ക് വളരെ പ്രയോജനപ്പെടുമെന്നും അദ്ദേഹം അഭിപ്രായപ്പെട്ടു.