ആലപ്പുഴ: (KVARTHA) ഹരിപ്പാട് കെ വി ജെട്ടി ജംഗ്ഷനിൽ വച്ച് ഇന്നോവ കാർ ലോറിയിൽ ഇടിച്ചുണ്ടായ അപകടത്തിൽ വള്ളിക്കുന്നം സ്വദേശിയായ സത്താർ എന്നയാളും മകൾ ആലിയയും മരിച്ചു. ഏറെ നാളായി വിദേശത്തായിരുന്ന സത്താർ, മകളുടെ വിവാഹത്തിന് നാട്ടിലെത്തി വിമാനത്താവളത്തിൽ നിന്ന് വീട്ടിലേക്ക് പോകുന്ന വഴിയായിരുന്നു അപകടം. ഡ്രൈവർ ഉറങ്ങിപ്പോയതാകാം അപകടത്തിന് കാരണമെന്നാണ് പ്രാഥമിക നിഗമനം. 

അപകടത്തില്‍ കാർ ഏറക്കുറെ പൂർണമായും തകർന്നു. നാട്ടുകാരാണ് രക്ഷാപ്രവർത്തനത്തിന് നേതൃത്വം നല്‍കിയത്. ഇരുവരെയും പുറത്തെടുത്ത് ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

അതേസമയം, തൃശൂരിലുണ്ടായ വാഹനാപകടത്തില്‍ രണ്ട് യുവാക്കള്‍ മരിച്ചു. തൃപ്രയാർ സെന്ററിനടുത്ത് സ്കൂട്ടറും കണ്ടെയ്‌നർ ലോറിയും തമ്മിൽ കൂട്ടിയിടിച്ചുണ്ടായ അപകടത്തിൽ വലപ്പാട് സ്വദേശികളായ ആശീർവാദ്, ഹാഷിം എന്നീ യുവാക്കളാണ് മരിച്ചത്. വ്യാഴാഴ്ച പുലർച്ചെ രണ്ടുമണിയോടെ ചാവക്കാട് കൊടുങ്ങല്ലൂർ ദേശീയപാത 66ൽ വി.ബി. മാളിന് സമീപമായിരുന്നു അപകടം. യുവാവിനെ പരിക്കുകളോടെ ആശുപത്രിയില്‍ പ്രവേശിപ്പിച്ചു.

രണ്ട് അപകടങ്ങളിലും പോലീസ് അന്വേഷണം ആരംഭിച്ചിട്ടുണ്ട്.

 #caraccident #Kerala #NRI #tragedy #roadsafety