ട്രെയിൻ തട്ടി ബധിരനും മൂകനുമായ മധ്യവയസ്‌കന് ദാരുണാന്ത്യം: വടകരയിൽ സംഭവം

വടകര: (KVARTHA) പൂവാടൻ ഗേറ്റിൽ ട്രെയിൻ തട്ടി ബധിരനും മൂകനുമായ മധ്യവയസ്‌കന് ദാരുണാന്ത്യം സംഭവിച്ചു. കുരിയാടി സ്വദേശിയായ വരയന്റെ വളപ്പിൽ കനകനാണ് മരിച്ചതെന്ന് പൊലീസ് അറിയിച്ചു.

ഉച്ചയ്ക്ക് 1.45 ഓടെയാണ് അപകടം നടന്നതെന്ന് പൊലീസ് പറഞ്ഞു. കോഴിക്കോട് ഭാഗത്തേക്ക് പോവുകയായിരുന്ന ഇന്റർസിറ്റി ട്രെയിനാണ് നടന്നുപോവുകയായിരുന്ന കനകനെ ഇടിച്ചത്. പെരുവാട്ടും താഴെ നിന്ന് കുരിയാടി ഭാഗത്തേക്ക് പോവുകയായിരുന്നു കനകൻ ഈ സമയം.

അപകടം സംഭവിക്കുന്ന സമയത്ത് ഇരു ഭാഗത്തേക്കും ട്രെയിനുകൾ കടന്നുപോവുന്ന സമയമായിരുന്നു. കണ്ണൂർ ഭാഗത്തേക്ക് പോയ ട്രെയിൻ കനകന്റെ ശ്രദ്ധയിൽപ്പെട്ടുവെങ്കിലും തൊട്ടടുത്ത ട്രാക്കിൽ വന്ന ട്രെയിൻ ഇയാൾ കണ്ടില്ല. കേൾവിശക്തി ഇല്ലാത്തതിനാൽ ട്രെയിൻ അടുത്ത് എത്തുന്നതിന്റെ ശബ്ദം തിരിച്ചറിയാനും കനകന് സാധിച്ചില്ലെന്ന് പൊലീസ് അറിയിച്ചു.

മരിച്ച കനകൻ മത്സ്യത്തൊഴിലാളിയാണ്. അപകടം നടന്ന ഉടൻതന്നെ റെയിൽവേ പ്രൊട്ടക്ഷൻ ഫോഴ്സും വടകര പൊലീസും സ്ഥലത്തെത്തി പ്രാഥമിക നടപടികൾ സ്വീകരിച്ചു. ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്‌മോർട്ടത്തിനായി വടകര ഗവ. ജില്ലാ ആശുപത്രി മോർച്ചറിയിലേക്ക് മാറ്റിയതായി പൊലീസ് വൃത്തങ്ങൾ അറിയിച്ചു.

ഈ വാർത്ത ഷെയർ ചെയ്യൂ. 

Article Summary: Deaf and mute middle-aged fisherman named Kanakan was fatally hit by an Intercity train at Vadakara.

#Vadakara #TrainAccident #TragicDeath #DeafAndMute #KeralaNews #RPF