കണ്ണൂർ: (KVARTHA) ആകാശ് തില്ലങ്കേരിയുടെ കൂട്ടാളി ജിജോ തില്ലങ്കേരി അറസ്റ്റിൽ. യൂത്ത് കോൺഗ്രസ് നേതാവ് എടയന്നൂർ ഷുഹൈബ് വധക്കേസിലെ പ്രതി ആകാശ് തില്ലങ്കേരിയുടെ കൂട്ടാളിയായ ജിജോ തില്ലങ്കേരി ആണ് പീഡനക്കേസിൽ അറസ്റ്റിലായത്. യുവതിയുടെ പരാതിയിലാണ് പോലീസ് അറസ്റ്റ് രേഖപ്പെടുത്തിയത്. പട്ടികജാതിക്കാരിയായ യുവതിയെ പീഡിപ്പിക്കാൻ ശ്രമിച്ചുവെന്നാണ് പോലീസിന്റെ പ്രാഥമിക കണ്ടെത്തൽ. മുഴക്കുന്ന് പോലീസാണ് ജിജോയെ കസ്റ്റഡിയിലെടുത്തത്.

പോലീസ് പറയുന്നതനുസരിച്ച്, നവംബർ 19-നായിരുന്നു കേസിനാസ്പദമായ സംഭവം നടന്നത്. വീട്ടിൽ സാധനം വാങ്ങാൻ എത്തിയ പട്ടികജാതിക്കാരിയായ യുവതിയെ ജിജോ തില്ലങ്കേരി പീഡിപ്പിക്കാൻ ശ്രമിച്ചുവെന്നാണ് ആരോപണം. സംഭവം പുറത്തു പറഞ്ഞാൽ മക്കളെ അപായപ്പെടുത്തുമെന്ന് ജിജോ തില്ലങ്കേരി ഭീഷണിപ്പെടുത്തിയതായും പരാതിയിൽ പറയുന്നു. ഭയം കാരണമാണ് പരാതി നൽകാൻ വൈകിയതെന്നും യുവതിയുടെ മൊഴിയിൽ പറയുന്നു. യുവതിയുടെ പരാതിയുടെ അടിസ്ഥാനത്തിലാണ് ജിജോയെ പോലീസ് അറസ്റ്റ് ചെയ്തത്.

നേരത്തെ കാപ്പ കേസിൽ ആകാശ് തില്ലങ്കേരിക്കൊപ്പം ജിജോ തില്ലങ്കേരിയെയും അറസ്റ്റ് ചെയ്തിരുന്നുവെങ്കിലും പിന്നീട് ജാമ്യത്തിൽ പുറത്തിറങ്ങിയിരുന്നു. മട്ടന്നൂർ ബ്ലോക്കിലെ ഡി.വൈ.എഫ്.ഐ വനിതാ നേതാവിനെ സ്ത്രീത്വത്തെ അവഹേളിക്കുന്ന വിധത്തിൽ സോഷ്യൽ മീഡിയയിൽ അപമാനിച്ചെന്ന കേസിൽ പ്രതിയാണ് ജിജോ തില്ലങ്കേരി. ഇതു കൂടാതെ മറ്റു ചില കേസുകളും ഇയാൾക്കെതിരെയുണ്ട് എന്നാണ് പോലീസ് നൽകുന്ന വിവരം.

#JijoThillankeri, #AttemptedRape, #KannurCrime, #YouthCongress, #LegalAction, #PoliceArrest